1 Yamwene 15 - Amazwi Yakwe Leza 2013

Umwene Abiya waku Yuda

¹ Mu mwaka walenga ikumi na cinani uwa kuteeka kwakwe Yeloboamu umwana umonsi wakwe Nebati, Abiya walasikwe pa cilimba ca wene waku Yuda.

² Wene wateesile mu Yelusalemu imyaka itatu. Nyina wali a Maaka umwana umwanaci wakwe Abusalomu.

³ Abiya wene wacisile amaifyo yonsi yano isi wacisile. Wene atali uwacumi kuli Yawe nu mwenzo onsi, ndi vino Davidi icikolwe cakwe cali.

⁴ Lelo pamulandu wakwe Davidi, Yawe wapile Abiya umwana, kuti ateeka mu Yelusalemu lino wene waca wafwa.

⁵ Cali vivyo pamulandu wakuti Davidi wacisile ivisuma pa manso yakwe Yawe, nupya mu manda yonsi ya umi wakwe wene atakanyile kuyela amalamulo yakwe, suka sile pamulandu onga sile wakwe Uliya umwina Hiti wilya.

⁶ Kwali nkondo pakasi kakwe Leoboamu na Yeloboamu mu manda yonsi ya umi wakwe Abiya.

⁷ Ivintu vyuze vyonsi vino Abiya wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

⁸ Lyene umwene Abiya afwa, nga yamuzika mwi lindi umwazisilwe icikolwe cakwe mu musumba wakwe Davidi. Alino Asa umwana wakwe umonsi amupyana pa cilimba ca wene.

Umwene Asa waku Yuda

⁹ Mu mwaka walenga amakumi yaili uwa kuteeka kwakwe Yeloboamu umwene waku Izlaeli, Asa yamulasike pa cilimba ca wene waku Yuda,

¹⁰ nga wateesile mu Yelusalemu imyaka amakumi yani na onga. Nyinakulu wali a Maaka, umwana umwanaci wakwe Abusalomu.

¹¹ Asa wacisile ivisuma pa manso yakwe Yawe, ndi vino Davidi icikolwe cakwe wacisile.

¹² Wene wafumizye yacizelele amu mpanga ilya nu konona utuluwi tonsi tuno isi wapanzile.

¹³ Wafumizye na nyinakulu kwene pa cifulo cakwe namwene, pamulandu wakuti wene wapanzile unkolanya wakwe Asyela. Alino Asa atamola unkolanya uo nu kuoca mu Cifoloma ca Kiduloni.

¹⁴ Nanti angala Asa atononyile ncende zino yapepelanga mwenemo, wene watwalilile kuya uwacumi kuli Yawe mu manda yonsi aumi wakwe.

¹⁵ Asa wisile siluva na zaabu mu Ng'anda ikulu yakwe Yawe nga ni viombelo vyonsi vino wene pali pamwi ni isi yavipiile kuli Yawe.

¹⁶ Kwali inkondo pakasi kakwe Asa na Baasya umwene waku Izlaeli mu manda yonsi autesi wao.

¹⁷ Baasya aya azanza impanga yakwe Yuda, nga atandika ukukuulilila ilinga ilikome ku musumba wa Lama pakuti alesyanye antu ukwingila nanti ukufuma kuli Asa umwene waku Yuda.

¹⁸ Lyene Asa atoola siluva wensi na zaabu wino wasile mu vipao vyamu Ng'anda ikulu ya Mwene nga nu mwisano lyakwe kololo. Alino avipeela ku yaomvi yakwe kuti yavitwale ku Damasiko kuli Beni Hadadi umwana umonsi wakwe Tabilimoni, nupya umwizikulu wakwe Hezioni, umwene waku Asilya, wino wateekanga ku Damasiko. Asa wayatumile na mazwi yaa akuti,

¹⁹ “Lekini tucite cipangano pakasi kakwe nene namwe, ndi vino tata wapangine na so. Lola, natinkutumila amawila yakwe siluva na zaabu. Wemo putula cipangano cino wacita pakasi kako na Baasya umwene waku Izlaeli pakuti afumye ivita vyakwe vya nkondo mu mpanga yane.”

²⁰ Beni Hadadi yazumilizyanya nu mwene Asa nga atuma yamusika akalamba ya vita vyakwe ku kuzanza imisumba yaku Izlaeli. Wene apoka ni misumba ii: Iyoni, Dani, Abeli Beti Maaka, nga ni ncende yonsi ya Kineleti kumwi ni mpanga yonsi yakwe Nafutali.

²¹ Lino Baasya uvwa vintu vii, ata kukuulilila ilinga lyamu Lama nga aya aikala ku Tiliza.

²² Lyene umwene Asa apeela ilamulo ku antu yonsi aku mpanga yaku Yuda, ukwaula kusya nanti wenga uwa munoyali, kuti yazwilizye ukusenda amawe ni miti ukufuma ku Lama, ino Baasya waomvizye pa kukuula ilinga lya musumba kuku kwene. Vikwene avili vino umwene Asa waile aomvya pa kukuula ilinga lya musumba wa Geba mu mpanga yakwe Benjamini, nga nu musumba wa Mizipa.

²³ Ivintu vyuze vyonsi vino Asa wacisile, na vyonsi vino watukwite, nga ni milimo yakwe yonsi kumwi ni misumba ino wakuuzile, vyalembwa mu lupapulo lwa Milandu yakwe Yamwene aku Yuda.

²⁴ Lyene umwene Asa afwa, nga yamuzika ku nzisi ya vikolwe vyakwe mu musumba wakwe Davidi. Alino Yeosafati umwana wakwe umonsi amupyana pa cilimba ca wene.

²⁵ Nadabu, umwana umonsi wakwe Yeloboamu yamulasike pa cilimba ca wene waku Izlaeli mu mwaka wakwe ciili uwa kuteeka kwakwe Asa umwene waku Yuda. Alino wateesile mu Izlaeli imyaka iili.

²⁶ Wene wifyanga pa manso yakwe Yawe, nu kulondela umu nzila zyakwe isi nu mu maifyo yakwe yano walenzile aina Izlaeli ukwifya.

²⁷ Acino Baasya umwana umonsi wakwe Aiya, uwamu mutundu wakwe Isakali, apanga ukukoma Nadabu. Lyene amukoma ku Gibetoni, umusumba wa ina Filisti, lilyo lino Nadabu na ina Izlaeli yonsi yala yakuzanza umusumba ulya.

²⁸ Baasya wakomile Nadabu mu mwaka wakwe citatu uwa kuteeka kwakwe Asa umwene waku Yuda nu kumupyana.

²⁹ Lilyo kwene lino watandika ukuteeka, akoma akazi kakwe Yeloboamu yonsi. Wene atasile nanti wenga umupuma, lelo wakomile yonsi pyu, wakwe muno Yawe wavwangile muli Aiya umwina Syilo.

³⁰ Vintu vii vyacitike pamulandu wa maifyo yakwe Yeloboamu yano walenzile na ina Izlaeli kwene ukwifya, nu kulenga kuti Yawe, Leza wa ina Izlaeli asoke.

³¹ Ivintu vyuze vyonsi vino Nadabu wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Izlaeli.

³² Kwali inkondo pakasi kakwe Asa umwene waku Yuda na Baasya umwene waku Izlaeli amanda yonsi ya umi wao.

Umwene Baasya waku Izlaeli

³³ Mu mwaka wakwe citatu uwa kuteeka kwakwe Asa umwene waku Yuda, Baasya umwana umonsi wakwe Aiya yamulasike pa wene wa Izlaeli mu Tiliza, nga wateesile imyaka amakumi yaili na ini.

³⁴ Wene wifyanga pa manso yakwe Yawe, nu kulondela imisango yakwe Yeloboamu nu kucita amaifyo yano walenzile na aina Izlaeli kwene ukwifya.