1 Timoti 6 - Amazwi Yakwe Leza 2013

¹ Azya yalinzile kucindika asambazi yao muli vyonsi, pakuti kutaya umwi uwakulandila zina lyakwe Leza nanti usambilizyo witu viipe.

² Azya yano asambazi yao aina Klistu yene yalusyepo kufuka kunoyali, pano yene aina yao. Yalinzile kuyatumikila ningo kuluta, pano yakutumikila asambazi nupya atemwikwa yao mu utailo. Ulinzile kusambilizya nu kukosola vintu vii.

Vya pamulandu wa usambilizyo waufi ni vyuma vyacumi

³ Wino wensi akasambilizya usambilizyo uiyele uno utasuntinkine na mazwi acumi a Mwene witu Yesu Klistu nga nu usambilizyo uwamu mipepele itu,

⁴ ale wene ali ni cilumba nupya atamanyile ningo cintu nanti cimwi. Umuvulungane mano nupya wene akalonda kupazyanya nu kulemanila pa mazwi. Cii cikaleta uzuwa, vikanza, intusi, kutunganya kwipe,

⁵ nga na lyonsi vikanza vikufuma ku antu yano myenzo yao isi ya mpomvu nupya yatakwata cumi. Yene yakaelenganya ukuti amapepo ili nzila yakuzanilamo ukama.

⁶ Endi, kupepa Leza kukalenga umuntu kuya mukama cikulu ndi wazumila ukuti vino akweti vyamulingana.

⁷ Uzye twalesile cani muno nsi? Nanti cimwi! Uzye icani cino tungasenda kufuma muno nsi? Nanti cimwi!

⁸ Caleka ndi tukweti vyakulya ni vyakuzwala, ale vikwene vyati vitulingana.

⁹ Lelo yao akulonda kuya akama yene yakaponela mu kweziwa nupya yalemwa mu citeyo ca vilondwa vya kutumpa nupya vya uzanzo. Vii vikayatwala ku kononeka, nu ku ulovyo.

¹⁰ Pano kutemwa impiya ili ntulo ya misango yonsi ya viipe. Yamwi akalondesya impiya yakasya inzila ya utailo nga nu kunyomeka myenzo yao na malanda aingi.

Kulwisya kusuma kwa utailo

¹¹ Lelo wemo, we muntu wakwe Leza, utakumako ku vintu vii vyonsi viipe. Uwaezya namaka kucita vyaololoke, ukuya wamuzilo, uwa utailo, kutemwa, kuposya, nga nu kufuka.

¹² Lwisya ulwi usuma wa kusunga utailo, kuti uilonkele umi wape. Pano ku umi uu akuno Leza wakwamile lilyo lino wemo kwaula kutwisika waizumilile utailo wako pa manso yakwe yakambone aingi.

¹³ Nkukupeela ilamulo pa manso yakwe Leza, wino akapeela umi ku vintu vyonsi, nga na pa manso yakwe Klistu Yesu, wino pakupeela umboni pa manso yakwe Pontio Pilato walanzile cumi cico. Nakunena ukuti

¹⁴ uyele vyonsi vino wanenyilwe nu kuya uwacumi kulivyo kufika na pa Wanda uno Yesu Klistu Mwene witu alaloleka nupya.

¹⁵ Klistu alaloleka pa nsita ino Leza wateyanya, Leza uwapolelelwa wenga sile ali kateeka. Wene Akateeka wakwe yakateeka nupya Mwene wakwe yamwene onsi.

¹⁶ Aliwe wenga sile asyafwa. Wene akaikala mu luswepo luno kusi nanti umwi angapalamako. Kusi nanti umwi uwatala walola Leza. Kusi nanti umwi angamulola. Kunoli kupelwe mucinzi nu utesi wape! Ameni.

¹⁷ Uwanena akama mu vintu vyamu nsi kuti yataitumika, nupya yatapaalila mu vyuma vino vitakwata uyo, suka muli Leza. Wene kwaula lusoko akatupeela vintu vyonsi ivyakutuzanzya.

¹⁸ Uwayanena kuti yacita visuma, nu kuya akama mu milimo isuma, nu kupeela kwaula lusoko, yaye aiteyanye kwankanyako yauze.

¹⁹ Mu musango uu amuno yene yalaitulikila cuma cino cilaya wa mufula ukome uwa manda akwiza, kuti lyene yakapelwe umi wape uwa cumi.

Mazwi yakusyalikizya

²⁰ We Timoti usunge ningo vintu vino walasikwa. Utakumako ku mazwi a cilandelande nga ni vikanza vyakutumpa vino antu yamwi mukuluvyanya kwao yakati, “Ukumanya.”

²¹ Pano yamwi yakati yakweti ukumanya kuu. Lelo pa kutaila muvwango uu yene yaponzya utailo. Cikuku cakwe Leza ciye namwe mwensi.