1 Samueli 8 - Amazwi Yakwe Leza 2013

Antu yalenga ukukwata umwene

¹ Walanga Samueli wakota, wasonsile ana yakwe aonsi kuti alio yangaya yakapingula pakasi ka ina Izlaeli.

² Izina lya mwana wakwe uwi yeli a Yowelo nga ni zina lya mwana wakwe cikonka iyeli a Abiya, nga yatumikilanga wakwe yakapingula ku Belisyeba.

³ Lelo yene yatatozile imiyele yakwe isi. Yene yalondelile sile ukupanga ulupiya. Avili vino yapokelelanga amafukakanwa nu kuipingula ukwaula ukulondela icisinka.

⁴ Icalenzile intunguluzi zya ina Izlaeli ukukomenkana pakuyalola Samueli ku Lama.

⁵ Intunguluzi zizi ziya zimunena ziti, “Lola, wemo watukota, alino na ana yako yasikulondela intampulo zyako. Solola umwene uwakuti atutungulula, wakwe vino aingi amu mpanga zyuze yakweti.”

⁶ Lelo Samueli atatemilwe ukulenga kwao awe, ukwakukwata umwene. Acino wene apepa kuli Yawe.

⁷ Nawe Yawe amunena ati, “Uvwikisye ningo vyonsi vino antu yakukunena. Asi awewe yakanyile ukuya umwene wao, lelo anene nemuno yatiyakana ukuya umwene wao.

⁸ Ukutandikila sile pa wanda uno nayafumizye umu mpanga ya Eguputo, yene yantaluka nu kusenukila ku kupepa tuleza tuze. Na pilelo kwene avili vino yacita kuli wewe.

⁹ Ali cino fwandi wemo ule uyuvwe sile. Lelo kwene ulinzile ukuyasoka nu kuyanenela calimwi vino umwene wao alacita kunoyali.”

¹⁰ Samueli nawe alondolwela antu alondanga uwa kuyateeka amazwi yonsi yano Yawe amunenyile.

¹¹ Ayanena ati, “Vii avili vino umwene wino alamuteeka alacita kunomuli. Wene alatola ana inu aonsi nu kuyacita asilika ya nkondo, akupisya amaceleta na akupita pa mfwalasi, nu kusimula pa nkolelo ya maceleta yakwe.

¹² Yamwi nayo alayalasika ukuya yamusika akalamba ampuka ya vita amazimbi na ampuka amakumi yasano, nga na yamwi alayapeela umulimo wa kulima ivyalo nu kuzombola ivyakulya vyakwe. Nga nayauze alayapeela umulimo wakupanga ivyanzo nga ni viombelo vya maceleta yakwe.

¹³ Ana inu anaci nayo alayatola kuti yamwengela amafuta acinunu cisuma nu kumwelekela nu kumupangila imikate.

¹⁴ Alatola ivyalo vinu ivisuma ukuluta, ni vyalo vya matingi, nu tupukutu twa miolivi, nga avipele ku yaomvi yakwe.

¹⁵ Alatola icikumi pali cila vilyo vinu nu kuvipeela kuli yamusika yakwe nu ku yaomvi yakwe amwi sano.

¹⁶ Alamupoka aomvi inu aonsi na anaci kwene nga ni ng'ombe zinu izisuma ukuluta kumwi na yapunda nu kuvileka vyaombela aliwe wenga sile.

¹⁷ Alatola icikumi pa mfwele zinu ni mbuzi, nga namwe kwene mweisikulu mulaya azya yakwe.

¹⁸ Lino uwanda ulya uliza, mulalilila ku mwene wino mwasolola kuti amwazwe, nga Yawe nawe atalamwasuka.”

¹⁹ Lelo antu iyakana ukutezya vino Samueli walandanga. Yene yavwanga iyati, “Awe! Swemo tukulonda umwene uwakututeeka.

²⁰ Lyene tulakolana na antu amu nko zyuze, tule tukweti umwene uwa kututungulula nupya uwa kutukolelela ku kulwa inkondo zitu.”

²¹ Lino Samueli uvwa vyonsi vino antu yavwanga, anena Yawe

²² nga Yawe nawe avwanga ati, “Ule utezye sile kuli vino yakulanda nu kuyapeela umwene.” Alino Samueli anena aina Izlaeli antu, “Cila muntu aswilile ku musumba wa kumwao.”