1 Yamwene 11 - Amazwi Yakwe Leza 2013

Aci yakwe Solomoni

¹ Umwene Solomoni watemilwe anaci avule ainamasi ukulunda pa mwana umwanaci wakwe Falao, na anaci aina Moabu, na ina Amoni, na ina Edomu, na ina Sidoni nga na ina Hiti.

² Anaci kwene yaya yali amu mitundu ino Yawe wanenyile aina Izlaeli ati, “Mutezya ukutwalizyanya nayo, pamulandu wakuti yene yangalenga aina Izlaeli ukupepa tuleza twao.” Lelo Solomoni atatiile ukutemwa anaci amu mitundu kwene iyo.

³ Solomoni watwite ya mama ana ya ene ukufika ku mpendwa ya myanda cinimbali. Alino kulunda penepo na aci yauze nayo imyanda itatu. Yene yamulenzile kuti avulungane.

⁴ Lino Solomoni wakota, aci yakwe yalesile kuti apepa tuleza tuze twakumwao. Wene watile nu koopa Yawe Leza wakwe ndi vino isi Davidi wacitanga.

⁵ Solomoni wiyo casuka camutwala ku kupepa Asyitaloti, kaleza kanaci ka ina Sidoni, na Moleki, kaleza ka winyi aka ina Amoni.

⁶ Solomoni wacitanga ivintu navyuze nyanya iviipe, pa manso yakwe Yawe. Wene atali uwacumi kunoli ndi vino isi Davidi wali.

⁷ Solomoni asuka akuula incende yakupepelapo papela ya mwamba lwaku ufumondaka wakwe Yelusalemu, apa kupepela Kemosyi, kaleza kaluwi ka ina Moabu. Alino na pakupepela Moleki, kaleza kaluwi ka ina Amoni.

⁸ Na aci yakwe ainamasi yonsi nayo kwene ayakuulila ncende zya kupepela penepo, apa kocela penepo nu ubani nu kupeela impolelwa zyao kuli tuleza twao.

⁹ Fwandi Yawe wasokile sana Solomoni, pamulandu wakuti umwenzo wakwe wafutatile Yawe Leza wa ina Izlaeli, wiyo uwamulolekile amaila yaili,

¹⁰ apa kumulesya nu kumukalipila palwa kupepa tuleza tuze, lelo wene ukwaula kucita vino Yawe wamunenyile.

¹¹ Nga alino Yawe anena Solomoni ati, “Fwandi vino wacita vii, wonona ukwitolo sile ulayo uno twalaine nawe, wasuula na masunde yane, nemo nalapa ukuti namapokolola uwene kunuli nu kuupela ku nkombe yako yonga.

¹² Nga lelo kwene apamulandu sile wakwe so Davidi, ntakucita cico pa nsita ino ucili ukufuta. Lelo ndacicita pa nsita ino umwana wako alaya pa wene.

¹³ Nanti cili vivyo, umwana wako wene ntalamupokolola uwene onsi, lelo ndamuzumilizya ukusyala nu mutundu onga auno ateeka. Nalyo kwene ndacita cico pamulandu sile wakwe so Davidi umuomvi wane alino na pamulandu wa musumba wa Yelusalemu, uno nasolola kuti uye uwakwane.”

Anisi yakwe Solomoni

¹⁴ Yawe Leza wakatusizye Solomoni umwanisi umwi umwina Edomu, wino izina lyakwe a Hadadi. Hadadi wiyo wali uwa kazi ka kuwene waku Edomu.

¹⁵ Mpiti lino Davidi walwisyanga aina Edomu, Yoabu musika mukalamba uwa vita, wino waile ku kuzika yao afwile, walanga watakoma aonsi nyanya amu Edomu.

¹⁶ Yoabu pamwi ni vita vyakwe yaile yikala kuku pa myezi mutanda, yasuka yakoma aonsi yonsi amu Edomu.

¹⁷ Lelo Hadadi apuukila ku Eguputo pamwi ni nkombe zimwi zya ina Edomu, zizyo izyatumike isi. Pa nsita iyo Hadadi wali umwana munono.

¹⁸ Lyene iyatenuka mu Midyani nga yaya ku Palani, nga yasenda aonsi yamwi kuku ku Palani, alino yaya ku Eguputo, ku mwene Falao. Falao apeela Hadadi na antu yakwe amang'anda ni mpanga ni vyakulya.

¹⁹ Lyene Hadadi azanzya Falao wakwe cimwi, cakuti Falao amutwalizya Tapenesi mulamu wakwe. Tapenesi wali umwina wa muci wa mwene Falao.

²⁰ Lyene umuci wakwe Hadadi amuvyalila umwana umonsi nga amutemela izina ati a Genubati, nga Tapenesi amukuzizya kwi sano kwene. Kuku kwene akuno Genubati aikala pamwi na ana yakwe Falao.

²¹ Walanga acili mu Eguputo, Hadadi auvwa ukuti Davidi wafwa, nu kuti Yoabu musika mukalamba uwa vita nawe kwene watafwa. Alino Hadadi anena Falao ati, “Nzumilizya mpite, kuti nswilile ku mpanga yakumwitu.”

²² Lelo Falao amunena ati, “Uzye icani cino uulizya kuno kumwitu icingalenga kuti uswilile ku mpanga yakumwinu?” Hadadi nawe aasuka umwene ati, “Awe kusi cimwi. Lelo nzumilizya sile mpite!”

²³ Yawe nawe aleka umwanisi namuze uwi zina lyakwe Lezoni, umwana umonsi wakwe Eliyada, kuti akatukile Solomoni. Lezoni walanga wapuuka Hadadezeli umusambazi wakwe, umwene waku Zoba.

²⁴ Muntu kwene wii wakonganike antu yamwi, nga aya intunguluzi yi umba lyakwe yacisanguka. Ivintu vii vyacitike lino Davidi ononyile ivita vyaku Zoba. Lyene Lezoni na yacisanguka yauze ali pakuya ku Damasiko, nga yikala kweneko, alino antu yayo yamulasika uwene kuti ateeka impanga ilya iya Asilya.

²⁵ Fwandi Lezoni yapusananga sana na ina Izlaeli apa nsita ino Solomoni acilipo, wakwe vino Hadadi wacitanga.

Ulayo wakwe Yawe kuli Yeloboamu

²⁶ Umuntu namuze uwakatukile umwene Solomoni wali a Yeloboamu, umwana wakwe Nebati uwamu mutundu wakwe Efulemu, waku Zeleda. Wali awenga uwamu nkombe zyakwe Solomoni, wino nyina wali a Zeluya, uwali mukamfwilwa.

²⁷ Umulandu wa usangu wakwe wali ndi vii: Solomoni wakuuzile ilinga lya Milo. Alino walimbanga namuno icimpinda cakwe isi Davidi cononike.

²⁸ Yeloboamu wali umulumendo umwi ipaka lya maka. Fwandi lino Solomoni walola kuno umulumendo akuombesya ali pakumupeela umulimo wakwangalila yonsi akwiza ku kuombela kwi sano, amu mutundu wakwe Yosefu.

²⁹ Wanda umwi lino Yeloboamu wafumanga mu Yelusalemu, ala ali pa ulendo, Aiya kasema waku Syilo amukomanya pa museo. Aiya ala azwite umwingila upya, alino yali yoili sile pa mpanga.

³⁰ Aiya ali pakuzula ilaya lipya lino wazwite nga alilepola mu tumpilinsya ikumi na twiili.

³¹ Alino anena Yeloboamu ati, “Wemo tola tumpilinsya ikumi, pano Yawe, Leza wa ina Izlaeli, watavwanga ati, ‘Lola, namapokolola uwene kuli Solomoni, nga namakupeela imitundu ikumi.

³² Solomoni namamusila umutundu onga, pamulandu wa muomvi wane Davidi, na pamulandu wa musumba wa Yelusalemu uno nasolola umu mitundu yonsi ya ina Izlaeli.

³³ Ndacita vivyo pamulandu wakuti Solomoni wiyo wamfutatila, atatandika nu kupepa Asyitaloti, kaleza kanaci ka ina Sidoni, na Kemosyi, kaleza kanaci ka ina Moabu, alino na Moleki, kaleza ka ina Amoni, Solomoni wata ukuntontela. Wene akucita ivintu vya winyi nupya asikusunga amasunde yane ni vyeo vyane wakwe vino isi Davidi wacitanga.

³⁴ Nga lelo Solomoni yasikumupokolola uwene onsi. Amaya pa wene mpaka amanda yonsi yano alikala pa wene pamulandu wakwe isi Davidi wino ne Yawe nasolwile, uwalondelanga amalamulo yane ni vyeo vyane.

³⁵ Ndapokolola uwene ku ana yakwe, alino wemo ndakupeela imitundu ikumi.

³⁶ Lelo umwana umonsi wakwe Solomoni ndamusila umutundu onga, pakuti lyonsi kwene ince nkwate umwi uwa mupanda wa muomvi wane Davidi, uwakuteeka mu Yelusalemu, umusumba uno nasolola kuti amuno yampepela.

³⁷ Fwandi wemo Yeloboamu, awewe namakucita umwene wa mpanga ya Izlaeli, nupya umateekanga kuli konsi kuno umwenzo wako ukasi.

³⁸ Ndi cakuti umayelanga vyonsi vino nkukupeela ilamulo, nu kupita umu nzila zyane, nu kucita vino nemo nkalonda, apa kusunga ivyeo na malamulo yane wakwe vino Davidi umuomvi wane wacitanga, lyene alino namayanga nawe insita yonsi. Alino ndakulasika pa wene wa Izlaeli, nupya ndaleka kuti aizikulu yako yateeka wakwe vino nacitile Davidi.

³⁹ Apamulandu wa vintu iviipe vino Solomoni watacita, ndacuzizyamo amu mupanda wakwe Davidi, lelo kwene asi lyonsi foo.’ ”

⁴⁰ Uli mulandu uno Solomoni alonda ukukoma Yeloboamu. Lelo Yeloboamu autukila ku Syisyaki ku Eguputo, nga akuno aikala mpaka ni mfwa yakwe Solomoni.

Imfwa yakwe Solomoni

⁴¹ Ivintu vyuze vyonsi vino Solomoni wacisile, ni milimo yakwe yonsi, na mano yano wakweti, vyalembwa mu lupapulo lwa Milandu yakwe Solomoni.

⁴² Solomoni wateesile aina Izlaeli yonsi pa myaka amakumi yani.

⁴³ Lyene umwene Solomoni afwa, nga yamuzika mwi lindi mu musumba wakwe Davidi isi. Alino Leoboamu umwana wakwe umonsi amupyana pa cilimba ca wene.