1 Samueli 9 - Amazwi Yakwe Leza 2013

Saulo wakomenkanya Samueli

¹ Kwali umuntu umwi umukama uwamanyikwe sana. Izina lyakwe wali a Kisyi umwana wakwe Abiyeli, umwana wakwe Zeloli, umwana wakwe Bekolati, umwana wakwe Afiya uwaku mpanga yakwe Benjamini.

² Kisyi wakweti umwana umonsi wino yatemile izina iyati a Saulo. Saulo wali umulumendo umwi umuyembe sana cakuti mu ina Izlaeli kusi uwamulusizye ukuzipa. Wene wali umuntu umwi umusolopoke. Nupya wali umutali ukuluta yonsi.

³ Uwanda umwi yapunda yakwe Kisyi yamwi walanga yatiyaluluka, nga Kisyi anena Saulo umwana wakwe umonsi ati, “Senda umuomvi umwi mupite nawe pakuti mufume mukulondola yapunda kuno yaile.”

⁴ Nayo iyapita ku mpanga yakwe Efulemu, impanga iya myamba nga nu ku ncende izingulwike Syalisya. Lelo yatayazanyile. Alino iyapitilila suka iyafika ku Syaalimu, lelo nako kwene yatazanyile yapunda.

⁵ Lino yafika umu mpanga yaku Zufi, Saulo anena umuomvi wino yali nawe ati, “Twapita sile tuswilile ku musumba, pano limwi tata amata ukwelenganya pali yapunda nga atandike ukwelenganya pali sweswe.”

⁶ Lelo umuomvi wakwe amunena ati, “Pembela panono! Mu musumba uu mwaya umuntu wakwe Leza wino antu yacindika sana pamulandu wakuti consi cino walanda cikafikiliziwa. Leka tukamulole. Limwi wene angatunena ukungazanwa yapunda.”

⁷ Saulo pali pakunena umuomvi wakwe ati, “Ndi cakuti twaya kunoli, uzye icani cino tumaya tukamupeele? Umu nyambi zintu musi nanti ivyakulya. Tutakweti nanti uwila uwa kumupeela. Uzye twatitukwata vino tungamupeela.”

⁸ Umuomvi wilya aasuka ati, “Lola! Nemo nkweti kakowili kakwe siluva akanono. Namaya nkamupeele pakuti angayalanga kuno yapunda yangazanwa.”

⁹ (Umu Izlaeli, umu manda yalya acisila, lino umuntu umwi akulonda ukulondelezya cimwi ku cazwilizyo cakwe Yawe, alinzile wavwanga wati, “Katwapita tukalole kuli kalola,” pamulandu wakuti ndakai tukaama kalola ituti kasema.)

¹⁰ Saulo nawe anena umuomvi wakwe ati, “Cisuma, katwapita.” Acino iyatenuka yaya ku musumba kuno umuntu wamuzilo wikalanga.

¹¹ Lino yakutumbela umulundu ukuya mu musumba, iyakomenkanya akazyana yamwi aizanga ku kusemba amanzi. Alino iyayuzya iyati, “Uzye kalola angazanwa kuno?”

¹² Akazyana nayo iyaasuka iyati, “Amuno ali. Ali pankolelo inu, mupitisye sile. Ali lino wali wacifika mu musumba pamulandu wakuti ilelo kwene lii ali lino antu yamapeela impolelwa pa kavuwa pa mwamba.

¹³ Lino mumaingila mu musumba mumamuzana ale atacili aye pa kavuwa pa mwamba ku kulya. Antu yatangatandika ukulya lino wene atacili waya kweneko, pano wene alinzile apolelele impolelwa lino yao amilwe yatali yalye. Fwandi pitini mutumbele umwamba, nga mumaya mukamuzane likwene.”

¹⁴ Acino nayo iyatumbela iyaya mu musumba. Nga lino yacili ingila mwenemo, iyalola Samueli akwiza ulunga na alio ale akutumbela umwamba ukuya ku kavuwa.

¹⁵ Fwandi uwanda uwalondelilepo lino Saulo atali afike, Yawe asokolwela Samueli icintu ci ati,

¹⁶ “Mutondo pa kasita kwene ndi kaka kwene ndakutumila umuntu umwi uwamu mpanga yakwe Benjamini. Ali wino wemo ukasonte ukuya umwene wa antu yane aina Izlaeli. Wene alakulula antu yane ku makasa ya ina Filisti. Nemo natindola ukucula kwa antu yane, pano nuvwa mpiti inkuta yao.”

¹⁷ Lino Samueli walola Saulo, Yawe amunena ati, “Wikwene ali muntu wino nakunenyile. Wene alateeka antu yane.”

¹⁸ Lyene Saulo apalama kuli Samueli pa mpongolo ya musumba nga amuuzya ati, “Mukwai inkuuzya ing'anda yakwe kalola, uzye iyelile kwi?”

¹⁹ Samueli nawe amwaasuka ati, “Ali nene kwene. Ndokwa, kolela ku kavuwa, pano ilelo kwene umalya pamwi nani nga akatondo ndakuta uwapita nupya ndakunena vyonsi ivili mu mwenzo wako.

²⁰ Utasakamala pali yapunda yano mwaponzya pa manda yaa yatatu. Yene yaloleka. Uzye umwine wa wila uno aina Izlaeli yaifima aweni? Uwila uu uwakwako na ang'anda yakwe so yonsi.”

²¹ Saulo nawe aasuka ati, “Lelo nemo nene uwa mutundu wakwe Benjamini, umutundu uwasyalikila sana pa mitundu ya ina Izlaeli nga luko lwane ululi luko ulunono ukuluta pa nko zya ina Benjamini. Uzye apacani mwanenela amazwi amusango ndi uu?”

²² Lyene Samueli pali pakusenda Saulo pamwi nu muomvi wakwe, nu kuyasezya umwakuliila. Ayapeela ni ncende icindamisye pa antu yonsi yano yamilwe, yao angafika nu ku mpendwa ya makumi yatatu.

²³ Samueli pali pakunena keeleka ati, “Leta umupusa wa nyama uno nalinakunena ukwika pa mbali.”

²⁴ Acino keeleka nawe pali pakuleta umwendo onsi kumwi nu musana nga awika inkolelo yakwe Saulo. Samueli avwanga ati, “Vii, avili vino yaliyakwikila. Toola sile uwalya. Wewe yaliyasungila kuti wize ulile pamwi na yayo alalikwe pa nsita kwene ii.” Alino Saulo iyalya iciviya conga na Samueli uwanda ulya kwene.

²⁵ Pacisila lino yafuma pa kavuwa nu kutentemukila ku musumba, iyanzila Saulo api paala ilipapatane lya ng'anda yakwe.

²⁶ Iyakatuka pa macaca nga Samueli aama Saulo api paala lili ilipapatane, amunena ati, “Zyuka uiteyanye. Nkulonda inkupakasye uwapita.” Awe mukwai Saulo nawe akatuka, nga aliwe na Samueli iyakolezyanya iyafumila ukunzi.

Samueli wapaka Saulo amafuta nu kumulasika utesi

²⁷ Lino yafika ku mpelelekezyo ya musumba, Samueli anena Saulo ati, “Nena umuomvi wako kuti atukolelele. Lelo wemo utale ulolele pano panono, pakuti nkunene amazwi yano Yawe watavwanga.” Umuomvi wilya nawe acita vivi kwene.