1 Samueli 6 - Amazwi Yakwe Leza 2013

Aina Filisti yaswilizya Mbokosi ya Upangano ku Izlaeli

¹ Lino Mbokosi ya Upangano yakwe Yawe yatenzi mu mpanga ya ina Filisti pa myezi cinimbali,

² aina Filisti iyama yasimapepo yao pamwi na yakasema nu kuyuzya iyati, “Uzye tungacita uli pa Mbokosi ya Upangano yakwe Yawe? Tunenini vino tungacita apakuiswilizya kuno yafuma.”

³ Nayo iyaasuka iyati, “Ndi cakuti mwaswilizya Mbokosi ya Upangano yakwe Leza wa ina Izlaeli, ale lyene mutaiswilizya sile minwe. Lelo apakuiswilizya mulinzile mwika penepo nu wila wa cizumila mulandu uwa kulipa kuli Leza wa ina Izlaeli. Lyene ali lino mulapoziwa nu kumanya icalenga kuti Yawe atata ukumuvunuka.”

⁴ Aina Filisti nayo iyuzya iyati, “Uzye fwandi uwila ci uwa cizumila mulandu uno tungamutumila?” Nayo iyaasuka iyati, “Utumawe tusano twakwe zaabu utukoline ni vipute nga natuze tusano utukoline na yakuza. Mukavilinganye ni mpendwa ya ntunguluzi zya ina Filisti, pamulandu wakuti icilumbelo icili cimwi kwene caponiile pali mwemwe na pa ntunguluzi zinu kwene.

⁵ Mulinzile mwapanga unkolanya wa vipute na wakwe yakuza yano yakonona impanga, nga mucite umucinzi kuli Leza wa ina Izlaeli. Kusuka manye wata ukumucuzya nu kucuzya tuleza twinu kumwi ni mpanga inu.

⁶ Uzye pacani cino mukukomya imyenzo inu wakwe vino aina Eguputo na Falao kwene yacisile? Ale lyene mutale mulole, nanti wene wayacuzizye iciipisye, uzye yene yatatile aina Izlaeli kuti yapita?

⁷ “Ali cino fwandi teyanyini icikocikala icipya. Muteyanye na yanyinang'ombe yaili akonsya nupya yano yatatala yazwikwa iyoko. Munyepelele yanyinang'ombe ku cikocikala, lelo musende ana yao nu kuyayalila muno yakasungwa.

⁸ Alino musende Mbokosi ya Upangano yakwe Yawe nu kuyika mu cikocikala. Lyene mwike amawila yakwe zaabu, yano mukumutumila wa wila wa cizumila mulandu, mu mbokosi yuze nga muyike mupipi ni Mbokosi ya Upangano yakwe Yawe. Alino lyene muleke icikocikala cipite conga.

⁹ Lelo musumbeko amano nu kulola. Ndi cakuti icikocikala cici calungama ku musumba wa Beti Syemesyi, ale lyene Yawe watatuponyezya uzanzo uu ukulu. Lelo ndi cakuti citalungime kweneko, ale lyene tumamanya ukuti asi aliwe uwatuponyesizye uzanzo. Lelo cali sile wa mankomenkanya.”

¹⁰ Acino iyacita vivyo. Iyatoola ing'ombe ziili nu kuzinyepela icikocikala nga iyayalila nu twana twa ng'ombe umu citata.

¹¹ Alino yika Mbokosi ya Upangano yakwe Yawe umu cikocikala pamwi ni mbokosi umwali unkolanya wakwe yakuza yakwe zaabu nu wa vipute.

¹² Lyene ing'ombe zizi izilungama ku Beti Syemesyi, izisonta sile papa kwene nupya zila zikulila nzila yonsi. Zyene zitapetukile nanti kuze. Intunguluzi zya ina Filisti nazyo zila zilondelile ukufika nu ku mupaka wa Beti Syemesyi.

¹³ Aina Beti Syemesyi yasinzanga ingano zyao umu cifoloma. Lino yasanzula amanso iyalola Mbokosi ya Upangano. Awe lyene pasi paluzango apakuilola.

¹⁴ Icikocikala pali pakulungama ku calo cakwe Yoswa uwaku Beti Syemesyi, nga icimilila kuku kwene umu mbali ya ciliwe icikulu. Antu pali pakulepola imbao zya cikocikala nu kufyula ing'ombe zizi yapeela uwila wakocela Yawe.

¹⁵ Aina Levi nayo yisya Mbokosi ya Upangano yakwe Yawe, kumwi ni mbokosi umwali ivintu vivi vyakwe zaabu. Alino yika imbokosi zizi pa ciliwe icikulu. Pa wanda ulya aina Beti Syemesyi yapeela amawila yakoca ni mpolelwa zyuze kuli Yawe.

¹⁶ Intunguluzi zizi zisano zya ina Filisti izilolekesya ivintu vii vyonsi nga iziswilila ku Ekiloni uwanda kwene ulya.

¹⁷ Amaunkolanya ya vipute yakwe zaabu yano aina Filisti yatumile wa wila wa cizumila mulandu kuli Yawe yali ukulingana ni misumba yao, onga uwa musumba wa Asyidodi, uze uwa musumba wa Gaza, uze uwa musumba wa Asyikeloni, uze uwa musumba wa Gati nga na uze uwa musumba wa Ekiloni.

¹⁸ Yene yatumile na maunkolanya yakwe yakuza yakwe zaabu ukulingana ni mpendwa ya misumba ya ntunguluzi zisano zizi zya ina Filisti, ino yakweti amalinga kumwi ni mizi yakweyo. Iciliwe cici icikulu pano yisile Mbokosi ya Upangano yakwe Yawe, cicili papa kwene mu calo cakwe Yoswa waku Beti Syemesyi, kuti ciye wakwe kambone pali vino vyacitike.

¹⁹ Yawe wakomile aonsi yamwi aina Beti Syemesyi amakumi cinimbali, pamulandu wakuti yene yasungamile mu Mbokosi ya Upangano yakwe Yawe. Fwandi antu pali pakulosya pamulandu wakuti Yawe wakomile antu aingi sana munoyali.

Mbokosi ya Upangano yasendwa ku Kilyati Yealimu

²⁰ Acino aonsi aku Beti Syemesyi iyuzya iyati, “Uzye aweni angimilila pa manso yakwe Yawe, Leza kwene wi uwamuzilo? Uzye akuli weni kuno tumatuma Mbokosi ya Upangano, pakuti afuntuke kunotuli?”

²¹ Lyene iyatuma inkombe ku ina Kilyati Yealimu, iyati, “Aina Filisti yatiyawezya Mbokosi ya Upangano yakwe Yawe. Acino tentemukilini kuno mwize muisende ku mwinu kuko.”