1 Yamwene 4 - Amazwi Yakwe Leza 2013

Yacilolo yakwe Solomoni

¹ Solomoni wateesile impanga yonsi ya Izlaeli.

² Alino yacilolo yakwe yano wakweti aeya: Azaliya umwana umonsi wakwe Zadoki wali a simapepo.

³ Eliolefi na Aiya, ana yakwe Syisya, yali yakalemba. Yeosafati umwana wakwe Ailudi, wali a kalemba wa mbila.

⁴ Benaya umwana wakwe Yeoyada, wali a musika mukalamba uwa vita. Zadoki na Abyata yali a simapepo.

⁵ Azaliya umwana wakwe Natani uwangalilanga alasi yamu vitungu. Zabudi umwana wakwe Natani, wali a mpandamano uwa mwene.

⁶ Aisyali wali a kangalila wakwi sano. Adonilamu umwana wakwe Abida, wali a kangalila wa kukuulizya imilimo.

⁷ Solomoni wakweti na alasi ikumi na yaili yano yatekanga mu vitungu vyonsi vya mpanga ya Izlaeli. Ali yano yali nu kuleta ivyakulya kwi sano ivyakulya umwene na yonsi akwisano. Fwandi cila mulasi wali nu kuleta ivyakulya vyakulingana ukulya umwezi upuma pa mwaka.

⁸ Yaa, ali mazina yao: Beni Huli, ku mpanga ya myamba yakwe Efulemu.

⁹ Beni Dekeli wangalilanga ku misumba ii: Makazi, Syaalabimu, Beti Syemesyi na Eloni Betianani.

¹⁰ Beni Hesedi wangalilanga ku musumba wa Aluboti, pamwi nu musumba wa Soko nga ni mpanga yonsi iya Hefeli.

¹¹ Beni Abinadabu wangalilanga konsi ku Doli, impanga ya myamba. Wene watwite Tafati umwana wakwe Solomoni.

¹² Baana umwana umonsi wakwe Ailudi wangalilanga ku Taanaki, ku Megido nga na konsi ku Beti Syani, pipi nu ku Zaletani ukwisika lyakwe Yezileele, ukutandikila ku Beti Syani mpaka ukufika ku Abeli Meolaa nga nu musumba wa Yokomeamu.

¹³ Beni Gebeli wangalilanga ku Lamoti Gileadi nu ku misumba yakwe Yaili umwana umonsi wakwe Manase, ino ili ku Gileadi. Wakweti ni ciputulwa ca Aligobu cino cili ku Basyani, ni misumba amakumi mutanda iya malinga akulu ino yakweti imifikilo ya mukuwa pa mpongolo.

¹⁴ Ainadabu umwana umonsi wakwe Ido wangalilanga ku Maanaimu

¹⁵ Aimaazi wangalilanga ku Nafutali. Wene watwite Basemati umwana wakwe Solomoni.

¹⁶ Baana umwana umonsi wakwe Husyai wangalilanga ku Asyeli nu ku Bealoti.

¹⁷ Yeosafati umwana umonsi wakwe Paluwa wangalilanga ku Isakali.

¹⁸ Syimei umwana umonsi wakwe Ela wangalilanga ku Benjamini.

¹⁹ Gebeli umwana umonsi wakwe Uli wangalilanga ku Gileadi kumwi ni mpanga yakwe Siooni umwene wa ina Amoli nga ni mpanga yakwe Ogi umwene waku Basyani. Ukulunda pa alasi yaya ikumi na yaili, kwali umulasi wenga mpo uwa citungu cici.

Utesi uwa cituku wakwe Solomoni

²⁰ Antu amu Yuda nu mu Izlaeli yavuzile cuze wa musensenga uwamu nkumba yakwe yemba. Yali asansamuke pamulandu wakuti yakweti ivyakulya ni vyakumwa ivivule.

²¹ Uwene wakwe Solomoni watandikile ku Luzi lwa Yufulate mpaka nu ku mpanga ya ina Filisti, ukufika nu ku mupaka wa Eguputo. Antu amu mpanga zii yasonkanga imisonko kuli Solomoni nu kumutumikila amanda yonsi ya umi wakwe.

²² Ivyakulya ivyalondekwanga cila wanda kwakwe Solomoni ivyakuomvya uwanda onga vyali ukulingana ni vitundu 150 ivya usu utonyoleke alino ni vitundu 300 vyakwe mugailwa,

²³ ni ng'ombe ikumi zino yavungila mu milangu, ni ng'ombe amakumi yaili zino yacemanga mu nyika, nga ni mfwele umwanda, ukwikapo ni mpelembe, mpombo, cisongo ni vyunyi ivinone.

²⁴ Pano wene wateekanga amawene yonsi ayela lwaku uwondaka wa luzi lwaku Yufulate, ukutandikila ku Tifisa mpaka ukufika ku Gaza, nupya mwali umutende mu mpanga yakwe ni mpanga zyonsi izyamuzingulwike.

²⁵ Mu manda yonsi yano Solomoni wali umumi, Ayuda na ina Izlaeli yatenzi mu mutende, kutandikila ku Dani ukufika nu ku Belisyeba, cila muntu atulizye amatingi nanti amasamvu yakwe.

²⁶ Solomoni wakweti makoola amazimbi amakumi yani muno wasungilanga imfwalasi zyakupisya amaceleta, wakweti na antu amazimbi ikumi na yaili akukwela pa mfwalasi.

²⁷ Lyene yacilolo yaya ikumi na yaili yatwalanga ivyakulya ku mwene Solomoni na antu yonsi alyanga kwisano, cila cilolo nu luti lwakwe. Nupya yasininkizyanga ukuti kutaya ukuulizya akantu nanti kamwi.

²⁸ Yatwalanga ni vyakulya vyakwe baale nga ni nsaawa, zyakulisya imfwalasi na yamasaye nu kuvitwala konsi kuno vyalondekwanga ndi muno yapimile cila cilolo.

²⁹ Leza wapile Solomoni amano nu kulamoka ukutanga pimwa wa musensenga uwamu nkumba yakwe yemba.

³⁰ Solomoni wali uwamano ukuluta antu yamano yonsi aku ufumondaka, nu ku Eguputo kwene.

³¹ Wene wali uwamano ukuluta antu yauze asyala, kumwi na Etani uwaku Ezala, ukuluta Hemani, Kalikoli, Dala, na ana aonsi yakwe Maoli. Nga ululumbi lwakwe ilusalangana ku nko zyonsi ukuzinguluka impanga yakwe.

³² Solomoni wavwanzile amapinda amazimbi yatatu nga nu kusika inyimbo izimbi lyonga na zisano.

³³ Wavwanzile ivyapa miti, ukutandikila nu mukelide waku Lebanoni nga amalila na kamuti ka isopu kano kakatambilizya pa lung'umba. Wene wasambilizye ni vyapa nyama ni vyunyi, ivisela nga ni nswi.

³⁴ Yamwene umu nsi yonsi yuvwa ivya mano yakwe Solomoni nga iyatuma antu akuya uvwa kunoli.