1 Samueli 31 - Amazwi Yakwe Leza 2013

Imfwa yakwe Saulo na Ana yakwe

¹ Aina Filisti iyalwa inkondo na ina Izlaeli. Aina Izlaeli iyutuka ukufuma kunoyali, nga na ingi iyakomwa pa Mwamba wa Giliboa.

² Aina Filisti iyacocovya Saulo na ana yakwe, nga Yonatani, na Abinadabu, na Malikisyua, ali ana yakwe Saulo, yakomilwe.

³ Inkondo yatalile Saulo wakwe cimwi, nga lino yao ali na maulapwa yamuzana iyamucisa icikalale.

⁴ Alino Saulo anena umusenda mpamba wakwe ati, “Somola ulupanga lwako untote sile imfwe ukuluta kuti iviyantu vii ivitamanya Leza vize mu kunseka nga vinkome.” Umusenda mpamba nawe pali pakukana sana, pano wali ni ntete izya kucita cico. Acino Saulo pali pakutoola ulupanga lwakwe apona penepo aitota nga afwa.

⁵ Lino umusenda mpamba walola ukuti Saulo wafwa, nawe kwene apona pa lupanga lwakwe aitota afwa pamwi na aliwe.

⁶ Fwandi vivyo vili vino Saulo na ana yakwe yatatu nu musenda mpamba wakwe nga na antu yakwe yafwile uwanda uli umwi kwene.

⁷ Lino aina Izlaeli ali ku lusansa luze ulwa cifoloma nga na yao ali ku mbalama yuze iya Luzi lwa Yodani yalola ukuti aina Izlaeli yauze yapuuka nu kuti Saulo pamwi na ana yakwe yatiyafwa, awe nayo kwene pali pakusama umu mizi yao. Aina Filisti ayano yiiza yapyanikila mwenemo iyaikala.

⁸ Uwanda uwalondelela, lino aina Filisti yiiza ku kupeketa ivyala, iyazana Saulo na ana yakwe yatatu yalambalile pa Mwamba wa Giliboa ala yatiyafwa.

⁹ Iyaputula umutwe wakwe Saulo nu kumuzula ivyanzo vyakwe. Alino lyene iyatuma inkombe umu mpanga yao yonsi ku kusalanganya ilyasi lisuma kuli tuleza twao utuluwi nu ku antu yao yonsi.

¹⁰ Alino lyene iyakoweka ivyanzo vyao mu ng'anda ikulu yakwe Asyitaloti leza wao, nu kupampamila icala cakwe ku lung'umba lwa Beti Syani.

¹¹ Lino aina Yabesyi Gileadi yuvwa vino aina Filisti yatiyacita kuli Saulo,

¹² awe mukwai ikufuma antu yaposye apakasi kao nu kululyata usiku onsi mpaka ukuyafika ku Beti Syani. Iyaya iyasamula icala cakwe Saulo kumwi ni vyala vya ana yakwe nga iyaviwezya ku Yabesyi, akuno iyavizika.

¹³ Alino iyatola amafupa yao iyayazika umwisika lya cimuti icikaamwa ukuti tamalisiki mu musumba kwene ulya uwa Yabesyi, nga iyaizilizya ukulya pa manda cinimbali.