1 Yamwene 17 - Amazwi Yakwe Leza 2013

Usemo wakwe Eliya pa cilala icakumala imyaka itatu

¹ Kasema umwi uwi zina lyakwe Eliya umwina Tisyibe mu mpanga yaku Gileadi, anena Aabu ati, “Nemo nalapa mwi zina lyakwe Yawe, Leza wa umi wa ina Izlaeli, wino nkatumikila, ukuti apa myaka iili nanti itatu kutalatala kuye ulumi nanti imvula suka sile ince mvwange.”

² Lyene Yawe anena Eliya ati,

³ “Fuma kuko, yanga ku ufumondaka akuno uye ukafisame ku luzi lwa Keliti, ku ufumondaka wa Yodani.

⁴ Wemo umamwanga amanzi amu luzi kwene lulo. Alino natinena yamwankole kuti yakuletela icakulya kuko kwene.”

⁵ Acino Eliya pali pakucita ndi vino Yawe wamunenyile. Aya aikala mu nkumba ya luzi lwa Keliti, lwaku ufumondaka wa Yodani.

⁶ Yamwankole iyamuletela umukate ni nyama akatondo na manguzi, nga amwa amanzi mu luzi kwene lulo.

⁷ Lino papita insita imwi, uluzi ilukama pamulandu wakuti imvula itatonyanga mu mpanga ilya.

Kasema Eliya na mukamfwilwa waku Zalefati

⁸ Nupya Yawe anena Eliya ati,

⁹ “Katuka likwene uye ku Zalefati, musumba waku Sidoni, akuno ukikale. Natinena mukamfwilwa umwi wino akaikala kuko kwene kuti akupeela icakulya.”

¹⁰ Acino Eliya akatuka aya ku Zalefati. Nga lino wafika pa mpongolo ya musumba, alola penepo mukamfwilwa ala akusweyelezya inkwi. Alino Eliya aama mukamfwilwa wilya amunena ati, “Mukwai nkulenga mundeteleko amanzi kuti imwe.”

¹¹ Lino mangu wilya akuya ku kumuletela amanzi, nupya kwene Eliya amwama nu kumunena ati, “Mukwai nkulenga mundeteleko na kamukate.”

¹² Mangu wilya avwanga ati, “Awe kulanda icumi, pali Yawe Leza wako uwa umi, nemo ntakweti umukate nanti onga. Lelo nkweti sile usu unono mu mpakwilo alino nu tumafuta tunono mu musazi. Nemo nizile kuno ku kusweyelezya inkwi pakuti lino namaya uku ng'anda, inje nkeleke icakulya icakuti nene nu mwanane umonsi tulye, nga twalolela ukufwa.”

¹³ Eliya nawe anena mukamfwilwa ati, “Utuvwa intete. Pita ukwako ukacite ndi vino watulanda. Lelo utale ukampangile kamukate akapapatale akanono, nga lyene upange akakuti wewe nu mwana wako mulye.

¹⁴ Pasi pano Yawe, Leza wa ina Izlaeli wavwanga wati, ‘Impakwilo yako italatala ipunguke nu musazi wa mafuta nao utalatala upunguke ukufika na pa wanda uno Yawe alaleka imvula itonye pa mpanga ino.’ ”

¹⁵ Mukamfwilwa wilya apita aya acita ndi vino Eliya amunenyile. Acino Eliya na mukamfwilwa wilya pamwi na ang'anda yakwe, yonsi kwene yatulilwe ivyakulya pa manda avule.

¹⁶ Pasi pano impakwilo itapungwike nu musazi wa mafuta nao kwene utapungwike, ndi vino Yawe wavwanzile kupitila muli Eliya.

¹⁷ Nga nupya walanga papita amanda yamwi, umwana wilya wakwe mukamfwilwa alwala. Indwala nayo itwalilila ukukoma, mpaka umwana wilya afwa.

¹⁸ Mangu wilya anena Eliya ati, “Uzye icani cii cino wancitila vii, we kasema wakwe Leza? Uzye wiza kuno ku kwiusya Leza pa maifyo yane kuti aleke umwana wane afwe?”

¹⁹ Eliya nawe amwaasuka ati, “Mpela umwana wako.” Alino Eliya atoola umwana ukufuma mu makasa yakwe nyina nga amusenda ku muputule uwa ng'anda ya papela muno wasendamanga, nga amulambalalika pa musanzi wakwe.

²⁰ Lyene Eliya apepa ni izwi likulu ati, “We, Yawe Leza wane, nga fwandi icani cino wacitila mukamfwilwa wii icintu ciipe ndi cii? Nupya watankwatila inkumbu apa kunsunga wakwe cimwi. Lelo wemo waleka kuti umwanakwe afwe.”

²¹ Lyene Eliya alambalala pa mwana wilya amaila yatatu nga apepa kuli Yawe ati, “We Yawe, Leza wane, si leka umulumendo wi aye nu umi nupya!”

²² Yawe auvwa ipepo lyakwe Eliya, nga umulumendo atandika kufuta aya nu umi nupya.

²³ Eliya akatusya umwana wilya nga atentemuka nawe ukufuma mu muputule ulya, amutwala kuli nyina. Alino anena nyina ati, “Lola, umwana wako ndakai ali nu umi.”

²⁴ Lyene mangu wilya anena Eliya ati, “Icumi lyene alino namanya ukuti wewe muntu wakwe Leza, nu kuti Yawe akavwangila munuli.”