1 Tesalonika 5 - Amazwi Yakwe Leza 2013

¹ Inane, citakulondekwa kuti mulembele pamulandu wa kasita nanti Wanda lino vii vyonsi vilacitika.

² Mweisikulu mwamanya ningo ukuti Wanda lino Mwene aliza ulaya kwati kwiza kwa mwivi usiku.

³ Lino antu yalelenganya ukuti vyonsi vili ningo nupya mu mutende, alino lyene ulovyo ulayaponela mu kupumikizya. Wene ulayaponela wa kunyunguluka kwa mwanaci wino ali mu umbuza. Nupya yene yatalutuka.

⁴ Lelo mwe inane, mwemo musi mu mfinzi, nga wanda uwo utalinzile kumupumikizya wa mwivi.

⁵ Mwensi kwene mwemwe antu amu luswepo nupya mukapita musanya. Swemo tusi antu yano yakapita mu usiku nanti mu mfinzi.

⁶ Caleka lyene, swemo tutalinzile kukasula wa antu yauze. Tulinzile kulola nu kupempula.

⁷ Antu yakakasula usiku, nupya akolesi yakakoleka usiku.

⁸ Lelo swemo sweswe antu amu luswepo, nupya tutalinzile kukoleka. Tulinzile kukwata utailo nu kutemwa kuno kukoline wa cela ca kucingilila cisao. Alino upaalilo witu uwa kutuulwa nao ulinzile kukolana wa cimpompo.

⁹ Leza atasolola kutuvunuka, lelo wene wasolola kuti Klistu Mwene witu atutuule.

¹⁰ Klistu watufwilile, pakuti tungikala pamwi nawe nanti angala tulaya afwe nanti apuma pa kwiza kwakwe.

¹¹ Acino mwakomelezyanya nu kwazwana, wakwe vino ndakai mukucita.

Mazwi yakusyalikizya

¹² Tukumupapata mwe ina itu, kuti mwacindika yao akaomba pakasi kinu, yano akamutungulula muli vino mulinzile kwikala wa ina Klistu.

¹³ Kunoyali mwalanga mucinzi nga nu kutemwa kukulu kuluta pamulandu wa mulimo uno yakaomba. Mwaikala mutende pakasi kinu.

¹⁴ Mwe ina itu, tukumukonkomezya kusokela akasu, kukomelezya yacantete, kwazwa atonte, nga nu kutekelela antu onsi.

¹⁵ Mwasakamala ukuntacitilana cilanduzi. Lelo nsita zyonsi mulinzile kukwata simwililo lya kucita cisuma kuli cila wenga nga nu ku antu onsi.

¹⁶ Muye nu luzango lyonsi,

¹⁷ pepini nsita zyonsi,

¹⁸ nupya mwataizya Leza muli vyonsi. Vii avino Leza akalonda kuti mwacita mu umi winu muli Klistu Yesu.

¹⁹ Mutalesyanya kuomba kwakwe Mupasi Wamuzilo.

²⁰ Mutasuula usemo.

²¹ Mwaezya vintu vyonsi, musolole visuma,

²² leukini viipe vya misango yonsi.

²³ Leza wino akapeela mutende, amucite kuya amuzilo umu nzila zyonsi. Nupya aliwe asunge myenzo inu, mipasi nga ni mili inu, kuti muce muye antungwa ku ndema zyonsi pa kwiza kwa Mwene witu Yesu Klistu.

²⁴ Wiyo uwamwama wene ali nu kucita cii, pano wene watailwa.

²⁵ Mwe ina itu, naswe kwene mwatupepelako.

²⁶ Mulamuke ataila yonsi mu kutonsolana kwa wina.

²⁷ Mwi zina lya Mwene nemo nkumukonkomezya kuti muwelenge kalata wii, kuli yonsi ataila.

²⁸ Cikuku ca Mwene witu Yesu Klistu ciye namwe.