1 Tesalonika 4 - Amazwi Yakwe Leza 2013

¹ Pa kumalila, mwe ina itu, mwemo mwasambilile kunotuli pali vino mulinzile kwikala pakuti muzanzye Leza. Endi, vivyo kwene avino mukaikala. Lyene ndakai mwi zina lya Mwene Yesu tukumupapata nu kumukonkomezya kucita cili conga nu kuluta.

² Pano mumanyile utunguluzi uno twamupile ku maka ya Mwene Yesu.

³ Leza akulonda kuti muye amuzilo nupya antungwa cuze kufuma ku ulongozyo.

⁴ Umonsi wensi alinzile kumanya vino angikala nu muci wakwe muli umuzilo kwaula kumuzewanya.

⁵ Mutaya azya ku mbunu zinu nanti kwikala wa antu atataila.

⁶ Pamulandu wakwe cii, kutaya umwi uwakuluvyanya ku mwina Klistu muze nanti kuomvya usomvi kunoli. Nkolelo twamunenyile, nupya twamusoka ukuti Mwene alavunuka yao akacita vivyo.

⁷ Leza atatwama kuti twacita vya winyi, lelo watwama kuti tuye amuzilo.

⁸ Caleka wino wensi uwakana usambilizyo uu ala wene asyakukana umuntu, lelo akukana Leza, wino akamupeela Mupasi wakwe Wamuzilo.

⁹ Citakulondekwa kumulembela pakutemwa kuno mwe muno mwataila mulinzile kutemwana. Mweisikulu Leza wamusambilizya vino mulinzile kutemwana.

¹⁰ Endi, mwemo mwati mulanga mpiti kutemwa ku ina itu yonsi amu Makedoniya. Caleka, ina itu, tukumupapata kuti mucite cii nu kuluta.

¹¹ Lekini simwililo linu liye ilya kwikala kwaula vyongo, muye akusakamala milimo inu, nu kuombesya ndi vino twamunenyile nkolelo.

¹² Lyene mulacindikwa na antu yano atataila, nupya mutalalonda uwazwilizyo kufuma ku muntu ali wensi.

Kwiza kwa Mwene

¹³ Mwe ina itu, tukulonda kuti mumanye cumi pamulandu wakwe yao afwa, kuti mutaya nu ulanda, wa antu asi nu upaalilo.

¹⁴ Swemo twataila ukuti Yesu wafwile nga nupya wazyukwike. Caleka twataila ukuti cilaya cili cimwi kwene na kuli yao afwa nu utailo muli Yesu. Leza alayazyukula nu kayaleta pamwi na Yesu.

¹⁵ Kusambilizya kwa Mwene witu Yesu kwakuti, swe muno tucili aumi tutalakolelela yao afwa.

¹⁶ Kulaya kulaizya ilamulo, kuvwika kwi zwi lya mungeli mukulu, ciunda ca ntandala yakwe Leza, nga Mwene umwisikulu aliika kufuma mwiyulu. Yao afwile nu utailo muli Klistu yalazyukuka nkolelo yaye nu umi.

¹⁷ Lyene swemo, swe muno tulaya aumi pa nsita ilya, tulasendwa pamwi nao mwiyulu mupela mu makumbi ku kukomanya Mwene. Alino kufuma pa nsita ilya tulaya pamwi nu Mwene lyonsi pe.

¹⁸ Caleka, lyene mwakomelezyanya mu mazwi yaa.