1 Timoti 2 - Amazwi Yakwe Leza 2013

¹ Cankolelo pali vyonsi, nkulenga ukuti kuye mapepo akupepela antu onsi. Mapepo yaye akupapata, ukulenga, nu kutaizya Leza.

² Mwapepela yakateeka ni ntunguluzi zyonsi, kuti swensi twaikala umi usi wa cimvulunganya nupya uwa mutende, twalumbanya Leza pali vyonsi mukutekela.

³ Vii ivisuma nupya vikazanzya Leza Katuula witu,

⁴ wino akalonda umuntu wensi kuti atuulwe nu kumanya cumi.

⁵ Pano kwaya Leza wenga sile, nga kwaya nu wakukundanya wenga sile pakasi kakwe Leza na antu. Muntu wiyo a Klistu Yesu.

⁶ Wene waipile kuti akulule antu onsi. Cii cali icisininkizyo pa nsita ilingane ukuti Leza akalonda umuntu wensi atuulwe.

⁷ Acino wene wantumile kuya mutumwa nupya kasambilizya wa Akulukuwa, kuti nakosola ilandwe ilya kulenga antu yataile cumi. Nemo nsyakutumpoka. Lelo nkulanda cumi!

⁸ Mu kutumikila mwi uvi lyonsi nkulonda kuti aonsi aipeelesya kuli Leza yapepa, yala yakukatusya makasa yao kwaula kusoka nanti vikanza.

⁹ Na anaci kwene nkulonda kuti yazwala vizwalo vya mucinzi, vya mano nupya vilingine kuzwala. Yene yatalinzile kuiyemvya ni misango yakuluka inyele nanti kuzwala tuyembelo tuno twapangwa kuli zaabu nanti mbela yamutengo, nanti vizwalo vyamutengo ukome.

¹⁰ Lelo yene yalinzile kucita vintu visuma vilingine ni vicitwa vya anaci akayela Leza.

¹¹ Anaci lino yakusambilila yalinzile kwikala cele nu kutezya mu ufuke.

¹² Nemo nsyakuyazumilizya kusambilizya nanti kuya na maka pa onsi. Yene yalinzile kwikala cele.

¹³ Pano Adamu uwa umvilwe nkolelo yakwe Eva.

¹⁴ Nupya Adamu atasomvilwe. Umwanaci uwa somvilwe, nupya aliwe atayezile sunde lyakwe Leza.

¹⁵ Lelo mwanaci wene alatuulwa kupitila mu kuvyala ana, cikulu atwalilile kuya uwakutailwa, akatemwa auze, uwamuzilo, nupya wino waicefya.