1 Yamwene 3 - Amazwi Yakwe Leza 2013

Solomoni wapepa kuli Leza kuti amupeele amano

¹ Solomoni wacisile upangano na Falao umwene waku Eguputo nu kutwala umwana wakwe Falao. Akusizya umuci ku musumba wakwe Davidi mpaka lino wamalila kukuula isano lyakwe, ni Ng'anda ikulu yakwe Leza, nga ni liinga ukuzingulusya Yelusalemu.

² Pa nsita ilya walanga yatacili yakuule Ng'anda ikulu yakwe Yawe na antu nayo yapeelanga amawila apa ncende zino yakapepela mwenemo izipusanepusane.

³ Solomoni wali umuntu umwi uwatemwisizye sana Yawe, nu kulondela walondelanga amasunde yakwe isi Davidi. Lelo nawe kwene walanga acili akupeelela impolelwa nu kocela ubani pa ncende zino yakapepela mwenemo zipusanepusane.

⁴ Pa nsita imwi umwene waile ku Gibyoni ku kupeela impolelwa, pano ukwali incende icindame kuluta izyuzye. Solomoni pali pakupeela amawila izimbi akoca pa kavuwa kako.

⁵ Kuku kwene ku Gibyoni, Yawe pali pakulolekela kuli Solomoni usiku mu ciloto. Yawe pali pakumunena ati, “Lenga cino ungatemwa kuti inkupeele.”

⁶ Solomoni aasuka ati, “We Yawe wakwatile tata nupya umuomvi wako Davidi uluse ulukulu, pamulandu wakuti wene wacitanga ivisuma pa manso yako nupya kacita wa vyawololoke nupya uwacisinka. Nupya watutwalilila ukumulanga uluse lwako ulukulu nu kumupeela umwana umonsi kuti aikale pa cilimba cakwe ica wene apilelo.

⁷ “Lyene, we Yawe, Leza wane, watuncita ne muomvi wako ukuya umwene mu cifulo cakwe tata Davidi. Lelo nemo nene mwana munono sile nupya ntamanyile ivyakuteeka.

⁸ Ne muomvi winu indi pakasi ka antu inu yano mwasolola, antu aingi wakwe cimwi cakuti yatangapendwa.

⁹ Acino mpekwini ne muomvi winu amano akuteekelamo antu inu, pakuti namanya ivyakupusanya pakasi ka visuma ni viipe. Ndi cisi vivyo uzye aweni angateeka antu inu avule wakwe cimwi?”

¹⁰ Awe cico naco icizanzya Yawe pakuzana ukuti Solomoni walenga icintu cii.

¹¹ Acino Leza amunena ati, “Pamulandu wakuti walenga cico, utailengile amanda avule, nanti ukama nanti ukuti inkupeele amaka akukoma anisi yako, lelo wemo walenga amano akulungika mu kuputula imilandu,

¹² Nani namacita cino watulenga. Namakupeela umwenzo wa mano nu kwiluka, uwakuti kutalatala kuye umuntu uwakulingana nawe, nupya pacisila cako kutalatala kuye umwi.

¹³ Nupya na vino utalenzile kwene namakupeela. Ukama nu ucindami uwakuti umu umi wako onsi kuli yamwene kutalatala kuye uwa kulingana nawe.

¹⁴ Nupya ndi cakuti umalondelanga umu ntampulo zyane, wawaka na masunde yane pamwi ni vyeo vyane ndi vino so Davidi wacitanga, ndavuzya amanda ya umi wako.”

¹⁵ Alino Solomoni aiza azyuka amanya ukuti Leza wali wavwanga kunoli mu ciloto. Awe mukwai aswilila ku Yelusalemu nu kuya imilila apa nkolelo ya Mbokosi ya Upangano yakwe Yawe. Alino apeela impolelwa zyakoca na mawila yacuvwano. Alino nupya aimula yacilolo yakwe yonsi.

Solomoni waputula umulandu ukome

¹⁶ Mu wanda umwi yacizelele yaili iyiiza kuli Solomoni.

¹⁷ Umwanaci wenga avwanga ati, “Musambazi nemo nu mwanaci unji wii tukaikala ing'anda yonga. Nemo naviile umwana ala tukwikala swensi nu unji.

¹⁸ Lino papita amanda yatatu pano napapiile nawe apapa umwana. Twali sile swenga kutali umuntu namuze nanti aumwi.

¹⁹ “Uwanda umwi usiku umwana umonsi uwa mwanaci wi afwa. Nyina kwene uwamwilikizye.

²⁰ Acino wene akatuka usiku pakasi, atoola umwanane apambali pano naizi, lilyo ale indi mu tulo, alino amwika na pa cifuwa cakwe pa mayele. Umwana wakwe umufwe awino aika pa cifuwa cane.

²¹ Lino niza nazyuka nati nkanonsye umwana, awe cumi inzana watafwa. Alino akatondo namulolekesya, nazana ukuti asi mwanane wino naivyalila.”

²² Lelo umwanaci muze wilya avwanga ati, “Ufi! Umwanane auwi umupuma. Umufwe ali mwanako.” Uwankolelo nawe avwanga ati, “Nakana! Umufwe ali mwanako. Umwanane auwi umupuma.” Ali vino iyapazyanya pa manso yakwe Solomoni.

²³ Lyene umwene avwanga ati, “Wii akuti umwanane auwi umupuma, umufwe ali mwanako, nu muze nawe avwanga icili cimwi kwene.”

²⁴ Acino umwene pali pakutuma akuya leta ulupanga, nga yaya yamuletela ulupanga.

²⁵ Lino yaluleta avwanga ati, “Lepulini umwana pakasi, mupeele wenga icipande mbali nu muze nawe icipande cuze.”

²⁶ Alino umwanaci wino umwana wali umupuma, auvwa uluse, nga anena umwene ati, “Musambazi, mupelini unji umwana, mutamukoma foo!” Wene wacisile cico pano watezelanga sana umwanakwe umu mwenzo. Lelo umuze wene avwanga ati, “Cazipa ataya umwanane nanti umwanako, mulepulini sile pakasi!”

²⁷ Lyene umwene avwanga ati, “Pelini umwana umupuma ku mwanaci wankolelo. Mutamukoma, pano wiyo kwene ali nyina.”

²⁸ Lino antu yonsi amu Izlaeli yuvwa upinguzi uno umwene wapingwile, iyatandika ukoopa umwene, pamulandu wakuti yaweni ukuti akweti amano ukufuma kuli Leza akulungika umu kuputula kwa milandu.