1 Yamwene 18 - Amazwi Yakwe Leza 2013

Kasema Eliya na yakasema yakwe Baali

¹ Walanga papita insita itali, mu mwaka wakwe citatu, Yawe anena Eliya ati, “Yanga ukalolekele ku mwene Aabu nani namatuma imvula, imatonya.”

² Acino Eliya aya ku kulolekela kuli Aabu. Lilyo walanga inzala yacila mu cipimo mu Samaliya.

³ Aabu ali vino wamile Obadiya, kangalila wa yaomvi akwisano. (Obadiya wiyo wali aumwi uwatontelanga Yawe.

⁴ Lino Yezebele wakomanga yakasema yakwe Yawe, Obadiya watozile yakasema yamwi ukulingana nu mwanda onga nga ayafisa mu macele yaili. Wene wafisile yakasema amakumi yasano mwi cele lyonga, nayauze amakumi yasano ayafisa mwi cele lyuze, nga ayapeela ivyakulya na manzi.)

⁵ Walanga Aabu watanena Obadiya ati, “Leka tuce tupite ku tufukoka twa manzi nu ku manyika, kuti tukalengule ukungaya umulemvwe wakulya imfwalasi ni nyumbu zitu kuti zitafwa uku nzala.”

⁶ Na ca kendi, ali vino yakatwike nu kuzumilizyanya intunga kuno cila muntu angaya akalengule. Aabu apita ku ntunga yonga na Obadiya ku ntunga yuze.

⁷ Lino Obadiya akuya alino umu nzila akomenkanya kasema Eliya. Obadiya ali pakulooka Eliya, nga afukama pansi afupime, nga auzya Eliya ati, “Uzye icumi cumi awewe Eliya?”

⁸ Eliya nawe amwaasuka ati, “Ee, anene kwene Eliya, yanga ukanene umusambazi wako Aabu uti, ‘Eliya ali kuno.’ ”

⁹ Obadiya nawe amwaasuka ati, “Uzye icani cino nemo nifya kunuli pakuti ungansumba umu ntazi iyo, kuti Aabu aye akankome?

¹⁰ Awe nkulanda icumi, pali Yawe Leza wako uwa umi, kusi uluko nanti uwene umwi kuno umusambazi wane atatumako umuntu umwi wakuti afume akukulonda. Na lino amu luko nanti uwene uwo yalanda ukuti utaaya kweneko, wene akayanena kuti yalape nu mulapo ukuti wemo yatakuzana kweneko.

¹¹ Uzye lyene ukunena uli kuti impite nkanene Aabu ukuti wemo uli kuno?

¹² Nga cakuti nala nafumapo, limwi Mupasi wakwe Yawe amakutwala ku ncende yuze, ino nemo nsikumanya. Lelo ndi cakuti naya nanena Aabu ukuti wemo uli kuno, alino ndi cakuti wene wiza wazana usi penepo, ale lyene angiza ankomole sile. Uwaiusya ukuti nemo naipelesya ukupepa Yawe ukufuma ku wance wane.

¹³ Uzye watala uvwa ukuti lino Yezebele wakomanga yakasema yakwe Yawe nemo nafisile yakasema yamwi umwanda onga mu macele? Umwi cele lyonga mwali yakasema amakumi yasano, nu mulyuze namo amakumi yasano. Nupya anene nayatwalilanga ivyakulya na manzi.

¹⁴ Ale lyene fwandi icani cino unganena kuti nkanene umwene inti wemo uli kuno? Wene angaya akankome sile!”

¹⁵ Eliya nawe amwaasuka ati, “Icumi cumi inkulapa kuli Yawe Wamaka yonsi, wino nkatumikila, ukuti ilelo namaya nkalolekele kuli Aabu.”

¹⁶ Acino Obadiya aya kuli Aabu ku kumunena vya pali Eliya. Alino Aabu apita ku kukomenkanya Eliya.

Eliya na Aabu

¹⁷ Lino Aabu walola Eliya, amunena ati, “Uzye asi awewe, we muntu kacita wa vimvulunganya ku ina Izlaeli?”

¹⁸ Eliya nawe aasuka ati, “Nemo insi umuntu kacita wa vimvulunganya ku ina Izlaeli. Lelo wemo pamwi na ang'anda yakwe so, mwemwe mukacita vivyo. Mwemo mwafutatila amalamulo yakwe Yawe nu kulondela Tubaali.

¹⁹ Caleka ndakai ulinzile ukwama antu yonsi aina Izlaeli, yize yankomenkanye pa Mwamba wa Kalimeli. Apa kwiza ulete na yakasema yalya imyanda ini na makumi yasano yakwe Baali nga na yakasema imyanda ini yakwe Asyela, yano yakaimulwa pi tebulo lyakwe Yezebele.”

Eliya na yakasema yakwe Baali

²⁰ Acino Aabu atuma akuya aama yakasema yalya monsi mu Izlaeli kuti yize yakongane pa Mwamba wa Kalimeli.

²¹ Eliya pali pakupalamila ku antu yaya yonsi nga ayanena ati, “Uzye alilaci lino mulelenganya vino muli nu kucita? Ndi cakuti Yawe ali Leza winu, fwandi ali wino mwapepa! Lelo ndi cakuti Baali ali leza winu, fwandi ali wino mwapepa!” Lelo antu yatavwanzile nanti izwi lyonga.

²² Lyene Eliya ayanena ati, “Nene nenga sile nsile pali yakasema ya Mwene, lelo Baali akweti yakasema imyanda ini na makumi yasano.

²³ Alino fwandi kayatupeele yacipambasi yaili. Muleke yakasema yayo yatoole penepo cipambasi wenga. Yamupangole nu kupangola. Yamwike apa nkwi, lelo yatakozya umoto, foo. Nani kwene ali vino yacite kuli cipambasi wino amasyala penepo.

²⁴ Alino muleke yakasema yaa yakwe Baali yapepe kuli kaleza kao. Nani namapepa kuli Leza wane, nga Leza wino amaasuka nu kutuma umoto, ale aliwe ali Leza wacumi.” Antu nayo pakwasuka iyapundila ca pamwi yati, “Endi, wavwanga ningo!”

²⁵ Alino Eliya aama yakasema yakwe Baali nga ayanena ati, “Aavuzile amwemwe. Ali cino mwemwe tandikilini penepo ukusolola cipambasi wenga, nga mu mukome. Alino mupepe kuli leza winu, lelo mutapemba umoto, awe.”

²⁶ Nayo ali pakutoola cipambasi wenga pali yano yalesile, nga iyateyanya na vyonsi ivyalondekwanga. Iyatandika nu kupepa Baali ukufika ni lanzi umutwe pakasi. Lyene yakuuta kuli Baali, yati, “Baali we, sitwasuke!” Yakasema yalya ale yakucina, yakuzinguluka kavuwa kano yakuuzile. Lelo Baali nawe ukwaula ukwasuka. Kutali uwakuti ayaasuke.

²⁷ Lino ilanzi lyafika umutwe pakasi, Eliya atandika kuyatumfya, ati, “Mwapundisya apa kupepa! Baali wene a leza! Limwi muno kasanya watalala akulota, nanti limwi wataya ku vyalo, nanti ali pa lwendo ku kutandala. Manye wene akaswile, acino yangini mukamuzyule.”

²⁸ Acimo yakasema yaya pali pakulemasya kupepa Baali. Yatandika nu kuicembola ku vipeni nu kuitotola na masumo ukulingana na vino aisikulu yatailanga ukuti ali kuisangulula icakuti na mawazi yamati na cacacaca!

²⁹ Ali vino yakonkinye ukuzamboka pa nsita ntali ukwaula kuti Baali wiyo ayaasuke. Nanti impwelo zisi zyakuvwika foo.

³⁰ Alino Eliya anena antu yonsi ati, “Palamilini kunondi.” Antu nayo yakongana panoli, yamuzinguluka. Lyene Eliya atandika kuzifya kavuwa kakwe Yawe kano yomolwile.

³¹ Wene atoola amawe ikumi na yaili ukulingana ni mitundu ikumi na iili ya amu mupanda wakwe Yakobo, umuntu wino Yawe watemile izina lyakuti Izlaeli.

³² Amawe kwene yayo ayano akuulila kavuwa ka kupepela penepo Yawe. Alino aimba na kamufolo ka manzi ukuzinguluka kavuwa kako, akangazula itepe lyonga.

³³ Alino aika ni nkwi pa kavuwa, aputola cipambasi wenga wilya mu vipimfya nga amwika papela apa nkwi. Lyene anena antu ati, “Tapilizini amanzi mu nsembo zini zikulu, nga mwitile papela ya kavuwa napa nkwi kwene pakuti zitipate.”

³⁴ Lyene ayanena ati, “Swilizini nupya kwene.” Nayo ali vino yacita. Nupya kwene ayanena ati, “Swilizini iila lyakwe citatu, nga nayo yacita vivyo kwene iila lyakwe citatu.”

³⁵ Amanzi iyatandika ukukonkolokela mu mbali mbali, mpaka kamufolo kasuka kazula.

³⁶ Alino amanguzi, pa nsita ino yakapeelelapo impolelwa, kasema Eliya apalama atandika nu kupepa ati, “We Yawe Leza wakwe Abulaamu, na wakwe Isaki, na wakwe Izlaeli, sungaleka ukuti antu yaa yasininkizye ukuti wewe uli Leza mu mpanga ya Izlaeli. Alino nu kuti nene nenga ndi kasema wako nu kuti natincita vii vyonsi api lamulo lyako.

³⁷ Ngasuke we Yawe, sule ungasuke, pakuti antu yaa yamanye ukuti wewe uli Yawe, nu kuti wemwisikulu ukuwezya imyenzo yao kunuli nupya.”

³⁸ Lyene Yawe Leza ali pakulenga kuti umoto upone pa kavuwa, iwoca impolelwa, inkwi, amawe nu musili, nga iumika na manzi yaya ali mu kamufolo.

³⁹ Antu yonsi aweni kweneko yapona pansi, nga yavwanga yati, “Yawe ali Leza! Yawe ali Leza!”

⁴⁰ Eliya pali pakuvwanga ati, “Lemini yakasema yakwe Baali! Mutaleka nanti wenga apuuke! Lino yayalema, Eliya pali pakuyasenda ku Cifoloma ca Kisyoni nga akuno ayakomela.”

Cilala ca myaka itatu casila

⁴¹ Lyene Eliya anena Aabu ati, “Pitanga, kalye, nemo nuvwa kuno imvula ikuuza.”

⁴² Lino Aabu waya ku kulya, Eliya nawe ali pakusyala wakwela pa mwamba wa Kalimeli, afukama aika nu mutwe wakwe umu mpamba.

⁴³ Alino anena umuomvi wakwe ati, “Yanga kasungamile kuli yemba.” Umuomvi wilya akuno aya, nga lino waweluluka kuli Eliya amunena ati, “Ntaweni kweneko nanti cimwi.” Mpaka suka icifika amaila cinimbali, ale Eliya akumutuma ukuyalola kuli yemba.

⁴⁴ Iila lyalenga cinimbali lino umuomvi wawela, lyene aiza amwaasuka ati, “Nalinalola akalikumbi akanono akalingine nu lupi lwa muntu, ale kakufuma muli yemba.” Avino Eliya anena umuomvi wiyo ati, “Yanga ukanene Aabu uti, ‘Kwela mwi celeta lyako nga utentemuke umwamba lino imvula itacili iize.’ ”

⁴⁵ Apa kasita sile akanono, umwiyulu imufita na fititi pamulandu na makumbi ya mvula. Alino cimuza icitandika kupunga. Imvula nayo pasi pakuvula, itandika nu kutonya. Aabu ali pakukwela mwi celeta lyakwe nga atentemuka nu kuswilila ku musumba wa Yezileele.

⁴⁶ Amaka yakwe Yawe yali na Eliya. Eliya anyepa ivyakuzwala vyakwe mu musana. Afuma akusimula nzila yonsi apa nkolelo yakwe Aabu, suka sile nu mumbali ya musumba wa Yezileele.