1 Yamwene 22 - Amazwi Yakwe Leza 2013

Aabu wapangila kupoka musumba wa Lamoti Gileadi

¹ Papisile imyaka itatu ukwaula kuti kuye inkondo pakasi ka ina Asilya na ina Izlaeli.

² Lelo mu mwaka wakwe citatu Yeosafati umwene waku Yuda atentemuka ku kulola umwene waku Izlaeli.

³ Alino Aabu auzya inkombe zyakwe ati, “Lamoti Gileadi umusumba witu, nga uzye pacani cino twikala sile, ukwaula kuti tuye tukaupoke ku mwene waku Asilya?”

⁴ Alino Aabu auzya Yeosafati ati, “Uzye utalansukilila ku kulwisya musumba wa Lamoti Gileadi?” Yeosafati aasuka umwene waku Izlaeli ati, “Wemo ndi cakuti watuiteyanya, ale nani kwene ndaiteyanya, pamwi ni vita vyane vyonsi, ukwika penepo na vivi ivikapita pa mfwalasi.”

⁵ Lelo Yeosafati anena Aabu ati, “Cingazipa inkolelo tutale tuzye umpandamano kuli Yawe.”

⁶ Acino Aabu akonganika yakasema yakwe ali manye imyanda ini, nga ayuzya ati, “Uzye nje nkalwisye umusumba wa Lamoti Gileadi, nanti foo?” Nayo yamwasuka yati, “Yanga, pano Yawe amaupeela mu makasa yako we mwene.”

⁷ Lelo Yeosafati auzya ati, “Uzye kusi kasema namuze wakwe Yawe wino tunguzya kweneko umpandamano?”

⁸ Aabu aasuka Yeosafati ati, “Akunoli umuntu umwi wino angatuuzizya kuli Yawe, lelo namupata pano wene atatala ansemela cimwi icisuma. Lyonsi kwene akansemela sile amasyamo. Wene a Mikaya umwana umonsi wakwe Imila.” Yeosyafati nawe aasuka ati, “Umwene atalinzile kuvwanga vivyo.”

⁹ Fwandi Aabu pali pakwama inkombe yakwe yonga nga ainena ati, “Yanga likwene ukaame Mikaya, umwana umonsi wakwe Imila.”

¹⁰ Yamwene yoili, umwene waku Izlaeli na Yeosafati umwene waku Yuda, yatenzi pa vilimba vyao vya wene ala yazwite na malaya yao awene, ala yatenzi apa vilimba vya wene pa lwano lwa kupuulila, apanzi lwapa mulyango wa musumba wa Samaliya. Yakasema nayo ala yakusema apa nkolelo yao.

¹¹ Kasema wenga wali a Zedekiya umwana umonsi wakwe Kenaana, wiyo uwapanzile vipembe vya cela atandika nu kunena Aabu ati, “Yawe wavwanga wati, ‘Uku vipembe vya mwata uu ali kuno ulatotolela aina Asilya suka sile ukayalovye pyu pyu pyu.’ ”

¹² Na yakasema yonsi asyala yasesema umuli monga kwene ala yakuti, “Uce ukaye ukalwisye umusumba wa Lamoti Gileadi nu kucimvya, pano Yawe alaupeela mu makasa yako we mwene.”

Kasema Mikaya wasesemela Aabu isyamo

¹³ Alino inkombe yonga, iya iyaile ku kutoola Mikaya, itandika kunena Mikaya iti, “Yakasema yonsi yasesemela umwene ivintu visyuko. Nawe kwene amuno ulondelele sile.”

¹⁴ Nga lelo Mikaya wene amwaasuka ati, “Nalapa umwi zina lyakwe Yawe wa umi, ukuti nemo namalanda vino Yawe umweneco amanena.”

¹⁵ Walanga Mikaya wafika sile ku mwene Aabu, umwene nawe amuuzya ati, “We Mikaya uzye umwene Yeosafati nani tungaya tukalwisye umusumba wa Lamoti Gileadi, nanti tutace tuyeko?” Mikaya aasuka ati, “Muce mwapita mukalwisye, mulaya mukacimvye. Yawe umweneco alaleka mucimvye.”

¹⁶ Lelo Aabu alondekanya ukuuzya ati, “Uzye amaila yanga yano ningakunena, pakuti lino ukulanda umwi zina lyakwe Yawe ulinzile wavwanga ivyacumi?”

¹⁷ Mikaya nawe aasuka ati, “Nemo nkulola kuno aina Izlaeli yasalanganile mu myamba wa mfwele izisi nu mucemi. Alino Yawe walanda wati, ‘Antu yaa yatakweti intunguluzi foo. Acino cila muntu kaapita ulumi ukwakwe.’ ”

¹⁸ Alino Aabu anena Yeosafati ati, “Walola, avino nalinkukunena ukuti Mikaya atatala ansemela penepo ivintu visuma, suka sile iviipe vitupu!”

¹⁹ Mikaya alondekanya penepo ati, “Ale tala uvwa kuno vino Yawe akulanda. Nemo nalinalola Yawe atenzi pa cilimba cakwe ca wene, nga na angeli yonsi ala yatiyimilila umu mbali.

²⁰ Nga Yawe auzya ati, ‘Aweni amaya akalyombeleke Aabu pakuti akatuke akaye ku kulwisya umusumba wa Lamoti Gileadi, apakuti nu kufwila akuno ace akafwile?’ Angeli yamwi iyaasuka iviiyele, nauze nayo iviiyele.

²¹ Wasuka mupasi onga wiza wimilila inkolelo yakwe Yawe, nga wasuka uti, ‘Aamaya akalyombeleke Aabu anene.’

²² “Yawe nawe awuzya ati, ‘Uzye umaya ukamulyombeleke uti uli?’ Mupasi wasuka uti, ‘Namaya nkaleke yakasema yakwe Aabu yaseme vyaufi.’ “Lyene Yawe avwanga ati, ‘Icisuma, fwandi pitanga kamulyombeleke, nawe amaya akuvwe, akazumile.’ ”

²³ “Alino pakusyalikizya Mikaya avwanga ati, ‘Fwandi vino cili Yawe aliwe alenzile ukuti yakasema yako yonsi yakulyombeleke. Yawe umwisikulu aliwe akulonda kuti uce uponelwe nu uzanzo.’”

²⁴ Lyene Zedekiya umwana umonsi wakwe Kenaana, apalama pipi nga apama Mikaya ulupi api tama ati nu kuti, “Uzye Mupasi wakwe Yawe afumile nsita cii muli nene pakuti aize alanda muli wewe?”

²⁵ Mikaya nawe amwaasuka ati, “Insita iyo ulaimanya lino ulaya ukafisame mu kafyototi kamwi ka mukasikasi.”

²⁶ Umwene Aabu pali pakunena inkombe yakwe yonga ati, “Lema Mikaya umutwale kuli Amoni umulasi uwamu musumba, na kuli Yoasyi umwanane.

²⁷ Uyanene yamusunge mu ng'anda yaminyololo, nga mulinzile mwamupeela cakulya cinono na manzi yanono suka sile ince imbwele umutende.”

²⁸ Mikaya alanda ati, “Wemo ndi cakuti waca wawela umutende, awe nce, ale Yawe atalanda muli nene.” Nupya atwalilila nu kuvwanga ati, “Mwe antu mwensi, mwemo mungala muvwikisye sile vino natindanda.”

Umwene Aabu lyene wafwa

²⁹ Aabu umwene waku Izlaeli na Yeosafati umwene waku Yuda yapita ku kulwisya umusumba wa Lamoti Gileadi.

³⁰ Aabu pali pakunena Yeosafati ati, “Apakutandika ukulwa nemo namailuvyanya, lelo wemo foo.” Uzwale sile insalu zya wene. Fwandi ali vino Aabu pakutandika ukulwa wene aivulunganya.

³¹ Umwene waku Asilya nawe walanga watakonkomezya yamusika akalamba ya vita amakumi yatatu na yaili apitanga pa mfwalasi na maceleta, ukuti cisi cakwezya ukulwisya umuntu muze ali wensi, suka sile Aabu umwene waku Izlaeli.

³² Fwandi lino yamusika akalamba yayo lino yalola umwene Yeosafati, yonsi yatandika ukwelenganya ukuti ali mwene wa ina Izlaeli. Fwandi yonsi ali kuno yatwala amano, ku kumulwisya. Nga lyene lino Yeosafati wapunda kuti yamutuule,

³³ alino yalola ukuti, fwandi asi ali mwene wa ina Izlaeli. Papo kwene yata nu kumulwisya.

³⁴ Lelo icita conga ca ina Asilya, ciza casumba uluceto ukwaula nu kumanya ningo wino cikulasa, fwandi amuli Aabu awino calasa apa ulimbilo wa cakuzwala cakwe cakuicingilila ica cela. Nawe Aabu pali pakupunda kapisya wi celeta ati, “Senuka, nga umfumye mu ulwi. Nemo nalaswa.”

³⁵ Uwanda kwene ulya inkondo nayo lyene ala alino lwanya nu kunya. Aabu wene asyala sile asintilile umutwe mwi celeta alozya icinso ku ina Asilya, mpaka afwa amanguzi kwene yalya. Uwazi uwafumanga mu cilonda cakwe ala ukuzwila pansi mwi celeta, nga lino ilanzi lyawa Aabu afwa nu kufwa.

³⁶ Lino ilanzi likuwa, ali pakuumila ivita vya ina Izlaeli imbila iyakuti, “Umuntu wensi aswilile ku musumba wakwe nu ku mpanga yakwe kuno wafuma!”

³⁷ Fwandi ali vino umwene Aabu wafwile. Ni cala cakwe yacitwala ku musumba wa Samaliya, nu kuzika ali kuno yaya yacizika.

³⁸ Yafula ni celeta lyakwe pa cifula camu Samaliya kwene, kuno yacizelele yakaowa. Yasimbwa nayo pali pakwiza ku kumyanta uwazi wa mwene wiyo, wakwe vino Yawe wavwanzile ukuti ali vino cilaya.

³⁹ Ivintu vyuze vyonsi vino Aabu wacisile, ukwika penepo ni sano lyakwe ilya mino ya nzovu, lino wakuuzile pamwi ni misumba yonsi ino wakuuzile, vyalembwa mu lupapulo lwa Milandu yakwe Yamwene ya ina Izlaeli.

⁴⁰ Lino Aabu wafwile, Aaziya umwana wakwe umonsi amupyana pa cilimba ca wene.

Yeosafati umwene waku Yuda

⁴¹ Yeosafati umwana umonsi wakwe Asa watandike kuteeka mu Yuda mu mwaka wakwe cini uwa kuteeka kwakwe Aabu umwene waku Izlaeli.

⁴² Yeosafati wali ni myaka amakumi yatatu na isano apa nsita ino watandike ukuteeka, nga wateesile mu Yelusalemu imyaka amakumi yaili na isano. Nyina wali a Azuba, umwana wakwe Syili.

⁴³ Yeosafati wacitanga ivintu ivisuma pa manso yakwe Yawe, wakwe vino isi Asa wacitanga. Lelo wene atononyile incende zino antu atamanya Leza yapepelanga penepo. Nupya antu yatwalilile ukupeelela penepo impolelwa nu kocela ubani ku ncende zizi kwene.

⁴⁴ Cintu cuze icakuti Yeosafati yuvwananga nu mwene wa ina Izlaeli.

⁴⁵ Ivintu vyuze vyonsi vino Yeosafati wacisile, na vino watukwite, kumwi ni nkondo zyonsi zino walwile, vyalembwa mu lupapulo lwa Milandu yakwe Yamwene aku Yuda.

⁴⁶ Yeosafati nawe wazinzile aonsi yonsi pyu, acende yao aombanga pa ncende zya kupepela penepo, izyayelile papela ya myamba, yano yasile pacisila cakuteeka kwakwe Asa, uwali isi.

⁴⁷ Mu manda yalya mu Edomu mutali umwene. Lelo umwene uwamu Yuda ali wino walasike umulasi wakuteeka kweneko.

⁴⁸ Yeosafati wapanzile ni vyombo vyakuti vyalamba ku kuyasenda zaabu ku Ofili. Lelo ivyombo vivyo vitatazile vipite pali yemba pamulandu wakuti vyononike ku Ezioni Gebeli.

⁴⁹ Lyene Aaziya umwana umonsi wakwe Aabu anena Yeosafati ati, “Leka antu yane yapita pa manzi na antu yako mu vyombo.” Lelo Yeosafati atazumilizye cico.

⁵⁰ Pacisila cakwe cii Yeosafati afwa, nga yamuzika ku musumba wakwe Davidi ku nzisi ya vikolwe vyakwe. Alino Yeolamu umwana wakwe umonsi amupyana pa wene.

Aaziya umwene waku Izlaeli

⁵¹ Mu mwaka walenga ikumi na cinimbali, pano Yeosafati wayelile pa wene uwa kuteeka uku mpanga ya Yuda, ali muno Aaziya umwana umonsi wakwe Aabu watandike kuteeka aina Izlaeli. Nu kuteeka wateesile mu musumba wa Samaliya pa myaka iili sile.

⁵² Wene wifyanga pa manso yakwe Yawe, pamulandu wakuti walondelanga imisango iipe yakwe Aabu isi na yakwe Yezebele nyina, alino ni ya mwene Yeloboamu uwalenzile kuti aina Izlaeli nayo yatandike ukwifya.

⁵³ Aaziya watumikilanga Baali nu kumupepa, nga nawe kwene alenga Yawe ukusoka, Leza wa ina Izlaeli, pa kulondela vyonsi vino isi wacitanga.