1 Yamwene 12 - Amazwi Yakwe Leza 2013

Imitundu ikumi yaku kaeya yasangukila Leoboamu

¹ Leoboamu aya ku Syekemu. Pasi pano aina Izlaeli yonsi yaile kweneko kuti yamuteke pa cilimba ca wene.

² Pa nsita kwene ilya Yeloboamu, umwana wakwe Nebati, walanga acili ku Eguputo, pano utwike umwene Solomoni. Lyene lino uvwa cintu cii caku wene, aweluluka ukufuma ku Eguputo.

³ Acino iyatuma akuya aama Yeloboamu, nga aliwe ni uvi lyonsi lya ina Izlaeli iyaya kuli Leoboamu, nga iyamunena yati,

⁴ “We! So watutesile uzya, uku kalili nu kutuletela ivisendo vinyome. Ali cino fwandi ndi cakuti wemo watwangusizya uwikalo nu kusisya ivisendo vinyome pa mitwe itu, awe cumi lyene tumakutumikilanga.”

⁵ Leoboamu nawe pali pakwasuka ati, “Tala pitangini nga muce muwele kunondi ndi papita amanda yatatu.” Acino antu yalya iyapita.

⁶ Lyene umwene Leoboamu auzya aikolo yano yatumikile isi Solomoni lino acili nu umi. Ayuzya ati, “Uzye umu nzila cii muno mungampanzyako amano ivya kwasuka antu yaa?”

⁷ Aikolo yaya nayo iyamwasuka yati, “Ndukasi watumikila antu yaa ningo, lyene ulinzile kuyacitila ivisuma vino yakulenga kuti ucite. Lyene yalakutumikila mu ufumacumi amanda pe.”

⁸ Lelo Leoboamu asuula umpandamano uno aikolo yalya yamupile nga aya auzya alumendo yamwi yano wakulanga nayo nupya amutumikilanga.

⁹ Ayuzya ati, “Yayame, uzye mwemo mukuti uli? Antu yamwi yatiyanguzya ukuti nangupazye ivisendo apa viye vyao, vino tata wayatwikanga. Uzye njasuke uli?”

¹⁰ Alumendo yano wakuzile pamwi nayo ali pakumwasuka yati, “Ukayaasuke ukuti, ‘Akantengezya akakwane katimba ukucila umusana wakwe tata.’

¹¹ Tata wamutwikanga ivisendo vinyome. Nemo ndavinyomya ukucila penepo. Tata wamunyambanga ni mikota. Lelo nemo ndamunyambola na yaswepu.”

¹² Lino papita amanda yatatu, Yeloboamu na antu yonsi yaswilila kuli Leoboamu, wakwe vino umwene wayanenyile ati, “Muce muwele ndi papita amanda yatatu.”

¹³ Umwene Leoboamu ayaasuka ukali ukali. Wene asuula umpandamano uno aikolo yamupile,

¹⁴ nu kulondela umpandamano wa alumendo nga avwanga ati, “Tata wamutwikanga ivisendo vinyome. Nemo ndavinyomya ukucila penepo. Tata wamunyambolanga ni mikota. Lelo nemo ndamunyambola na yaswepu.”

¹⁵ Icaleka umwene akana nu kulauvwa vino antu yakulanda, umulandu kwene uwakuti Yawe walondanga ukufikilizya cino Aiya waku Syilo wasesemile Yeloboamu umwana umonsi wakwe Nebati.

¹⁶ Lino antu yalola ukuti umwene Leoboamu wakana ukuti ayuvwe, nayo ali pakupunda yati, “Davidi na ang'anda yakwe kayaliyali. Uzye icani fwandi cino yatucitila? Mwe ina Izlaeli mwe sikatukini twapita kumwitu! Ata see! Mutini Leoboamu alali! Lyene we mwana wakwe Yese, nawe uilolele wemwisikulu pa akazi kako.” Acino aina Izlaeli iyakatuka nu kupita ku mang'anda yao.

¹⁷ Lelo iyasya Leoboamu wa mwene wa antu aikalanga umwapelela impanga yakwe Yuda.

¹⁸ Alino umwene Leoboamu atuma Adolamu, uwangalilanga antu aombanga umulaza ku mwene. Aina Izlaeli iyaya yamutama na mawe mpaka afwa. Apakulola vivyo umwene Leoboamu akalauka nu kuisumbila umwi celeta, apuukila ku Yelusalemu.

¹⁹ Ukutandikila papo kwene, ali pano aina Izlaeli, akaikala ku kaeya ki lanzi, ukufika na pilelo, yasangukile amu mupanda wakwe Davidi.

²⁰ Lino aina Izlaeli yuvwa ukuti Yeloboamu wawela ukufuma ku Eguputo, iyamwama kuno yakongine, ali wino yacita ukuya umwene wao. Amu mupanda wakwe Yuda ali yano yasile yakutontela uteko wakwe yao amu mupanda wakwe Davidi.

Usemo wakwe Syemaya

²¹ Lino Leoboamu wafika ku Yelusalemu, akonganika yanyela yatupu 180,000 avita vyakwe ivyamu mutundu wakwe Yuda na wakwe Benjamini, apakuti yaye yakalwe na ina Izlaeli aikalanga ku kaeya. Wene walondanga kuti awezye sile uwene wakwe.

²² Lelo Leza anena Syemaya, kasema wakwe, ati, “Nena

²³ Leoboamu umwana umonsi wakwe Solomoni, umwene waku Yuda, nga na antu yonsi amu mutundu wakwe Yuda na wakwe Benjamini uti,

²⁴ ‘Yawe wavwanga wati, cisi cakwezya ukuyalwisya aina Izlaeli yauzo. Mwensi swililini kumwinu, pano acisile icintu cii, anene.’ ” Nayo ali pakuvwa amazwi yakwe Yawe, nga yaswilila kumwao.

Yeloboamu wafutatila Yawe

²⁵ Lyene Yeloboamu akuula ilinga ku musumba wa Syekemu, mu mpanga ya myamba yakwe Efulemu, nga amuno watazile aikala. Lino wafumile mwenemo, watazile nupya aya akuula ilinga nalyuze ku musumba wa Peniwele.

²⁶ Yeloboamu pali pakwelenganya ati, “Uwene ulasuka ukaswilile ku luko lwakwe Davidi,

²⁷ ukumulandu wakuti antu ndi cakuti yatwalilila kutumbela ukuya ku Ng'anda ikulu yakwe Yawe ku kupepa nu kukupeela impolelwa, ale amano yao yalaswilila ku mwene wao Leoboamu, umwene waku Yuda. Lyene yalankoma nu kuswilila ku mwene Leoboamu.”

²⁸ Pacisila ca kwelenganya vivyo, umwene wilya ali pakupanga utwana twa ng'ombe twiili twakwe zaabu. Alino anena antu yakwe ati, “Palengela sana mwemo mwalamwaya ku Yelusalemu ku kupepa. Mwe ina Izlaeli mwe, ala tuleza twinu aetu, utwamufumizye mu mpanga ya Eguputo!”

²⁹ Alino Yeloboamu atoola akaluwi konga nga akiika mu Betele, na kauze akiika mu Dani.

³⁰ Papo kwene yalanga na antu yatandika ukwifya pakuya ku kupepa akaluwi ku Betele nu ku Dani.

³¹ Nupya Yeloboamu wiyo ali pa kukuula ni ncende zino yakapepela mwenemo papela ya mwamba asolola na yasimapepo atali amu mupanda wakwe Levi.

Kasema wakalipa pa mipepele yaku Betele

³² Alino Yeloboamu wateinye uzevyo pa wanda uwalenga ikumi na yasano mu mwezi wakwe cinani, ukulingana nu wanda uno yateinye ku Yuda, nga apeela ni mpolelwa pa kavuwa. Wacisile ivintu vii ku Betele, ala akupeela impolelwa ku twana twa ng'ombe utuluwi twakwe zaabu tuno wapanzile. Nupya ku Betele kuko aikako na yasimapepo akutumikila pa ncende zino yakapepela mwenemo zino wakuula.

³³ Alino pa wanda walenga ikumi na yasano mu mwezi wakwe cinani, umwezi uno umwisikulu wasolwile, Yeloboamu aya ku Betele nga apeela impolelwa pa kavuwa apa kuzevya uzevyo uno wateyanyizizye antu aina Izlaeli.