1 Timoti 5 - Amazwi Yakwe Leza 2013

¹ Utakalipila wikolo, lelo umupapate kwati aso. Wacitila alumendo ndi vino ungacitila anyonko alumendo.

² Vivyo kwene wacitila anaci aikolo ndi vino ungacitila nyoko. Akazyana nao wayacitila kwati a kaci yako, nu mwenzo usuma.

³ Uwacindika nu kwazwa yamukamfwilwa asi na yakazwilizya.

⁴ Lelo ndi cakuti mukamfwilwa wakwata ana nanti aizikulu, nkolelo ana yakwe yalinzile kusambilila ivyakwazwa amu ng'anda yao koopa Leza. Mu kucita cii amuno akwasi ni vikolwe yangawezya maka yao. Pano cii, cikazanzya Leza.

⁵ Mukamfwilwa wino uwaikalila, nupya atakwata umwi uwakumusunga, wene wika upaalilo wakwe muli Leza nupya akapepa usiku nu musanya kuti Leza amwazwa.

⁶ Lelo mukamfwilwa wino uwaipela mu vyakuizanzya ala wene wafwa akupita.

⁷ Uwayatungulula kuti kutaya umwi uwakuyatunga kayi.

⁸ Lelo ndi cakuti umwi asyasakamala akazi kakwe, maka maka amu ng'anda yakwe, ala wene wakana utailo nupya umwipisye kuluta wiyo atataila.

⁹ Mukamfwilwa wakupendelwa ku kwazwa awiyo ali ni myaka yakuvyalwa kuluta pa makumi mutanda, uwali uwa cumi kuli iya wakwe

¹⁰ nupya uwamanyikwa mu kuomba milimo isuma, kukuzya ana yakwe ningo, kusunga aenyi mu ng'anda yakwe, kutumikila aina Klistu yauze mu ufuke, kwazwa antu ali mu ntazi, nu kuipelesya kucita visuma.

¹¹ Lelo utapendelako yamukamfwilwa akazyana. Wakana kuyalemba mwi umba lilyo, pano yacililonda kutwalwa yangapulolwa ni vya nsi nu kufutatila Klistu.

¹² Kukwene ukuluvyanya pano yatakusunga ulayo wao wankolelo.

¹³ Nupya yakasumba insita zyao mu kuzeya ku ng'anda ni ng'anda. Lelo icaipisya kuluta cakuti yene yakucita ukwakwa ni cinduvyanya, yala yakulanda vintu vitalinzile kulandwa.

¹⁴ Acino nemo ningatemwa ukuti yamukamfwilwa acili akazyana, yatwalwe, yavyala ana, yasunga mang'anda yao ningo, pakuti yataleka anisi itu yalanda viipe pali sweswe.

¹⁵ Pano yamukamfwilwa yamwi yafutatila Klistu mpiti kuti yalondele Ciwa.

¹⁶ Lelo ndu mwanaci umwina Klistu umwi akweti yamukamfwilwa mu ng'anda yakwe, wene alinzile kuyasunga nu kuntiika cisendo cii pi uvi, pakuti iuvi nalyo lisunge yamukamfwilwa asi na kazwilizya.

¹⁷ Aikolo yano akaomba mulimo usuma uwa kutungulula iuvi yene yalinzile kulipilwa, maka maka yao akaombesya mu kukosola nu mukusambilizya yalinzile kupelwa malipilo lili kuluta.

¹⁸ Pano malembelo yakati, “Utanyepa cipambasi mulomo lino ukumuomvya kuti alyatole ingano pakupuula” nga “Muomvi nawe alinzile kupelwa malipilo yakwe.”

¹⁹ Utauvwa ku muntu akulongwela wikolo wi uvi suka ndi pali antu yaili nanti yatatu akuzumilizya vino cumi wikolo waponga.

²⁰ Wakalipila apaswe yao yonsi akaifya, pakuti asyala yuvwe intete.

²¹ Pa manso yakwe Leza na Klistu Yesu, nga na angeli yamuzilo nkukonkomezya wewe kuti uyele vyonsi vino nakutungulula kwaula kuya ni vikanza nanti kuwila kuli umwi muli vyonsi vino ukucita.

²² Utakalauka kwika makasa yako pa muntu umwi kuti umusolole atumikila Mwene. Utakumako ku maifyo ya antu yauze. Lelo wemo funtuka ku kukowela konsi.

²³ Utamwa sile manzi, lelo uwamwa na waini munono kuti akwazwe munda, pano lili lingi wemo ukalwala.

²⁴ Maifyo ya antu yamwi yakaloleka paswe, nupya maifyo yao yakakolela lino kupingulwa kwao kutali kufike. Lelo maifyo yakwe yamwi yene yakaloleka pacisila.

²⁵ Mu musango uli onga milimo isuma ikaloleka paswe, nga na iyo itangaloleka paswe nayo itangafiswa.