1 Yamwene 20 - Amazwi Yakwe Leza 2013

Inkondo ya ina Izlaeli na ina Asilya

¹ Beni Hadadi umwene wa ina Asilya akonganika ivita vyakwe vyonsi ukwika penepo na yamwene yauze amutungililanga. Nayo yali amakumi yatatu na yaili, ale yali ni vilwilo vyao ivili wa mfwalasi na maceleta. Fwandi Beni Hadadi wiyo ali pakukatuka nu kuya lizizya umusumba wa ina Samaliya pakuti yaulwisye.

² Beni Hadadi ali pakutuma inkombe ku mwene Aabu uwa ina Izlaeli ati, “Vii avino umwene Beni Hadadi akulonda kuti umucimbile.

³ Umupeele siluva wensi, na zaabu wensi, na yawako yonsi alino na ana yako yonsi, apakuti vyonsi viye ivyakwakwe.”

⁴ Aabu nawe aasuka ati, “Kamunenini muti nemo nazumila, naipela kumwi ni vyuma vyane vyonsi ukuti vingaya ivya mwene Beni Hadadi.”

⁵ Walanga papita amanda inkombe nupya iziswilila ku mwene Aabu ku kulenga icintu nacuze cino Beni Hadadi wayanenyile iziti, “Beni Hadadi wavwanga ukuti wakunenyile kumupeela siluva na zaabu wako wensi. Ukwikapenepo na yawako kumwi na ana yako.

⁶ Lelo kwene nanti cingaya vivyo, inkulonda nu kuti ningatuma amakombe yane ku kwiza peketa umwi sano umwako nu mu mang'anda ya nkombe zyako. Yene yalasenda akantu akali konsi kano yalazana ukuti katikazipa. Yaliza mutondo apa nsita ndi ikwene ii.”

⁷ Umwene Aabu nawe ali vino wakonganike intunguluzi zyonsi zyamu mpanga yakwe. Alino atandika nu kuyanena ati, “Mwalola amano ya muntu wi! Wene akalonda ukutwingilila. Watumile amazwi akuti akulonda siluva na zaabu wane, na yawane na ana yane. Nani nazumile.”

⁸ Intunguluzi pamwi na antu yonsi ali pakwasuka yati, “Ata see! Wemo utauvwa ku muntu wiyo. Cisi cakwezya ukumupeela ivintu vino walenga iila lyakwe ciili.”

⁹ Acino Aabu aasuka inkombe zyakwe Beni Hadadi ati, “Mukanene umusambazi wane nupya umwene muti, ‘Umuomvi wako alacita vyonsi vino inkolelo wamulenzile kuti acite, lelo icintu cii cino walenga cene atangafikilizya.’ ” Inkombe zizi izipita ku kunena Beniadad uwasuko uu.

¹⁰ Lyene Beni Hadadi atuma amazwi nayauze kuli Aabu ati, “Yakatai yandepule ndi cakuti cico cisikwiza cicitike! Indi nu kuleta impendwa ya antu ilingane akuti yize yonone umusumba winu uwa Samaliya nu kusenda ivyativyononwa mu makasa yao.”

¹¹ Aabu umwene waku Izlaeli nawe awezya amazwi ati, “Kamunenini Beni Hadadi muti, ‘Umusilika wampomvu akailumbilizya pacisila ca ulwi, asi lino ulwi utali usile.’ ”

¹² Beni Hadadi auvwa amazwi yaa ale akumwa pamwi na yamwene yauze mu mataalu yao. Lyene apeela ilamulo ku antu yakwe ati, “Iteyanyini ku kulwa ulwi.” Acino antu yalya iyaitenyanya ku kulwisya umusumba.

Aabu wacimvya Beni Hadadi

¹³ Pa nsita kwene ilya kasema umwi aya kuli Aabu umwene waku Izlaeli nga alanda ati, “Yawe wavwanga wati, ‘Uzye walola iciliumba cii, icikulu ca vita? Ilelo kwene namacipela mu makasa yako, nga lyene ulamanya ukuti nene indi Yawe.’ ”

¹⁴ Lelo Aabu auzya ati, “Uzye aweni amatungulula pakuya ku nkondo?” Kasema nawe amwaasuka ati, “Yawe wavwanga wati, amakolela alumendo yano alasi yakaangalila.” Aabu nupya auzya ati, “Uzye aweni wino amatungulula ivita vyonsi?” Kasema aasuka ati, “Nga vino awewe kwene!”

¹⁵ Aabu ali pakukonganika alumendo, ivita vino alasi yangalilanga. Yonsi pamwi yali ukulingana 232. Alino akonganika ni vita vya ina Izlaeli ivyasile, ivyali ukulingana 7,000.

¹⁶ Inkondo itandika lino ilanzi lyafika pa mutwe papela, lilyo ale Beni Hadadi pamwi na yamwene yano yuvwananga nawe yali mu mataalu yao yakumwa. Yamwene yaya yonsi pamwi yali 32.

¹⁷ Alumendo yano alasi yangalilanga ali yano yakolezile. Alino inengu zino Beni Hadadi watumile, ziya zilanda ziti, “Iumba limwi ilya vita lyafika ukufuma ku Samaliya.”

¹⁸ Beni Hadadi azyasuka ati, “Yalemini sile muyalete apuma, ciye yakwiza ku nkondo nanti ku kucimba mwemo yalemini sile.”

¹⁹ Alino alumendo yano alasi ya vitungu yangalilanga iyakolela apankolelo umulongo, ale iumba lya vita vya nkondo lyonsi ililondela pacisila cao.

²⁰ Cila cita icilungama umuntu wenga mu kumutota. Lino aina Asilya yalola cico, iyalucokola. Aina Izlaeli nayo iyayacocovya. Beni Hadadi nawe akwela pa mfwalasi apuuka pali pamwi na yamwi asilika ya pa mfwalasi.

²¹ Umwene Aabu asyala atoola vimwi vimwi pali vino ati yapuuka iyasya, ivili wa mfwalasi na maceleta. Alivino Aabu wacimvizye aina Asilya wakwe cimwi.

²² Pacisila cakwe vii kasema aya kuli Aabu nga amunena ati, “Ale lyene swilila mwenemo uye mu kukomya ivita vyako. Pano amala umwaka wazinguluka, umwene waku Asilya ali nu kwiza kuzanza nupya kwene.”

Aina Asilya na ina Izlaeli yalwa inkondo iila lyakwe ciili

²³ Inkombe zyakwe Beni Hadadi umwene waku Asilya iziya kunoli nu kumunena ziti, “Tuleza twa ina Izlaeli a tuleza twamu myamba. Uli mulandu uno yene yali na maka ukuluta sweswe. Lelo ndi cakuti twayalwisya umu manyika, icumi kwene tulaya tukayacimvye.

²⁴ Lyene cita vii: zinga alasi yaa pa vilimba vikalamba vikalamba ivya vita vya nkondo, usontele penepo yauze.

²⁵ Nga lyene ukolonganike ivita ukulingana ni mpendwa yakwe vivi kwene vino vyutwike. Ni mpendwa ya mfwalasi pamwi na maceleta nayo iye wakwe iya kwene iyankolelo. Alino lyene tuce tukalwisye aina Izlaeli mu manyika nu kucimvya tulayacimvya.” Beni Hadadi nawe azumila, acita ukulingana na umpandamano wao.

²⁶ Lino umwaka upya wafika, Beni Hadadi akonganika ivita vya aina Asilya nga iyaya ku musumba wa Afeki ku kulwa inkondo ni vita vya ina Izlaeli. Beni Hadadi

²⁷ Aina Izlaeli nayo kwene yakonganika ivita vyao, iyaipangasya, nga iyapita ku kulwa na ina Asilya. Aina Izlaeli yalolekanga sile ungati utumaumba twiili utwa maufyo ya mbuzi. Lelo aina Asilya yene yavuzile wakwe cimwi, ale yatiyasalangana monsi monsi.

²⁸ Lyene kasema wenga aya anena Aabu umwene waku Izlaeli ati, “Yawe wavwanga wati, ‘Pamulandu wakuti aina Asilya yakuti nene Leza uwamu myamba, lelo insi Leza uwamu manyika, ali cino namaleka kuti ucimvye iumba lya vita lilya nanti likule uli. Lyene alino ulamanya ukuti nene indi Yawe.’ ”

²⁹ Apa manda cinimbali aina Asilya na ina Izlaeli yatenzi sile mu nsakwe zyao, ale yakuzyulukana sile. Apa wanda walenga cinimbali iyatandika ukulwa, icakuti aina Izlaeli iyakoma aina Asilya amazimbi umwanda onga.

³⁰ Aina Asilya yauze asyala, iyutukila ku musumba wa Afeki kuno amalinga ya musumba ulya yaponile antu amazimbi amakumi yaili na cinimbali. Beni Hadadi nawe kwene autukila mu musumba kwene ulya, aya afisama mu muputule uwa kukasi mu ng'anda imwi.

³¹ Inkombe zyakwe ali kuno zyaile nu kuyamunena ziti, “Twatituvwa ukuti yamwene yonsi ya ina Izlaeli yakwata uluse. Wemo tupele sile insambu yakuti tuye ku mwene wa ina Izlaeli, tule twatituzwala ni vyakuzwala vyakulanga indosya ale twatitunyepa ni myando umu nsingo. Limwi lyene atange aye atukome.”

³² Inkombe zizi apali pakuzwala ivyakuzwala vyakulanga indosya, iyainyepa ni myando mu nsingo. Iyaya ku mwene wa ina Izlaeli, nga iyamunena yati, “Umuomvi wako Beni Hadadi umuomvi wapapata kuti utaleka afwe.” Aabu nawe aasuka ati, “Uzye fwandi apano acili umupuma? Awe kwene cazipa! Ala kunondi wene ali sile wa mwinane!”

³³ Inkombe zizi pano zitenzi zyalolelanga sile ukuvwa izwi limwi lino limafuma kuli Aabu iliziipe. Lino zyuvwa sile kuno Aabu wavwanga ukuti? Beni Hadadi umwina, nazyo zuwazuwa izimuzumilizya ziti, “Ee, icacumi wakwe mumo kwene muno mwavwangila, Beni Hadadi umunyonko!” Aabu nawe azinena ati, “Aleni fwandi pitini zuwa mukamulete kuno.” Lino Beni Hadadi wafika, Aabu amwama kuti yakwele yonsi umwi celeta.

³⁴ Beni Hadadi anena Aabu ati, “Nemo namakuwezezya imisumba yonsi ino tata wapokolwile so. Nupya ndi ukasi, uce ukuule ing'anda zikalamba zya kuculuzizya mwenemo mu musumba wa Damasiko, wakwe vino tata wacisile mu Samaliya.” Aabu nawe aasuka ati, “Apamulandu wa cipangano cii, namakuta uye umuntungwa.” Acino acita cipangano nawe, nga amuta apita.

Kasema wenga wakalipila Aabu

³⁵ Uwanda umwi Yawe apeela ilamulo ku muntu umwi, wenga uwamuli yakasema, kuti anene umuze ati, “We, si ngume.” Lelo umuze akana.

³⁶ Acino kasema wilya avwanga ati, “Pamulandu wakuti wakana ukuyela Yawe, zuwazuwa lino umafuma muno cisama amulema.” Nacendi walanga akufuma sile papa, akomenkanya cisama, nga nawe amulema.

³⁷ Kasema wilya aya azana umuntu namuze nga amunena ati, “Napapata, nguma.” Acino umuntu wilya amuma nu kumucisa.

³⁸ Lyene kasema wilya ali pakumunyepa akasalu pa manso, aivulunganya nu kuivulunganya. Alino lyene alolela ukuti umwene waku Izlaeli aize apite.

³⁹ Lino umwene wiza akupita, kasema wilya atandika ukulaizya ati, “Musambazi nemo lino twalituli uku nkondo icita conga calicandetela kweneko umwanisi wenga wino cali calema nu kulanda iciti, ‘Linda umuntu wi. Ndi cakuti wapuka, ale wemo umafwila penepo. Ndi cakuti cisi vivyo, ale uli nu kulipila impiya amazimbi yatatu zyakwe siluva.’

⁴⁰ Lelo nemo nalinapamviwa ni vintu vyuze, nga umuntu wiyo wapuka.” Lyene Aabu umwene waku Izlaeli avwanga ati, “Wemwisikulu watuipingula, avivyo kwene ali vino cili nu kuya.”

⁴¹ Lyene zuwazuwa kasema wilya avimbula kasalu ku mutwe na pa manso. Alino Aabu alooka ukuti a kasema.

⁴² Alino kasema atandika kunena umwene ati, “Yawe wavwanga wati, ‘Apakuleka umuntu wilya apuuke, wino nakunenyile ukuti ukakome, wewe kwene umafwila penepo, nga ni vita vyako vilakomwa pakuleka ivita vyakwe vipuuke.’ ”

⁴³ Umwene Aabu pali pakuswilila mwenemo ku musumba waku Samaliya, ale watasakamala wakwe cimwi nupya umusoke.