1 Samueli 7 - Amazwi Yakwe Leza 2013

¹ Caleka aina Kilyati Yealimu yiiza yasenda Mbokosi ya Upangano yakwe Yawe. Iyaitwala ku ng'anda yakwe Abinadabu pa mwamba. Alino iyapaatula Eleaza umwana wakwe umonsi kuti asunga Mbokosi ya Upangano yakwe Yawe.

Samueli wacimvya aina Filisti ku Mizipa

² Mbokosi ya Upangano yakwe Yawe yatenzi ku Kilyati Yealimu pa nsita itali sana. Yamazile kweneko imyaka amakumi yaili. Umu nsita kwene ilya aina Izlaeli iyalilila kuli Yawe kuti ayazwe.

³ Samueli anena aina Izlaeli ati, “Ndi cakuti mwawelela kuli Yawe ni myenzo inu yonsi, fwandi mulinzile ukusumba tuleza twa inamasi na maunkolanya yakwe tuleza twa inamasi na yakwe Asyitaloti. Muipelesye sile kuli Yawe wenga mpo, awino mwatumikila. Nawe alamutuula ku maka ya ina Filisti.”

⁴ Acino aina Izlaeli iyasumba maunkolanya yao yakwe Baali na yakwe Asyitaloti, nu kutandika ukupepa sile Yawe.

⁵ Lyene Samueli aama aina Izlaeli yonsi ku kwiza kongana ku Mizipa, ayanena ati, “Namamupapatila kuli Yawe kuku kwene.”

⁶ Acino yonsi kwene iyakongana ku Mizipa. Alino iyatapa amanzi nu kwitila wa wila uwapeelwa kuli Yawe. Lyene iyata nu kulya pa wanda ulya onsi. Iyavwanga iyati, “Twatitwifya kuli Yawe.” (Fwandi ku Mizipa kwene kuli kuno Samueli wapingwililanga aina Izlaeli.)

⁷ Lino aina Filisti yuvwa ukuti aina Izlaeli yatiyakongana ku Mizipa, yamwene yasano ya ina Filisti iyakatuka na antu yao ku kuyazanza. Lino aina Izlaeli nayo yuvwa vivyo, iyuvwa intete pamulandu wa ina Filisti.

⁸ Alino iyanena Samueli iyati, “Ule utwalilile ukupepa kuli Yawe Leza witu kuti atutuule ku ina Filisti.”

⁹ Samueli atoola akana ka mfwele akafyula nga aocela Yawe konsi pyu wa wila wakoca. Lyene apepa kuli Yawe kuti azwilizye aina Izlaeli, nga Yawe nawe aasuka ipepo lyakwe.

¹⁰ Lino Samueli wapeelanga uwila wakocela Yawe, aina Filisti nayo iyaya pa nkolelo ku kuzanza aina Izlaeli. Lelo pa kasita kaka kwene alino Yawe atuma ukupangalansya ku kalamba sana, cakuti aina Filisti iyavulungana, iyatandika nu kusimula cisimule simule.

¹¹ Aina Izlaeli nayo pali pakuyazinga kufika nu ku Beti Kali.

¹² Lyene Samueli atoola iwe nga alisimpa pakasi kakwe Mizipa na Syeni. Alitemela ni zina lyakuti Ebenezeli, nga avwanga ati, “Avino ukufika na paa Yawe uwatatwazwa.”

¹³ Acino aina Filisti yacimviwe nupya yatatazile iyaswilizya ukuzanza umu mpanga ya aina Izlaeli mu manda yonsi ya umi wakwe Samueli.

¹⁴ Ni misumba yonsi ino aina Filisti yaposile ku ina Izlaeli, ino yaya pakasi kakwe Ekiloni na Gati, yaweziwe ku ina Izlaeli. Fwandi lyene avili vino aina Izlaeli yakulwile impanga yao yonsi, nga ikuya umutende pakasi kao na ina Amoli.

¹⁵ Samueli watwalilile ukuteeka aina Izlaeli mu manda yonsi ya umi wakwe.

¹⁶ Cila mwaka wayanga ku Betele, nga afuma kweneko aya ku Giligali nu ku Mizipa, ala akupingwila aina Izlaeli imilandu umu ncende zizi zyonsi.

¹⁷ Alino lyene aswilila ukwakwe ku Lama, kuno nako kwene watumikilanga wakwe kapingula. Ku Lama kwene akuli kuno Samueli wakuulile Yawe kavuwa.