1 Tesalonika 1 - Amazwi Yakwe Leza 2013

¹ Kalata kufuma kuli ne Paulo na Siluvano na Timoti. Ku antu amwi uvi lyaku Tesalonika, antu yakwe Leza Tata nu Mwene Yesu Klistu. Cikuku cakwe Leza nu mutende viye kunomuli.

Umi nu utailo wa ina Tesalonika

² Swemo tukatwalilila kutaizya Leza pamulandu winu mwensi nu kutaka Mwene lyonsi mu mapepo itu.

³ Pano tukaiusya kunena Leza Tata pa utailo winu nu mulimo uwa kutemwa nga na pa upaalilo winu ukome mu Mwene Yesu Klistu.

⁴ Mwe ina itu, twamanya vino Leza wamutemwa nupya umwisikulu wamusolwile kuti muye antu yakwe.

⁵ Pano lino twamuletile Ilandwe Lisuma, asi ku mazwi sile. Lelo nu ku maka nu kusininkizya kwa cumi caliko, kufuma kuli Mupasi Wamuzilo. Mwamanya vino twikalanga lino twali namwe. Cacitike pakuti tumwazwe.

⁶ Acino, lino mwazumile ilandwe, mwemo mwakolinye sweswe nu Mwene mu micitile. Mwacuzile, lelo Mupasi Wamuzilo wamusansamusyanga.

⁷ Mwizile muya cilangililo ca alondezi ya Mwene amu Makedoniya nu mu Akaya.

⁸ Pamulandu winu, Ilandwe lya Mwene lyasalangana konsikonsi mu Makedoniya nu mu Akaya. Ndakai mpwelo ya pa utailo winu muli Leza yuvwika konsi mu nsi. Acino lyene tutakweti cimwi ca kulanda pamulandu wakwelyo.

⁹ Antu yaya yonsi yakulanda pa kuzengela kuno mwatuzengile, nga na vino mwazenzwike ku kupepa tuluwi nu kutandika kutumikila Leza wa cumi nupya uwa umi.

¹⁰ Nupya yakalanda pa kulolela kuno mukalolela Yesu Mwana wakwe kuti aiize kufuma mwiyulu. Leza wamuzyukwile kufuma ku afwe, nga pa wanda wa upinguzi Yesu alatutuula ku ukali wakwe Leza ukwiza.