1 Yamwene 5 - Amazwi Yakwe Leza 2013

Solomoni wateyanya ku kuula Ng'anda ikulu yakwe Yawe

¹ Hilamu umwene waku Tuli wali acuza wakwe Davidi lyonsi kwene. Nga lino uvwa ukuti Solomoni iyamupaka amafuta nu kumulasika uwene kuti apyane isi Davidi, atuma inkombe zyakwe kuli Solomoni.

² Alino Solomoni atuma akuyanena Hilamu yati,

³ “Mumanyile ukuti tata Davidi wazanzilwe ku mbali zyonsi kwene, icakuti waposiwe kukuula Ng'anda ikulu yakwe Yawe Leza wakwe yakumupepela mwenemo, mpaka sile lino Yawe walenzile kuti wene aye na maka pa anisi yakwe.

⁴ Lelo pali ndakai Yawe Leza wane watampela upemwilo ku mbali zyonsi, nupya ntakweti umwanisi nanti intazi ili yonsi.

⁵ Avino lyene nkasi kukuulila Yawe Leza wane Ng'anda ikulu, ndi muno Yawe wanenyile tata Davidi ati, ‘Umwana wako umonsi wino ndalasika pa cilimba ca wene aliwe alankuulila Ng'anda ikulu muno mulauvwika izina lyane.’

⁶ Acino peela ilamulo ku antu yako yaye ku Lebanoni yakansindile imikelide. Antu yane yalaombela pamwi na antu yako. Nani ndalipila antu yako consi cino ulapingula. Ndi vino umanyile, antu yane na antu yako kwene yonsi yatamanyile ivya kusinda imiti wa ina Sidoni.”

⁷ Lino Hilamu uvwa amazwi yakwe Solomoni, icimuzanzya wakwe cimwi nga avwanga ati, “Ilelo Yawe alumbanyiwe, pano wene watapeela kuli Davidi umwana uwamano kuti ateeka uluko luu ulukulu.”

⁸ Acino Hilamu atuma amazwi kuli Solomoni ati, “Natimpokelela amazwi yano wantumile nga ndacita vyonsi vino wanena ukucita. Ndakutumila imikelide ni milemo yakwe paini.

⁹ Antu yane yalaikunkulusizya kuli yemba ukufuma ku Lebanoni, nga nani ndaika pa manzi pa mato, kuti yailete ku ncende ino wasolola. Kuku kwene akuno ndaipaatwila nga nawe ulaisenda. Lelo ningatemwa kuti uce upeele ivyakulya ku antu yane.”

¹⁰ Mu musango kwene uu, amuno Hilamu watumilanga Solomoni imilando yonsi ya mikelide ni ya milemo yakwe paini ukulingana navino walondanga.

¹¹ Lyene Solomoni apeela Hilamu ingano ukulingana na magaloni amazimbi umwanda ni kumi na yasano, kuti ziye icakulya cakwimula antu yakwe, nga amupeela na amafuta ya miolivi ukulingana na malita amazimbi imyanda ini. Cila mwaka Solomoni watwalilile ukucitila Hulamu vikwene.

¹² Yawe wafikilizye ulayo wakwe apa kupeela Solomoni amano. Pali umutende pakasi kakwe Hilamu na Solomoni, nga yoili yacisile cipangano ca mutende.

¹³ Umwene Solomoni atoola antu akuomba incito yakukuliziwa mu mpanga yonsi ya Izlaeli. Lyene antu yano yakulizyanga incito yali 30,000.

¹⁴ Nga alasika Adonilamu pa utunguluzi pakasi kao. Ayapaatukanya mu maumba yatatu. Cila iumba lyakweti aonsi amazimbi ikumi, nupya cila iumba lyaombanga ku Lebanoni umwezi onga, nu kumwao nako imyezi iili.

¹⁵ Solomoni wakweti antu 70,000 akusenda amawe, na antu 80,000 yakalepula ya mawe mu myamba,

¹⁶ nga na yakapitao 3,300 yano yangalilanga aomvi aombanga incito.

¹⁷ Api lamulo lya mwene antu yaya yaconga amawe akulu asuma aku kuulila umufula wa Ng'anda ikulu yakwe Yawe.

¹⁸ Yafundi ya milimo yakwe Solomoni pamwi na yakwe Hilamu nga na onsi yamwi ukufuma ku musumba wa Gebali yaputola imiti nu kuteyanya amawe ya kukuulila Ng'anda ikulu yakwe Yawe.