1 Yamwene 6 - Amazwi Yakwe Leza 2013

Solomoni wakuula Ng'anda ikulu yakwe Yawe

¹ Pacisila ca myaka imyanda ini na cinani lino aina Izlaeli yafumile mu Eguputo, mu mwaka wakwe cini lino Solomoni wateekanga umu Izlaeli, umu mwezi uwa Zivu, Solomoni atandika uku kuula Ng'anda ikulu yakwe Yawe.

² Ng'anda ikulu yakwe Yawe ino Solomoni wakuuzile umu utali yali amamita 27. Umu kusaalala namo yali amamita 9. Ukuya papela napo yali amamita 13 na citika.

³ Umuputule ukalamba uwakwingilila penepo wali amamita 4 na citika ukuya pansi, alino amamita 9 umu kusaalala. Fwandi wene walingine sile ni Ng'anda ikulu yakwe Leza mu kusaalala.

⁴ Uku viumba vya Ng'anda ikulu yakwe Leza yisile amawindo yano amafulemu yingile mu ciumba lwa mukasi.

⁵ Uku ng'umba zya kunzi ya muputule ukalamba, lwa mbali mbali, nu kwi tundu ya Ng'anda ikulu yakwe Leza, yasuntinkinye utu miputule tuze tutatu, ututuntinkanye. Cila kamuputule kali amamita 2, umu utali.

⁶ Cila kamuputule aka pansi kali amamita 2 mu kusaalala, nu mu kucilinganya namo cila kamuputule kali amamita 2 na citika. Alino kamuputule konsi kano kali pakasi nako kali amamita 2 na citika. Alino akamuputule ka papela umu kucilinganya nako kali amamita 3. Iviumba vya Ng'anda ikulu yakwe Leza apapela yakwe cila kamuputule vyalolekanga ivinono. Cino Solomoni wacitile cico, walondanga ukucefya iciumba ukunzi pakuti yace yaika penepo imyalo.

⁷ Amawe yano yakuulilanga yayasonsontile calimwi kuku kwene kuno yayasendanga. Fwandi pa kukuula kutayanga icongo nanti cimwi ica nondo, ica mpasa nanti ica cela icili consi.

⁸ Umulyango wakwingilila umu tumiputule twakuila pansi waelile lwa kwikasa li lunji lya Ng'anda ikulu yakwe Leza, nu tumasitepu utukutungulula ukuya ku tumiputule twakwe ciili na twakwe citatu.

⁹ Lino Solomoni wamazile ku kuula Ng'anda ikulu yakwe Leza, aivimba ningo ni mbao pamwi ni vipampa ivyapangilwa ku mikelide.

¹⁰ Utumiputule tutatu tonsi, cila kamuputule kakweti amamita 2 ukuya papela. Tonsi yatusuntinkinye ku Ng'anda ikulu yakwe Leza, lwa kunzi. Nupya yatulundinkinye ni myalo ya mikelide itali.

¹¹ Yawe ali pakunena Solomoni ati,

¹² “Wakwe vino ciili pa Ng'anda ikulu yakwe Leza ino uku kuula, wemo ndi cakuti umalondelanga amasunde yane, pamwi ni vyeo vyane vyonsi ndakucitila vino nalavile so Davidi.

¹³ Nemo lyene ale namaikalanga pakasi ka antu yane mu Ng'anda ikulu yakwe Leza iya kwene iyakupepela mwenemo, ino ukunkuulila. Nupya ale ntalatala intazyele antu yane aina Izlaeli.”

¹⁴ Avino Solomoni wakuuzile Ng'anda ikulu yakwe Leza mpaka aimalila.

Ivyali Ng'anda ikulu yakwe Leza umukasi

¹⁵ Iviumba vya mukasi vyapampamilwe ni mbao zya mikelide, ukutandikila sile pansi ukufika nu mwi paala. Alino pansi napo yapampamile imbao zya milemo yakwe paini.

¹⁶ Alino umuputule wa mukasi nankasi uno yakati Ncende Yamuzilo kuluta, wene yaukuuzile lwa mukasi ukwitundu ya Ng'anda ikulu yakwe Leza. Umu kusalala wakwata amamita ukulingana na mamita 9 yauputula kambali, ni mbao zya mukelide nazyo zyatandikila sile pansi mpaka nu mwi paala.

¹⁷ Alino umuputule ukalamba uwa Ng'anda ikulu yakwe Leza nao wasyala ukulu ukulingana na mamita 18 umu utali.

¹⁸ Imbao zya mikelide zino yaputwilile Ncende Yamuzilo, yazipukwite nu kuzipalulula ningo sana, nga iyaziyemvya na maluwa awalule. Iviumba vya mukasi yapampamile imbao zya mikelide pakuti kutasyala iwe nanti limwi ilyakuti lyaloleka pa mbiliwili.

¹⁹ Lwa kwitundu lya Ng'anda ikulu yakwe Leza kwakuuzilwe akamuputule ukwali nu kwikala Mbokosi ya Upangano yakwe Yawe.

²⁰ Umuputule uo mu utali wali amamita 9. Alino mu utali namo ukuya lwa papela wali amamita 9. Ukuzinguluka monsi iyauyemvya na zaabu musuma cuze. Pa kavuwa napo iyapampamila imbao zya mikelide.

²¹ Alino Solomoni apomela zaabu musuma cuze ku ng'umba zya mukasi ka Ng'anda ikulu yakwe Leza. Alino aika penepo ni minyololo yakwe zaabu yakucilinganya pa mulyango wakwingilila mu muputule wa Ncende Yamuzilo.

²² Mukasi monsi pyu aka Ng'anda ikulu yakwe Leza, yapomile kweneko na zaabu. Iyapomela na kavuwa kwene kano kali mu Ncende Yamuzilo ukuluta.

²³ Alino yapanga na yakelubi yaili a mbao zya miolivi, nga yayika mu Ncende Yamuzilo. Mu utali cila Kelubi ale ali amamita 4 na citika.

²⁴ Ilyapa lyonga lyakwe kelubi lyatalimfile amamita 2 nu kucila penepo. Kuli kuti amamita 4 na citika ukufuma pa mpela yi lyapa lyonga ukuyafika pa mpela yi lyapa lyuze.

²⁵ Kelubi muze nawe vivyo kwene amamita 4 na citika. Fwandi yakelubi yonsi yalingine utali alino ni milolekele kwene.

²⁶ Fwandi mu utali cila kelubi wali 4 na citika.

²⁷ Awe fwandi ali vino wateesile yakelubi mukasikasi ka muputule wa Ncende Yamuzilo, ale yatiyanza amapa mu musango wakuti lyakwe wenga ale ilisinta ku lung'umba na lyakwe muze nalyo ku lung'umba. Alino lyene amapa yao yoili nayo yatiyakomenkana apakasi ka muputule.

²⁸ Yakelubi yao yoili yapomilwe na zaabu.

²⁹ Viumba vyonsi vya miputule ya mukasi ni yakunzi kwene, ivya Ng'anda ikulu yakwe Leza, wene waviyemvizye ni vyakuwaza vikoline na yakelubi, ni vikambalala vya tuncindu, na maluwa awalule.

³⁰ Na pansi kwene napo kwene apomele penepo zaabu, mukasi ka muputule nu kunzi kwene.

³¹ Alino apanga ivisasa vyapa mulyango wakwingilila mu Ncende Yamuzilo ukuluta. Ivisasa vivyo wavipanzile ni mbao zya muti wa muolivi. Papela ya visasa vyali ivisongole, ale vili ni vikavitungilila visano.

³² Visasa vivyo viili waviyemvizye ni vyakuwaza vikoline na yakelubi, ni vikambalala vya tuncindu, na maluwa awalule. Vyonsi vivyo avipomela na zaabu.

³³ Mu musango uli umwi kwene, pa mulyango ukalamba uwa kwingilila mu muputule ukalamba apanga cisasa ku mbao zya muolivi.

³⁴ Alino apanga ivisasa ukufuma ku mbao zya milemo yakwe paini, cila cisasa cakweti ivikambalala viili vyakucingilako.

³⁵ Visasa vivyo waviyemvizye ni vyakuwaza vikoline na yakelubi, ni vikambalala, na maluwa awalule. Vyonsi vivyo avipomela na zaabu musule.

³⁶ Alino nupya apanga ni viumba vyakuzinguluka umusolo wa mukasi ukulingana ni mipelwa itali iya mawe yano yasonwa usaka sana nga nu mupelwa onga uwa myalo ya mbao zya mikelide.

³⁷ Cali mu mwaka wakwe cini, mu mwezi wakwe Zivu, ali lino umufula wa Ng'anda ikulu yakwe Leza wakuzilwe.

³⁸ Alino lyene mu mwaka uwalenga ikumi na onga mu mwezi wakwe Buli, umwezi wakwe cinani, alino yamazile ku kuula Ng'anda ikulu yakwe Leza ukulingana na vyonsi vino yateinye, na vino yapanzile ukucita. Fwandi tungati casendile Solomoni imyaka cinimbali apa kukuula Ng'anda ikulu yakwe Leza.