1 Tesalonika 3 - Amazwi Yakwe Leza 2013

¹ Caleka, swemo twaposiwe kulolela. Acino twelenginye kwikala swenga mu Atena,

² nu kutuma Timoti mwina witu kunomuli. Wene pamwi naswe akatumikila Leza pa kukosola Ilandwe Lisuma lya pali Klistu. Twamutumile kwiza mukomelezya nga nu kukomya utailo winu,

³ pakuti kutaya nanti umwi wakunenuka pamulandu wa kuzunyiwa kuu. Mweisikulu mumanyile ukuti Leza uwazumilizye kuti tuzunyiwe mu musango kwene uu.

⁴ Pano walanga tucili pali pamwi namwe, swemo twamunenyile nkolelo ukuti tuli nu kuzunyiwa, nupya ndi vino mumanyile, vikwene avino cacitike.

⁵ Uli mulandu uno natumile Timoti. Naposiwe kulolela. Caleka namutumile kuti aiize alondelezye nu kumanya ningo vya pa utailo winu. Cumi kwene nemo napaalile ukuti Ciwa atatunsile mwemwe nu kulenga mulimo witu kuya uwasilesile.

⁶ Ndakai Timoti wataweluluka, nupya watatunena vya pa utailo winu nu kutemwa kwinu. Wene watunenyile ukuti mwemo lyonsi mukatwelenganya ningo nga nu kuti mukalondesya kutulola, wakwe vino naswe tukalondesya kumulola.

⁷ Caleka, inane, mu ntazi nga nu mu ucuzi witu onsi, swemo twakomeleziwe nu utailo winu.

⁸ Pasi pano mu cumi tuli nu umi ndi cakuti mwemo mwimilila ndii mu umi winu mu Mwene.

⁹ Ndakai tungataizya Leza witu pamulandu winu. Tukutaizya Leza pa manso yakwe pa luzango luno tukweti pamulandu winu.

¹⁰ Musanya nu usiku mu cumi tukapepa kuti tuce tulole mwemwe nu kumwazwilizya kukomya utailo winu kuluta.

¹¹ Tukulenga kuti Leza Tata nu Mwene Yesu Klistu yaleke tuce twize kunomuli.

¹² Lekini Mwene avuzye kutemwa kuno mwatemwana, nga nu kutemwa antu yauze, ndi vino wavuzya kutemwa kwitu kunomuli.

¹³ Mu musango ndi uu, wene alamukomelezya, nga namwe mulaya afumaluke nupya amuzilo pa manso yakwe Leza Tata, lilyo lino Mwene witu Yesu aliiza nupya pamwi na akwakwe yonsi amuzilo.