1 Yamwene 13 - Amazwi Yakwe Leza 2013

¹ Api lamulo lyakwe Yawe kasema wakwe Leza ukufuma ku mpanga ya Yuda aya ku Betele, nga afika kweneko ala Leoboamu aimi pipi lwapa kavuwa kuti apeele impolelwa.

² Alino apundilila kavuwa pa kusema amazwi yakwe Yawe, ati, “We kavuwa we, we kavuwa we! Yawe wavwanga wati, ‘Umwana umonsi uwi zina lyakwe Yosiya alavyalwa ku amu mupanda wakwe Davidi. Ali wino alakoma pali wewe yasimapepo yano yaya mu ncende zino yakapepela mwenemo utuluwi, yao yonsi yano yakapeela impolelwa pali wewe. Aloca na mafupa ya antu pali wewe.’”

³ Pa nsita kwene iyo kasema wakwe Leza apeela ni cimanyililo ati, “Mulolekesye kavuwa kaa, kamalepuka ni itwi lino lili penepo limasansantika.”

⁴ Lino umwene Yeloboamu uvwa vivyo vino kasema wakwe Yawe akupundilila kavuwa kaku Betele, afumya ikasa lyakwe pa kavuwa nga alikonzolola, nga avwanga ati, “Mulemini!” Lelo papo kwene ikasa lino umwene wasontela umuntu ilyuma, cakuti aposiwa nu kuliwezya.

⁵ Kavuwa nako pali pakulepuka, ni itwi ilisasantika uku kavuwa api zwi lyakwe Yawe wakwe vivi kwene muno kasema wakwe Leza wapelile icimanyililo.

⁶ Umwene nawe pali pakunena kasema wakwe Leza ati, “Mpapatila kweneko kuli Yawe Leza wako pakuti inje namaka akuwezya ikasa lyane.” Awe kasema wakwe Yawe amupapatila kuli Yawe ni kasa lyakwe liya vino lyali mpiti.

⁷ Alino umwene anena kasema wakwe Yawe ati, “Katwapita nani ukwane pakuti upemwile kweneko, nga naya kupela ni ca wila.”

⁸ Kasema wakwe Yawe nawe amwaasuka ati, “Nga cakuti wampile ing'anda yako apakasi, intange inje ukwako. Nsikulya icili consi nanti ukumwa amanzi kuno,

⁹ pamulandu wakuti Yawe wampile ilamulo ati, ‘Utaca ulye cakulya icili consi nanti ukumwa amanzi kweneko, nupya utakaswilile nu umu nzila ino wapisile mwenemo.’ ”

¹⁰ Acino kasema wilya apita nu mu nzila yuze, ukwaula kupita nu mu nzila ino wapisile mwenemo pakwiza ku Betele.

Kasema umukote waku Betele

¹¹ Pa nsita kwene ilya kwali kweneko kasema umwi umukote uwikalanga mu Betele. Ana yakwe aonsi yiza yamulandila vino kasema uwafumile ku Yuda wataiza acita mu Betele pa wanda ulya, nga na vino watanena umwene Yeloboamu.

¹² Nawe kasema umukote ali pakuuzya ana yakwe ati, “Uzye apisile umu nzila cii?” Nayo ali pakumusontelela umuseo.

¹³ Alino nawe anena ana yakwe ati, “Munyepe icikalilo pali punda.” Nayo iyamunyepela icikalilo pali punda, nga umukote wilya akwela penepo.

¹⁴ Alino alondelela kasema wilya wakwe Leza, mpaka aya amuzana wataikala umwisika lya cimuti cino yakati umuoko. Lyene amuuzya ati, “Uzye wewe uli kasema afumile ku Yuda?” Nawe aasuka ati, “Ee, anene kwene.”

¹⁵ Acino kasema wilya umukote ati, “Twende ukwane pakuti ukalye utwakulya tumwi tumwi.”

¹⁶ Lelo kasema wilya wakwe Leza avwanga ati, “Nemo ntange nje nawe ukwako, nupya ntange nzumile ukuti wewe uwansunga. Nemo ntange indye nanti ukumwa nawe,

¹⁷ pamulandu wakuti Yawe umweneco aliwe wankonkomizye ati, ‘Utaca ulye cakulya icili consi nanti ukumwa amanzi kweneko, nupya utakaswilile umu nzila ino wapisile mwenemo.’ ”

¹⁸ Alino kasema wilya umukote amunena ati, “Nani kwene nene kasema wakwe Yawe. Nga api lamulo lyakwe Yawe umungeli waliwanena wati, ‘Uwele nawe nanti iila lyonga ukwako, kuti akalye cakulya nu kumwa amanzi.’ ” Lelo kasema wilya umukote ala akutumpoka sile.

¹⁹ Awe mukwai kasema wakwe Leza aswilila mwenemo pamwi nawe ku ng'anda yakwe, aya alya icakulya nu kumwa amanzi kweneko.

²⁰ Lino yacili yakulya, Yawe alanda kuli kasema umukote wilya wino wawelulwisye umuze.

²¹ Alino nawe apundilila kasema wilya wakwe Yawe wino wafumile ku Yuda ati, “Yawe wavwanga wati, ‘Apakuntalamila kuno wantalamila, wakana ukuyela ilamulo lino Yawe Leza wako wakupile,

²² lelo waweluluka nu kwiza lya icakulya nu kumwa amanzi mu ncende ino ne Yawe nakulesizye, umafwa! Nupya yatalakuzika umu ncende ino yakazika mwenemo akazi kako.’ ”

²³ Lino yamala ukulya nu kumwa, kasema umukote anyepelela icikalilo pali punda wakwe kasema wilya waku Yuda.

²⁴ Lyene lino acili akuya, akomenkanya cisama mu museo nga cisama amukoma. Icala cakwe icilambalala mu museo, ala punda na cisama navyo ivimilila mu mbali yakweco.

²⁵ Antu yamwi apita nzila nayo yiza yapita penepo yalola icala cilambalile mu museo, ala cisama aimilile mu mbali yakweco. Alino yaya yalandila antu amu musumba muno kasema umukote akaikala, ivintu vino yaweni pa nzila.

²⁶ Lino kasema mukote wino wawelulwisye umuze ku nzila ilya, uvwa ivintu vivyo, avwanga ati, “Eya, ali kasema wakwe Leza wilya wino atayezile amazwi yakwe Yawe. Acili cino Yawe watamutumila cisama uwatamukoma, ndi vivi kwene vino Yawe wavwanzile.”

²⁷ Alino kasema umukote anena ana yakwe aonsi ati, “Nyepelini icikalilo pali punda.” Nayo iyacita vivyo kwene.

²⁸ Lyene apita, nga aya azana icala ca muntu wilya cilambalile mu museo, ala punda na cisama navyo ivimilila mu mbali yakweco. Cisama atalile icala nanti ukuzanzambila punda foo.

²⁹ Acino kasema umukote atoola icala cakwe kasema wakwe Leza, aciika pali punda, nga aciwezya ku musumba wa Betele kuti akuno yatekele indosya nu kucizika kuku kwene.

³⁰ Alino atoola icala aciika mwi lindi lya mwi cele lyakwe, nga aliwe pamwi na ana yakwe aonsi ala yakumulosya yakuti, “Owe mwinane, mwinane we!”

³¹ Lino yamala kuzika icala cakwe, kasema mukote ali pakunena ana yakwe aonsi ati, “Nga naca nafwa muce munzike umwi lindi umwi cele kwene lii muno twazika kasema wakwe Leza. Muce mulambalike icala cane pipi ni cala cakwe.

³² Pasi pano amazwi yonsi yano Yawe wanenyile kasema wi pamulandu na kavuwa kamu Betele, nga ni ncende zyonsi zyakupepela penepo zyamu misumba yonsi yamu Samaliya, ala umu cumi yali nu kufikiliziwa.”

Iifyo lyakwe Yeloboamu

³³ Pacisila ca milandu yonsi iyo, Yeloboamu umwene waku Izlaeli atatiile imisango yakwe iipe. Wene watwalilile ukwika na antu pali usimapepo apa ncende zino yakapepela mwenemo, yao atalinzile. Wensi wino umweneco watemwa amupeela usimapepo wa pa kavuwa.

³⁴ Imicitile iyo iya kwifya vivyo iyalenzile nu kuti akazi kakwe yononeke, yaye aipe. Nupya iyalenzile kuti yaloviwe pyu panonsi.