1 Yamwene 21 - Amazwi Yakwe Leza 2013

Calo ca matingi cakwe Naboti

¹ Kwali umuntu umwi waku Yezileele wino izina lyakwe a Naboti. Wene wakweti calo ca matingi ku Yezileele, pipi ni sano lyakwe Aabu, umwene waku Samaliya.

² Wanda umwi Aabu anena Naboti ati, “Umpeele icalo cako ca matingi pakuti amuno nalima mwenemo umusalu, pamulandu wakuti capalamisya kwisano lyane. Nani namakupeela calo cuze icisuma ca matingi. Nanti ndi watemwa inkupeele ulupiya ulungalingana nu mutengo wa calo cako.”

³ Lelo Naboti aasuka ati, “Ivikolwe vyane ivyansilile icalo cii ca matingi. Ali cino cakana sana, pano na Yawe walesya cico.”

⁴ Acino Aabu afuma kweneko ala watasoka sana pali vino Naboti umwina Yezileele wavwanzile. Lino wasendama pa musanzi wakwe, alozya amanso ku lung'umba nu kulya atalile.

⁵ Yezebele umuci wakwe aiza, nga amuuzya ati, “Uzye pacani wakutumalila vivyo? Icani cino wakanila ukulya?”

⁶ Nawe amwaasuka ati, “Apamulandu wakuti nalinanena Naboti umwina Yezileele kunkazya icalo cakwe ca matingi, nanti ndakasi, imupele icalo cuze ca matingi. Lelo wene wali wavwanga wati, ‘Nemo ntange nezye ku kupeela calo cane ca matingi.’ ”

⁷ Yezebele umuci wakwe pali pakumunena ati, “Uzye umwene uwamu Izlaeli asi awewe kwene? Katuka nu kukatuka, ndulye nu kusansamuka. Nemo namakupokela calo ca matingi cico kuli Naboti umwina Yezileele.”

Naboti wakomwa

⁸ Acino Yezebele alemba makalata mwi zina lyakwe Aabu, nga afwanta penepo ni nsimbi ya wene, asaina penepo. Alino atuma makalata yayo ku vilolo ni ntunguluzi zyamu musumba umwikalanga Naboti.

⁹ Mu makalata yayo walemvile amazwi ati, “Muce mufunge icakulya pa wanda onga. Alino mukakonganike antu pali pamwi. Naboti muce mumupeele cilimba cikalamba ca mucinzi.

¹⁰ Muce musolole penepo antu yaili, iviwelewele kuti yayo kwene ali yano yace yakize pa manso yakwe Naboti nu kumupeela umulandu wa kutuka Leza pamwi nu mwene. Lyene mumufumizye kunzi, alino mumutame na mawe kuti afwe.”

¹¹ Ivilolo pamwi ni ntunguluzi zyamu musumba umwikalanga Naboti wiyo, navyo ivicita mumu kwene muno Yezebele avwangile.

¹² Alino yalesya ukulya apa wanda onga, nga yakonganika antu pali ponga nu kupeela Naboti cilimba cikalamba ca mucinzi.

¹³ Lyene antu yaya yaili viwelewele yiza yikala ulunga na Naboti. Alino iyatandika kupeela Naboti umboni waufi papa kwene pa manso ya antu, yati, “Naboti watatuka Leza pamwi nu mwene.” Acino antu yalya yafumizya Naboti kunzi ya musumba, akuno yaya yamutama na mawe mpaka afwa.

¹⁴ Lyene yatuma inkombe kuli Yezebele kuti zikamunene ziti, “Naboti yatiyamutamola na mawe, nu kufwa watafwa.”

¹⁵ Lilyo kwene lino Yezebele uvwa ukuti Naboti yatiyamutama na mawe, nu kufwa watafwa, anena Aabu ati, “Katuka yanga katole icalo ca matingi cakwe Naboti umwina Yezileele, cino wene wakanyile ku kukazya. Naboti wiyo asi umumi awe, lelo watafwa.”

¹⁶ Lino Aabu uvwa ukuti Naboti watafwa, akatuka nga aya atoola icalo ca matingi cakwe Naboti umwina Yezileele, kuti ciye icakwakwe.

Eliya wanena Aabu ukuti ang'anda yakwe yonsi yalalowa

¹⁷ Lyene Yawe anena Eliya umwina Tisyibe ati,

¹⁸ “Katuka uye ku kukomenkanya Aabu umwene waku Izlaeli, wino akateeka mu Samaliya. Umaya ukamuzane mu calo ca matingi cakwe Naboti. Wene wataya ku kutoola icalo cico kuti ciye icakwakwe.

¹⁹ Lyene ukamunene uti, ‘Yawe wavwanga wati, pacisila ca kukoma umuntu uzye umatola ni calo cakwe kwene?’ Nupya umunene uti, ‘Yawe wavwanga wati, mu ncende muno yasimbwa yamyansile uwazi wakwe Naboti, nawe kwene ali muno yalamyantila uwazi wako.’ ”

²⁰ Lino Aabu walola Eliya, avwanga ati, “Uzye wanzanikizya we mwanisi wane we?” Eliya aasuka ati, “Ee, natinkuzanikizya, watuyelezya sana ukucita vya winyi pa manso yakwe Yawe.

²¹ Ali cino Yawe akuti, ‘Ndakuponyezya imipamba. Namakupekesa impekese na ana aonsi yonsi amu mupanda wako, akalamba kumwi na ance kwene.

²² Namakulovya pamwi na akazi kako wakwe vino nalovizye Yeloboamu umwana umonsi wakwe Nebati pamwi na akazi kakwe. Na vino cali ku ang'anda yakwe Baasya umwana umonsi wakwe Aiya, pamulandu wakuti wemo wavundola umwenzo wane nu kulenga kuti aina Izlaeli yifye.’

²³ Lyene pamulandu wakwe Yezebele, Yawe wavwanga ukuti yasimbwa yalaliila icala cakwe mukasi kamu musumba wa Yezileele.

²⁴ Alino umuntu wako ali wensi we Aabu aalafwila mu musumba, yasimbwa aalamulya. Na wiyo wensi aalafwila mu mpanga, pa mbiliwili, ivyunyi ivilamulya.”

²⁵ (Kutatazile kuya umuntu nanti wenga uwayembwike pa manso yakwe Yawe umu kucita ivintu viipe kuluta pali Aabu, pano wene watunkwangwa na Yezebele, umuci wakwe.

²⁶ Aabu wacitanga ivintu vyawinyi lino wapepanga utuluwi, mu musango uli umwi kwene uno aina Amoli yacitilanga, yaya yano Yawe wazinzile ukufuma mu Izlaeli.)

²⁷ Lino Eliya wamala ukulanda, Aabu alepola vyakuzwala vyakwe, avizuula azwala ni nsalu zya malanda, nga afunga ukulya. Alala vivyo kwene ala azwite insalu zya malanda. Napakupita, atontongela sile.

²⁸ Lyene Yawe anena kasema Eliya umwina Tisyibe ati,

²⁹ “Uzye watulola vino Aabu waicefya? Pa kuicefya kuno wene waicefya pa manso yane, ntalamuletela imipamba amanda yonsi yano alikala pano nsi. Lelo ndaletela ang'anda yakwe imipamba mu manda ya umi wa mwana wakwe umonsi.”