1 Yamwene 7 - Amazwi Yakwe Leza 2013

Isano lyakwe Solomoni

¹ Casendile Solomoni imyaka ikumi na itatu ukumalila uku kuula isano lyakwe.

² Wene wakuuzile Isano ilyamwangwa ukuti Mutengo waku Lebanoni. Umu utali lyali amamita 44 nu mu wipi lyali amamita 22, alino ukuya papela namo lyatalimfile ukufika pa mamita 13 na citika. Lyakweti milongo itatu ya ncesi zya mikelide, papo pano yatenzi. Ni ncesi zizyo zyali ni mitwe ya mikelide papela.

³ Ipaala lyaliko lyatesilwe pa myalo ya mbao zya mikelide apa milongo ini. Mu mulongo onga ale muli imbao ikumi na zisano.

⁴ Cila lusansa ulwa viumba lwakweti imilongo itatu ya mawindo. Amawindo yayo yalozyanya cinso yatatu yatatu.

⁵ Amafulemu ya visasa na mawindo kwene yonsi yali mu utali alingane monsi monsi, ukulolenkana na auze ku lusansa luze.

⁶ Ali pakukuula ni ng'anda ya ncesi, iyamwangwa ukuti Cikulwa ca Kwizizya mwenemo, ca ncesi. Umu utali cali amamita 22, alino mu kusaalala namo cali amamita 13 na citika. Apa nkolelo yakweco palunzilwepo ulukungu lwa ncesi na kalipaala penepo.

⁷ Wakuuzile ni cikulwa ca cilimba ca wene, cino camwangwa ukuti Cikulwa ca Kupingwila imilandu, mumo muno wapingwilanga imilandu. Cakuzilwe ni mbao zya mikelide, ukutandikila pansi mpaka nu mu nsito kwene.

⁸ Ng'anda yakwe Solomoni iyakwikala mwenemo yayelile mu musolo uuze uwayelile umukasi, ukupuzya apa Muputule wa Cilimba ca wene. Nayo yakuuzilwe mu musango uli umwi kwene umu pipi ni ng'anda kwene iyo. Pali ni ng'anda yuze ino Solomoni wakuulile umuci wakwe, umwana wakwe Falao.

⁹ Amang'anda yonsi yayo yakuuzilwe na mawe amutengo sana, yano yalepwile nu kuyapima calimwi, nu kusononta ningo ku nondo na kuli mukalalu, mukasi nu kunzi. Yakuuzilwe vi ukufuma mu mufula kufika lwamu nsito.

¹⁰ Imifula muno mwakuuzilwe amang'anda mwali amawe akalamba yano yapekanyiziwe uku ngwenya. Mu utali yamwi yali amamita yatatu na citika na yamwi yali amamita yani.

¹¹ Apapela ya mufula pali amawe yauze yano yaputwilwe usaka, alino ni mbao zya mikelide.

¹² Ukunzi nako kwali imilongo itatu ituntinkane iya mawe awazwe alino nu mulongo onga uwa mbao zya mikelide, apapela. Ali yano yazinguluka umusolo ukalamba. Umusolo wa ng'anda ikulu yakwe Yawe uwa mukasi, nu muputule wapa kwingilila mu ng'anda ikulu, navyo kwene vyazingulwikwe ni ciumba ca mulongo onga uwa mbao zya muti umukelide apapela ya milongo itatu ya mawe yawazwe.

Umulimo wakwe Hulamu

¹³ Lyene umwene Solomoni atuma akuya aama Hulamu ku Tuli.

¹⁴ Hulamu wali umwana wakwe mukamfwilwa umwi uwamu mutundu wakwe Nafutali. Isi wene wali umwina Tuli, kasula wa vyela vya mukuwa. Hulamu wali a fundi umwi uwa mano avule wakwe cimwi, nupya umucenjele mu milimo yonsi iya kupanga ivya vyelavyela. Fwandi lyene ali wino wizile ku mwene Solomoni ku kuomba imilimo ii yonsi yaku ng'anda ikulu yakwe Yawe, nu kwisano.

Incesi zyapa wingililo

¹⁵ Hulamu ali pakwengulula mukuwa, nga apanga incesi ziili izya vyela. Utali wa lucesi longa wali amamita ukulingana cinani, alino umu kusaalala wali amamita yasano na citika. Lyene yazisimpa na pa wingililo wa ng'anda ikulu yakwe Yawe.

¹⁶ Alino apanga ni mitwe iili ya vyela, iyakwika apapela ya ncesi. Ukulu wa cila mutwe ale uli amamita yaili nu kuluta.

¹⁷ Apanga na vimwi ivipikolezye wa munyololo, ivyakwika apapela ya ncesi. Icipikulwe conga pa mutwe onga ni cuze apa mutwe uze.

¹⁸ Apanga navino vikuloleka wa viseekwa vya pomegeleneti, imilongo iili yakukumana pali cila cipikulo.

¹⁹ Imitwe iyali papela pa ncesi zizi ziili zyamu muputule ulya, yakoline wa maluula, nupya mu utali yali amamita yaili.

²⁰ Fwandi ali vino yakambatika pa vipikulo ivyakolana wa minyololo. Fwandi iviseekwa vya pomegeleneti 200 yazingulusya umutwe onga nu uze nao vivyo kwene. Imitwe apapela ya ncesi yaloleka kwati iluwa.

²¹ Awe mukwai aimika incesi apapela ya muputule wa wingililo wa Ng'anda ikulu yakwe Yawe. Ulucesi ululi lwaku kaeya alutemela izina ati Yakini, nu lwaku katutu nalo ati a Boazi.

²² Papela ya ncesi zizi wayemvizye ni vyakuwazawaza ivyalolekanga wa maluula. Fwandi ali vino umulimo wa ncesi wasizile

Itanki lya mukuwa.

²³ Pacisila cakwe vii Hulamu apanga ni tanki lya mukuwa ilizinguluke, ilyazisile ukuluta pali yamita 4 na citika. Alino ukuzinguluka nako lyali ukuluta pali yamita 13, nu kucilinganya nako ukufuma apampela ukufika pa mpela nako lyali amamita 4 na citika.

²⁴ Ukunzi ya milomo yi tanki ukulizinguluka, kwali imikukulo imilongo iili ya vintu vya mukuwa vino yamatilizye kweneko calimwi kumwi ni tanki. Cila mukukulo watalimfile amamita 13 na citika.

²⁵ Alino itanki kwene lilyo yalitendekile pali ya cipambasi ya mukuwa ikumi na yaili. Yacipambasi yatatu ale yalozizye amanso kuli cila ntunga. Akuli kuti yatatu ku ufumondaka, yatatu ku uwondaka, yatatu ku katutu, alino na yatatu ku kaeya.

²⁶ Ukutikama kwi tanki kwali ukulingana ni minwe iini nanti tuti amamilimita amakumi cinimbali na yasano. Alino ku milomo kwene kwasapalile kwati avino kapu akaloleka, nu kuloleka usaka kwati amaluwa ya maluula. Amanzi yano yapimilwe ukutapila mwenemo yangafika amalita ukulingana 40,000.

Ivibaala vya mipeto vyakwe zaabu

²⁷ Alino nupya Hulamu kwene wapanzile ni vibaala ikumi lyonga vya mukuwa. Aika kweneko ni mipeto. Alino cila mupeto mu utali watalimpanga amamita yaili nu mu kusaalala vivyo kwene. Umu kuzika ali muno vyali mita wenga na citika.

²⁸ Ivibaala kwene vivyo vyapangilwe na mafulemu, mumo muno mwafyantikwe imbao zipapatale.

²⁹ Uku vipampa vya mbao izipapatale pali ivintu vimwi ivikuloleka wakwe yacisama, na yacipambasi na yakelubi. Alino pisika lyakwe vivyo pali ivipangwe vimwi, vipikolezye.

³⁰ Cila cibaala cakweti imipeto ya mukuwa ini alino na yasipindulo yani kwene a mukuwa. Alino pa matungi yani ponsi pali ivyakutungilila cakutekelapo itanki. Ivintu vivyo navyo kwene yaviyemvizye ni vipikolezye usaka ivyapanzilwe kwi we lya mukuwa.

³¹ Alino papela yakwe cila cibaala pali icintu cimwi cizinguluke icakutendekelapo itanki. Catumpwike papela kufika ku masentimita 45, nu kuzika nako amasentimita 18. Umu mbali mbali namo mwali ivimfonsi ukuzinguluka.

³² Imipeto ini nayo yatumpwike ukulingana na masentimita 66, nu kuya vyayelile lwa mwisika ya mbao izipapatale. Alino yasipindulo yene yali ukuli kumwi ni cibaala.

³³ Imipeto kwene iyo yapanzilwe kwati imipeto yi celeta. Yasipindulo, amalimu, amasipoko na maabu, vyonsi vyapanzilwe ukufuma kwi we lya mukuwa uwengululwe. Apisika lyakwe cila cibaala napo pali umupango uzinguluke. Ukupapatala kwa mupango uo kungalingana na mapi yaili, nupya vyonsi vivyo vino vyatungilile itanki ni mbao zipapatale vyakumbilinkine kuli kumwi ni vibaala.

³⁴ Cila cakutekapo cakweti ivilemelo vini, cila tungi ala patesilwepo cilemelo conga. Vyakutekapo vivyo vyapangilwe kumwi ni vikocikala.

³⁵ Papela ya cakutekapo napo pali umupango uzinguluke. Ukupapatala kwa mupango uo kungalingana na masentimita 22 mu kuzika, nupya vyonsi vivyo vino vyatungilile itanki ni mbao zipapatale vyakumbilinkine ukuli kumwi ni cibaala.

³⁶ Nupya pa vintu vivyo ivyatungilile umupango, ni mbao zipapatale, Hulamu walenzile penepo ivikoline na yakelubi, na yacisama, alino nu tuncindu apa kacende konsi akasile penepo. Alino azifilizya ni nkata zya maluwa ukuzinguluka.

³⁷ Vii, avili vino wapanzile ivyakutekapo vivi ikumi. Vyonsi vivyo vyapanzilwe mu musango uli umwi kwene nupya vyali ivyacipimo icili cimwi ni milolekele ili imwi kwene.

³⁸ Hulamu apangila penepo na mabeseni ikumi lyonga a vyela vya mukuwa, akuteeka pali cila cibaala. Beseni wenga mu kusaalala, ukumucilinganya pakasi, wasimwililanga ku mamita yaili. Alino cila beseni wali uwakuti angazula amanzi ukulingana na malita 800.

³⁹ Hulamu pali pakuteeka ivibaala visano ku katutu ka ng'anda ikulu yakwe Yawe. Navyuze visano aviteeka ku kaeya. Alino icibaala apali itanki, cene aciteeka lwa pakasi ka ng'anda ikulu yakwe Yawe, lwaku katutu na lwaku ufumondaka.

Utantiko wa musango wa viyembelo vya ng'anda ikulu yakwe Yawe

⁴⁰ Nupya Hulamu apanga na beseni na yafosyolo ni ngeso zyakukanyizizya. Acino Hulamu amalila imilimo yonsi ino waombelanga umwene Solomoni mu Ng'anda ikulu yakwe Yawe:

⁴¹ kuli kuti uku kuula incesi ziili, ukupanga imitwe iili apapela ya ncesi, pamwi nu kupangila kweneko ivipikolezye ivikoline ni minyololo ku mitwe kwene iyo iili.

⁴² Alino nu kupanga ivintu ivikoline ni viseekwa vya pomegeleneti ukulingana ni myanda ini ivyakwika ku mitwe ya ncesi. Kuli cila mutwe ale kuli imikukulo iili ya vipikolezye, na muli cila mukukulo wa vipikolezye ale muli ivyakolana ni viseekwa vya pomegeleneti umwanda onga.

⁴³ Alino nu kupanga ivibaala ikumi lyonga na mabeseni nayo ikumi lyonga akuteeka pa vibaala kwene vivyo.

⁴⁴ Alino nu kupanga itanki lyonga pamwi na yacipambasi apakutendekela itanki.

⁴⁵ Alino nupya ukupanga intendo, yafosyolo, ni mbakuli. Iviya vyonsi pyu vino Hulamu wapanzile vyali ivya mukuwa uswepe.

⁴⁶ Vyonsi vivyo umwene Solomoni wavyengulwile mu musili wa mbulo, uwayela pa ncende imwi ya nyika ya Yodani. Incende iyo yayela pakasi kakwe Sukoti na Zaletani.

⁴⁷ Solomoni atatazile apime ukunyoma kwa viya vyonsi vii ivyapanzilwe uku vyela vya mukuwa, pamulandu wakuti vyavulisye wakwe cimwi. Kusi nu muntu angavipima pakuti amanye vino vyanyomile.

⁴⁸ Solomoni wapanzile iviya vyakuomvya mu Ng'anda ikulu yakwe Yawe: kuli kuti kavuwa kakwe zaabu, ni tebulo lyakwe zaabu lyakwikapo umukate uwapeelwa kuli Leza.

⁴⁹ Ivyakutekapo inyali vyakwe zaabu musuma cuze, visano ala vili kwilunji navyuze visano ala vili kwimani, mukasikasi ka Ncende Yamuzilo kuluta. Apanga na maluwa, ni nyali ni vyakumanikila kweneko.

⁵⁰ Wapanzile ni ngako zyakwe zaabu musuma cuze, ni vyakuzimizya inyali, ni ngeso zya kukanyizizya, ni mbale ni vifutikilo, alino ni vilemelo vyakulemela ivisasa vyamu Ncende Yamuzilo kuluta nga ni vya visasa vya muputule ukalamba wa Ng'anda ikulu yakwe Yawe. Vyonsi pyu vyapangilwe kuli zaabu.

⁵¹ Lino Solomoni wamalilile umulimo wakwe onsi uwa Ng'anda ikulu yakwe Yawe, ali pakusezya vyonsi vino isi Davidi wapaatwilile Yawe umu nkoma zyamu Ng'anda ikulu yakwe Yawe, ivili wakwe siluva, zaabu ni viya vyuze.