1 Yamwene 10 - Amazwi Yakwe Leza 2013

Namwene waku Syeba watandalila umwene Solomoni

¹ Lino namwene waku Syeba uvwa ululumbi lwakwe Solomoni pa kuya mu utandano na Yawe, aiza ku Yelusalemu ku kumwezya na mauzyo akome.

² Wene aiza na aomvi avule nga ni ngamila ale zisenzile ivinunkile, na zaabu umuvule wakwe cimwi, na mawe amutengo ukulu cuze. Lino wafika kuli Solomoni, amunena vyonsi ivyali ku mwenzo wakwe.

³ Solomoni aasuka amauzyo yakwe yonsi. Kutali cimwi icali icikome sana cino umwene waposiwe ukumulondolwela.

⁴ Namwene waku Syeba auvwa ivyali amano yakwe Solomoni nga alola ni ng'anda ilya ino wene wakuuzile.

⁵ Alola ni cakulya icali pi tebulo lyakwe, nu mukaikala yacilolo yakwe, na aomvi yakwe yano yamutumikilanga ale yazwite imingila, yakatumikila ya lwako lwakwe, na mawila akoca yano wapeezile pa kavuwa kakwe Yawe. Namwene wiyo aya kwati watafwa icipafi, amangala wakwe cimwi.

⁶ Namwene wiyo anena umwene Solomoni ati, “Impwelo ino nuvwile ala indi ku mpanga yane, iyapali wewe ni milimo yako nga na mano yako, ala fwandi iyacumi!

⁷ Lelo nemo ntataile ivintu vii suka sile lino niza nailolela na manso yane ntontonto. Lelo antu yatanenyile nanti a citika wa vintu vii. Amano yako we mwene nga ni vintu vino wakwata vilusile vino nuvwa.

⁸ Endi, antu yako alongo! Endi, yacilolo yako alongo, yano lyonsi yakaikala pipi na panuli nu kuvwa amano yako.

⁹ Alumbanyiwe Yawe Leza wako, wino wazangila munuli pa kukulasika apa wene mu Izlaeli. Pamulandu wakuti ukutemwa kwakwe ku ina Izlaeli ukwa manda pe, wene wakucita ukuya umwene wao pakuti wateeka mu ulungami nu wololoke.”

¹⁰ Alino apeela umwene zaabu ukulingana na makilogalamu 4,000, ni vyakununkizya ivyakulya vivule wakwe cimwi, nga na mawe amutengo ukulu cuze. Kutatazile kuletwe icipimo icikulu ca vyakununkizya ivyakulya icilusile cico cino namwene waku Syeba wapeezile umwene Solomoni.

¹¹ (Ivyombo vya mwene Hilamu navyo vyalesile zaabu ukufuma ku Ofili, nga kuku kwene akuno yaile iyasenda imilemo ivule iya alimugi na mawe amutengo cuze.

¹² Umwene waomvizye imilemo iya alimugi pa kupanga incesi izyakutungilila Ng'anda ikulu yakwe Yawe nga ni isano, nga nu kupangilako yababatoni na yabanjo yakwe yakiimba. Kutatala kwaletwa nupya nanti kuloleka imilemo isuma wakwe iyo mu Izlaeli ukufika napilelo kwene.)

¹³ Umwene Solomoni wapile namwene waku Syeba vyonsi vino wamulenzile, ukulunda pa mawila akuwene yano wamupezile. Alino namwene aswilila ku mpanga yakumwao pamwi na asukilizi yano wali nayo.

Vyuma vya mwene Solomoni

¹⁴ Cila mwaka umwene Solomoni wapokelelanga zaabu ukulingana na makilogalamu 23,000,

¹⁵ ukulunda pa misonko ino aculuzi yalipanga, nga nu muzano ukufuma mu uculuzi, nga na mawila yano yamwene aku Alabya na yacilolo amu mpanga ilya yaletanga.

¹⁶ Umwene Solomoni wapanzile ivisyangu imyanda iili ivikulu vyakwe zaabu musule. Cila cisyangu wacipomile zaabu ukulingana manye amakilogalamu cinimbali.

¹⁷ Wapanzile ni visyangu imyanda itatu ivinono vyakwe zaabu musule. Cila cisyangu yacipomile zaabu ukulingana manye kilogalamu wenga na citika. Umwene Solomoni aika ivisyangu vivyo mwi Sano lyamu Mutengo waku Lebanoni.

¹⁸ Lyene umwene apangisya icilimba ca wene. Imbali imwi iya cilimba cico yapangilwe na mino ya nzovu nga imbali iyasyala nayo aipomela na zaabu.

¹⁹ Icilimba ca wene cico cakweti amasitepu mutanda, nga ni cisamilo cakweco cali icizinguluke. Uku mbali zyoili izya cilimba cico kwali vyakulambalalikapo amakasa, nga nu unkolanya wakwe yacisama yaili ala yaimi pa mbali ya vyakulambalalikapo amakasa.

²⁰ Kwali kweneko ni vinkolanya ikumi na viili vyakwe cisama ala viimi pa masitepu yaya mutanda, conga uku lutwe lwakwe cila sitepu. Kutatazile kuzanwa icilimba camusango uu mu wene uze uli onsi.

²¹ Ingako zya mwene Solomoni zyonsi zyali izyakwe zaabu, nga ni viya vya mwi Sano lyamu Mutengo waku Lebanoni vyonsi vyali vyakwe zaabu musuma cuze. Kutali cimwi icipangwe na siluva, pamulandu wakuti siluva atali icintu cimwi icampomvu mu manda yakwe Solomoni.

²² Umwene wakweti ivyombo pali yemba ivyapitanga pamwi ni vyombo vyakwe Hilamu. Cila kupita kwa myaka itatu, vyene vyawelanga vila visenzile zaabu, siluva na mino ya nzovu, na yasokomuntu nga na matumbi.

²³ Umwene Solomoni wali umukama nupya uwamano wakwe cimwi ukuluta yamwene yauze umu nsi yonsi.

²⁴ Antu yonsi amu nsi yalondanga ukuya kuli Solomoni pakuti yamanye amano yano Leza wamupeela.

²⁵ Cila mwaka, umuntu wensi uwizanga kunoli wamuletelanga amawila. Amawila yayo yali akwe siluva na zaabu, nga ni mingila, ni vyanzo nga ni vyakununkizya ivyakulya, ni mfwalasi ni nyumbu.

²⁶ Acino Solomoni akwata amaceleta ni mfwalasi. Amaceleta yayo yali izimbi lyonga ni myanda ini (1,400), nga imfwalasi nazyo yali amazimbi ikumi na yaili (12,000). Vyonsi vii wavisile uku Yelusalemu nga nu mu misumba yuze ipusanepusane.

²⁷ Lino Solomoni wali pa wene, uwingi wakwe siluva mu Yelusalemu wali kwati insakalawe, ni mikelide nayo yavuzile kwati imisamvu yamu misana ya twamba.

²⁸ Solomoni wakazile imfwalasi ukufuma ku Eguputo nu ku Kue. Aculuzi ya mwene ali yano yakazile imfwalasi ukufuma ku Kue.

²⁹ Aculuzi yayo yakazile amaceleta ukufuma ku Eguputo, cila celeta pa mutengo wa mpiya zyakwe siluva ukulingana imyanda mutanda (600), nga cila mfwalasi pa mutengo wa mpiya zyakwe siluva ukulingana umwanda na makumi yasano (150). Aculuzi yakwe Solomoni yakazyanga ivintu vii kuli na yamwene ya ina Hiti na yamwene ya ina Asilya.