1 Yamwene 16 - Amazwi Yakwe Leza 2013

Umwene Baasya waku Izlaeli

¹ Lyene Yawe akalipila Baasya kupitila muli kasema Yeu umwana wakwe Hanani ati,

² “Wemo utaali cimwi foo, nga nakucindamike kuti uye intunguluzi ya antu yane aku Izlaeli. Lelo walondelela imisango yakwe Yeloboamu nu kulenga antu yane aina Izlaeli ukwifya, nu kuti yandenge ukusoka pamulandu wa maifyo yao.

³ Acino namakulovya pamwi na akazi kako wakwe vino nalovizye Yeloboamu umwana umonsi wakwe Nebati pamwi na akazi kakwe.

⁴ Yasimbwa yalalya ivyala vyakwe yao ang'anda yakwe Baasya yano yalafwila mu musumba, nga ni vyunyi vyamu lwelele vilalya ivyala vyakwe yayo alafwila mu mitengo.”

⁵ Ivintu vyuze vyonsi vino Baasya wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Izlaeli.

⁶ Alino Baasya afwa nga yamuzika mu Tiliza. Alino Elaa umwana wakwe umonsi amupyana pa cilimba ca wene.

⁷ Ukulunda pali vivyo, Yawe anena kasema Yeu umwana umonsi wakwe Hanani kuti akanenole Baasya pamwi na amu ng'anda yakwe ukuti, pamulandu wa viipe vyonsi vino wene wacita pa manso yakwe Yawe. Wene walenzile Yawe ukusoka pakucita vivyo, ndi vino ang'anda yakwe Yeloboamu yacisile, na pamulandu wakuti wene ononyile ang'anda yakwe Yeloboamu yonsi.

Umwene Elaa waku Izlaeli

⁸ Mu mwaka walenga amakumi yaili na mutanda uwa kuteeka kwakwe Asa umwene waku Yuda, Elaa umwana umonsi wakwe Baasya yamulasike pa wene wa ina Izlaeli, nga wateesile mu Tiliza imyaka iili.

⁹ Lyene umuntu umwi izina lyakwe a Zimuli, uwali kangalila mukalamba wa maceleta yakwe aali citika, apanga kukoma Elaa. Pansita kwene ilya Elaa wali ku Tiliza, ala akukoleka mu ng'anda yakwe Aliza, wino wali umwangalizi wi sano lya mwene ku Tiliza.

¹⁰ Zimuli aingila mu ng'anda, akoma Elaa, nga amupyana pa cilimba ca wene. Cii cacitike mu mwaka walenga amakumi yaili na cinimbali uwa kuteeka kwakwe Asa umwene waku Yuda.

¹¹ Zuwazuwa lino Zimuli watandika ukuteeka, akoma akazi kakwe Baasya yonsi pyu. Atasile umonsi nanti wenga umupuma, cisi cimwi aye umwina nanti a cuza.

¹² Acino Zimuli aonona akazi kakwe Baasya yonsi, wakwe muno Yawe wavwangile muli kasema Yeu,

¹³ pamulandu wa maifyo yonsi yano Baasya na Elaa umwanakwe umonsi yacisile. Yene yalenzile kuti aina Izlaeli yifye, nu kulenga kuti Yawe, Leza wa ina Izlaeli, asoke pamulandu wa kupepa tuluwi twao.

¹⁴ Ivintu vyuze vyonsi vino Elaa wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Izlaeli.

Umwene Zimuli waku Izlaeli

¹⁵ Mu mwaka walenga amakumi yaili na cinimbali uwa kuteeka kwakwe Asa umwene waku Yuda, Zimuli wateesile mu Tiliza amanda cinimbali sile. Walanga ivita vyativisaka insakwe mu Gibetoni, umusumba wa ina Filisti.

¹⁶ Lino aina Izlaeli ali mu nsakwe yuvwa ukuti Zimuli wataumana akapi na yamwi nga akoma umwene, uwanda kwene ulya yuma imbila mu nsakwe ukuti Omuli, musika mukalamba uwa vita, ali wino yatiyalasika pa wene wa ina Izlaeli.

¹⁷ Lyene Omuli pali pamwi ni vita vyakwe vyonsi Yafuma ku Gibetoni nga yaya yalizizya umusumba wa Tiliza.

¹⁸ Lino Zimuli walola ukuti umusumba wapokololwa, aya aingila mu muputule wa papela mukasi na nkasi ki sano nga atumula umoto mwi sano ukuzinguluka pano wali. Avino wafwile,

¹⁹ pamulandu wa maifyo yano wene wacisile, apakucita iviipe pa manso yakwe Yawe. Wene walondelanga imisango yiipe yakwe Yeloboamu, nu mwi ifyo lino walenzile aina Izlaeli ukwifya.

²⁰ Ivintu vyuze vyonsi vino Zimuli wacisile, na ucisanguka uno wacisile, vyalembwa mu lupapulo lwa Milandu yakwe Yamwene aku Izlaeli.

Umwene Omuli waku Izlaeli

²¹ Lyene aina Izlaeli yankanikana pakasi mu mpuka ziili. Yamwi yaya ku lusansa lwakwe Tibini umwana umonsi wakwe Ginati kuti yamupyanike pa wene. Yamwi nayo yaya ku lusansa lwakwe Omuli kuti yamupyanike pa wene.

²² Lelo yao alondelanga Omuli yali na maka ukuluta yao alondelanga Tibini umwana umonsi wakwe Ginati. Avino Tibini wafwile, nga amupyana pa wene.

²³ Mu mwaka walenga amakumi yatatu na onga uwa kuteeka kwakwe Asa umwene waku Yuda, Omuli yamulasike pa cilimba ca wene wa Izlaeli, nga wateesile imyaka ikumi na iili. Ku Tiliza kwene wateesile imyaka mutanda.

²⁴ Wene wakazile umulundu wa Samaliya kuli Syemeli pa mpiya zyakwe siluva ukulingana amakilogalamu 6,000. Alino akuula umusumba pa mulundu ulya nga autemela ni zina ati a Samaliya, apakwiusizya kweneko Syemeli uwali umweneco wa mulundu uwa uno wakazile.

²⁵ Lelo Omuli wacisile iviipe pa manso yakwe Yawe nga ni viipe vino wene wacisile vyalusile vivyo ivyacisile yao amukolelile mu kuteeka.

²⁶ Wene walondelile imisango yonsi yakwe Yeloboamu umwana wakwe Nebati, nga nu mwi ifyo lino wene walenzile kuti aina Izlaeli yacite. Na pakucita cico, yene yalenzile Yawe, Leza wa ina Izlaeli kusoka, pamulandu wa kupepa tuluwi twao.

²⁷ Ivintu vyuze vyonsi vino Omuli wacisile, ni milimo yakwe yonsi nga na vino watukwite, vyalembwa mu lupapulo lwa Milandu yakwe Yamwene aku Izlaeli.

²⁸ Omuli afwa nga yamuzika mu Samaliya. Alino Aabu umwana wakwe umonsi amupyana pa cilimba ca wene.

Umwene Aabu waku Izlaeli

²⁹ Mu mwaka walenga amakumi yatatu na cinani uwa kuteeka kwakwe Asa umwene waku Yuda, Aabu umwana umonsi wakwe Omuli yamulasike uwene wa ina Izlaeli. Alino ateeka aina Izlaeli mu Samaliya imyaka amakumi yaili na iili.

³⁰ Aabu umwana umonsi wakwe Omuli wacisile iviipe navyuze nyanya pa manso yakwe Yawe ukuluta yamwene amukolelile ukuteeka.

³¹ Wene walondesyanga ukwifya ukuluta vino Yeloboamu wifizye. Acino wapitilizye ukwifya pakutwala Yezebele umwana umwanaci wakwe Etibaali umwene wa ina Sidoni, nu kutandika kupepa Baali.

³² Akuulila Baali kavuwa mu ng'anda ikulu yakwe Baali ino wakuuzile mu Samaliya.

³³ Alino mu ng'anda kwene iyo, Aabu aikamo unkolanya wakwe Asyela. Mu musango kwene uwo Aabu acita ivintu ivivule vyakulenga Yawe, Leza wa ina Izlaeli ukusoka, ukuluta pali vivyo ivyacisile Yamwene aku Izlaeli yonsi amukolelile.

³⁴ Mu manda ya kuteeka kwakwe Aabu, Hiyeli ukufuma ku Betele akuululula umusumba wa Yeliko. Lelo wakwe muno Yawe wavwanzile kupitila muli kasema Yoswa umwana umonsi wakwe Nuni, Abilamu, umwana umonsi iyeli lyakwe Hiyeli, wafwile lino wene wakuulanga umufula. Alino Segubu, uwali kasuli wakwe Hiyeli nawe wafwile lino wene wakuulanga impongolo zya musumba uo.