1 Timoti 3 - Amazwi Yakwe Leza 2013

¹ Kulanda kuu ukwa cumi. Muntu ndi akulondesya kuya intunguluzi yamwi uvi, ala wene akulonda mulimo uwa mpomvu cuze.

² Intunguluzi yamwi uvi italinzile kutungwa kayi. Wene alinzile kukwata muci wenga sile, nu kuya mutekele, wa mano, wa mucinzi, akasunga aenyi ningo mu ng'anda yakwe. Wene alinzile kuya mukampuke ku kusambilizya.

³ Wene atalinzile kuya mukolesi nanti walwete. Lelo alinzile kuya mufuke nupya asilemanizya antu. Wene atalinzile kutemwa impiya.

⁴ Wene alinzile kusunga amu ng'anda yakwe ningo nga nu kulolekesya ukuti ana yakwe yaye akuyela nupya amucinzi.

⁵ Ndi cakuti wene atamanyile vya kusunga amu ng'anda yakwe ningo, uzye lyene angasunga uli iuvi lyakwe Leza?

⁶ Wene alinzile kuya umuntu uwalengela mu utailo, pakuti ataitumika aye ni cilumba nu kuvunukwa ndi vino cacitikile Ciwa.

⁷ Intunguluzi ilinzile kuya umuntu wino wacindikwa na antu asi amwi uvi, pakuti wene atazewana nu kuponela mu citeyo cakwe Ciwa.

Antu angalinga kuya Yadikoni

⁸ Yadikoni amwi uvi nao kwene yalinzile kukwata mwata usuma nupya usi nu usomvi. Yene yatalinzile kuya akolesi nanti kuya nu lwiswa lwa mpiya.

⁹ Yene yalinzile kukwata mano asuma nga nu kwemelela kuli vino Leza watusokolwela vya pa utailo witu.

¹⁰ Nkolelo yene yalinzile kweziwa nu kusininkiziwa. Ndi cazanwa ukuti kusi kutwisika ku mazina yao, lyene yangaomba.

¹¹ Aci yao nao kwene yalinzile kukwata mwata usuma nupya yatalinzile kuya akwakwa. Yene yatalinzile kukuma ku ukolesi nupya yalinzile kuya acumi muli vyonsi vino yakucita.

¹² Dikoni wamwi uvi alinzile kukwata muci wenga sile, alinzile kusunga ana na amu ng'anda yakwe ningo.

¹³ Yadikoni yano akaomba milimo ningo yasyakwata mpwelo ziipe nupya yakalanda nu kupama pa utailo wao muli Klistu Yesu.

Nkama ikulu ya upefi witu

¹⁴ Lino nkukulembela kalata wii, nkupaalila kwiza kulola zuwa.

¹⁵ Lelo ndi cakuti ningacelwa kwiza, ale mazwi amuli kalata wii yalakumanyisya vino micitile itu mwi uvi ilinzile kuya. Antu amu ng'anda yakwe Leza lili uvi lyakwe Leza wa umi kwene, nupya yene yakoline wa lupanda mu kutungilila iuvi.

¹⁶ Pasi umuntu nanti umwi angapazya ukulu wa nkama ya upefi witu ino ikati, Klistu walolike mu untu, Mupasi Wamuzilo wapile umboni pali aliwe ukuti wene umololoke, nupya walolike ku angeli. Wene yamukosozile mu nko zyonsi, antu yamutaile mu nsi yonsi, nga wene wasenzilwe kwiyulu mu lulumbi.