1 Yamwene 14 - Amazwi Yakwe Leza 2013

Imfwa ya mwana wakwe Yeloboamu

¹ Pa nsita kwene ilya Abiya umwana umonsi wakwe Yeloboamu alwala.

² Alino Yeloboamu anena umuci ati, “Ivulunganye mu milolekele, pakuti antu yatakulooka wa muci wakwe Yeloboamu. Alino uye ku Syilo, kuko ukuli kasema Aiya, wino wanenyile ukuti ndaya umwene wakuteeka antu yaa.

³ Usende ni mikate ikumi, na yakeke nga nu musazi wa uci, nga uye kuli aliwe. Ukamuzye ivilacitikila umwana witu umonsi, nga nawe amaya akakunene.”

⁴ Acino umuci wakwe Yeloboamu acita vino watamunena, nga aya ku ng'anda yakwe Aiya ku Syilo. Lyene Aiya wiyo atalolanga ningo, walolanga ciyeye pamulandu wakuti walanga watakota.

⁵ Lelo Yawe walanga watanena Aiya ati, “Lola umuci wakwe Yeloboamu akwiza kunuli kuti akuuzye ivikumile umwana wakwe umonsi, pamulandu wakuti umulwale. Nga nawe ukaasuke mangu wiyo vii na vii. Lino alafika, alacita kwati umuntu muze sile.”

⁶ Acino lino Aiya uvwa umutinti wakwe mangu wilya apa mulyango, avwanga ati, “Ingila. Nemo manyile ukuti wewe muci wakwe Yeloboamu. Uzye pacani cino ukuicita kwati wewe muntu muze sile? Nkukwatile amazwi aulanda.

⁷ Pita ukanene Yeloboamu uti vii avino Yawe, Leza wa ina Izlaeli wavwanga wati, ‘Nakusolwile ukufuma mu antu nupya inkulasika uwene pakasi ka antu yane aina Izlaeli.

⁸ Napokolwile uwene ukufuma ku amu mupanda wakwe Davidi nga imbupela kunuli. Lelo wemo utaali wa muomvi wane Davidi, wino wali uwacumi kunondi nu mwenzo wakwe onsi, uwayezile amalamulo yane, nu kucita sile vivyo ivikanzanzya.

⁹ Lelo wemo wacita iviipe kuluta yayo yonsi akukolelile ukuteeka. Wemo wamfutatila pakuipangila tuleza tuze, nu unkolanya wa vyela kuti wayapepa.

¹⁰ “‘Pamulandu wakwe cii, ndaleta uzanzo pa amu mupanda wako, we Yeloboamu. Ndonona umonsi wensi uwamu mupanda wako, umuzya nanti umuntungwa kwene. Ndalovya amu mupanda wako we Yeloboamu ndi vino umuntu akasisya citindi wensi pyu api yanza.

¹¹ Wensi uwamu mupanda wakwe Yeloboamu wino alafwila mu musumba, yasimbwa yalamulya. Wensi wino alafwila mu mutengo, amakozi yalamulya. Natimvwanga, ne Yawe.’”

¹² Nga Aiya atwalilila kunena umuci wakwe Yeloboamu ati, “Swilila ukwako nga zuwazuwa lino umaya ukingile mu musumba, umwana wako umonsi amafwa.

¹³ Aina Izlaeli yonsi yalamulosya nu kumuzika. Wene alaya umuntu wenga sile uwamu mupanda wakwe Yeloboamu wino alazikwa ningo, pamulandu wakuti wene wenga sile aliwe wazanzya Yawe, Leza wa ina Izlaeli.

¹⁴ Ukongezya pali cico, Yawe alaisolwela umwene wakuti ateeka aina Izlaeli, wino alalovya amu mupanda wakwe Yeloboamu. Ilelo uli wanda wakwe, uzye watezya?

¹⁵ Yawe alavunuka Izlaeli, nga nawe alapungaila wi tete lyamu luzi. Wene alafumya aina Izlaeli mu mpanga ii isuma ino wapile ivikolwe vyao nga ayasalanganyizizye ku mbalama yuze ya Luzi lwa Yufulate, pamulandu wakuti yene yalenzile Yawe ukusoka pakuipangila amaunkolanya yakwe Asyela, ka leza kanaci.

¹⁶ Acino Yawe alatazyela aina Izlaeli pamulandu wa maifyo yano Yeloboamu wacita, yaya kwene yano walenzile kuti na ina Izlaeli kwene yifye.”

¹⁷ Lyene umuci wakwe Yeloboamu akatuka nga afuma penepo aya ku Tiliza. Lilyo kwene lino wingila umu ng'anda yakwe, umwana wilya afwa.

¹⁸ Aina Izlaeli yamuzika, nga yamulosya wakwe muno Yawe wavwangile kupitila muli kasema Aiya.

Imfwa yakwe Yeloboamu

¹⁹ Ivintu vyuze vyonsi vino umwene Yeloboamu wacisile, inkondo zino walwisizye nga ni mitekele yakwe, vyalembwa mu lupapulo lwa Milandu yakwe Yamwene aku Izlaeli.

²⁰ Umwene Yeloboamu wateesile imyaka ikumi na iili. Alino afwa, nga yamuzika. Lyene Nadabu umwana wakwe umonsi amupyana pa cilimba ca wene.

Yeloboamu umwene waku Yuda

²¹ Leoboamu umwana umonsi wakwe Solomoni wali umwene waku Yuda. Wene wali ni myaka amakumi yani na onga lino watandike ukuteeka, nga wateesile imyaka ikumi na cinimbali mu Yelusalemu, umusumba uno Yawe wasolola pakasi ka mitundu yonsi yamu Izlaeli pakuti amuno yangamupepela. Nyina wali a Naama, umwina Amoni.

²² Mu manda kwene yalya antu amu Yuda yacisile iviipe pa manso yakwe Yawe. Apa kwifya kuno yifizye ukuluta vino ivikolwe vyao vyacisile, yene yalenzile Yawe ukuvwa uzuwa.

²³ Yene yaikuulile utuvuwa, ni vipilala vyamuzilo nga nu unkolanya wakwe Asyela pa ncende zyonsi zino yakapepela mwenemo nu mwisika ya visao vya miti.

²⁴ Icaipisye pali vyonsi vivyo, mu mpanga ilya mwazanwanga antu yamwi aonsi na anaci acitanga vyawinyi ndi vivi kwene ivyacitanga inko zino Yawe wazinzilemo pa manso ya ina Izlaeli.

²⁵ Mu mwaka wakwe cisano wa kuteeka kwa mwene Leoboamu, Syisyaki mwene waku Eguputo wazanzile umusumba wa Yelusalemu.

²⁶ Asenda ivyuma vyamu Ng'anda ikulu yakwe Yawe nga ni vyamwi sano, ukwikapo ni visyangu vyakwe zaabu vyonsi vino umwene Solomoni wapanzile.

²⁷ Acino umwene Leoboamu apanga ivisyangu vya mukuwa kuti apyanikizye pali vivyo nga avipela kuli yamusika yakwe yakalinda ali pa luti pa mpongolo yi sano.

²⁸ Insita yonsi lino umwene akuya ku Ng'anda ikulu yakwe Yawe, yakalinda yaya ale yasenzile visyangu. Nga yawela yavisezezya mu muputule wakwe yakalinda.

²⁹ Ivintu vyuze vyonsi vino Leoboamu wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

³⁰ Inkondo yatwalilile pakasi kakwe Leoboamu na Yeloboamu.

³¹ Lyene umwene Leoboamu afwa, nga yamuzika mu musumba wakwe Davidi ku nzisi ya vikolwe vyakwe. Nyina wali a Naama, uwamu mutundu wakwe Amoni. Alino Abiya umwana umonsi wakwe Leoboamu amupyana pa cilimba ca wene.