1 Samueli 30 - Amazwi Yakwe Leza 2013

Davidi wacimvya aina Amaleke

¹ Davidi na antu yakwe yaile iyafika ku Zikilagi pa wanda uwalenga yatatu. Pa nsita ilya walanga aina Amaleke yatiyazanza incende ya Negebu nu musumba wa Zikilagi. Yene yosile umusumba wa Zikilagi nu

² kusenda anaci yonsi nga na antu yonsi ali mwenemo, ance na akote kwene. Yatakomile nanti wenga pali yayo, lelo yayasenzile pa kupita.

³ Lino Davidi na antu yakwe yafika ku musumba wa Zikilagi, iyazana ukuti umusumba ulya watiupya nga na ana yao aonsi na anaci kwene yatiyayalema nu kuyasenda.

⁴ Acino Davidi na antu yakwe iyalila nu kupooma wakwe cimwi mpaka amazwi yao iyakoma.

⁵ Aci yakwe Davidi yoili yalemilwe, Ainoamu uwaku Yezileele na Abigelo, mukamfwilwa wilya uwaku Nabali uwaku Kalimeli.

⁶ Davidi wali umu ntazi ikulu sana, pamulandu wakuti antu yakwe yonsi imyenzo yali iwaye pa kuponzya ana na aci yao. Iyatandika nu kupanga kuti yakomole Davidi na mawe. Lelo Yawe Leza wakwe amupa ukuposya.

⁷ Alino Davidi anena simapepo Abyata umwana wakwe Aimeleki ati, “Ndetele cakuzwala ca efodi.” Abyata nawe amuletela icakuzwala cici.

⁸ Davidi auzya Yawe ati, “Uzye incocovye azanzi yaa? Uzye namaya nkayazane?” Yawe nawe amwaasuka ati, “Yacocovye, nga umaya ukayazane nu kupokolola antu yonsi pyu.”

⁹ Davidi pali pakukatuka na antu yakwe imyanda mutanda, iyasuka iyafika ku Luzi lwa Besoli, kuko kuno yamwi yasile icisila.

¹⁰ Davidi watwalilile ulendo wakwe na antu imyanda ini, pamulandu wakuti antu yauze imyanda iili walanga yatiyatonta wakwe cimwi cakuti iyaposiwa ukulamba uluzi.

¹¹ Antu yalya yano yapitanga na Davidi iyazana umwina Eguputo umwi umu calo nga iyamuleta kuli Davidi. Alino iyamupeela ivyakulya kuti alye nga na manzi kuti amwe.

¹² Iyamupeela ni mikoto ya mikunyu, ni ving'ango viili ivya matingi ayume. Nawe alya nga aya na maka, pano atatazile alye akantu nanti kamwi nanti ukumwa amanzi pa manda makulu yatatu apisile icisila, usiku nu musanya.

¹³ Davidi amuuzya ati, “Uzye umusambazi wako aweni, nga ufumile kwi wewe kwene?” Nawe aasuka ati, “Nene mwina Eguputo, nupya nene muzya wa mwina Amaleke. Musambazi wane wasile wantazyela lino nalwile amanda yatatu apita.

¹⁴ Twaile ituzanza incende iya Negebu, ya ina Keleti ni mpanga imwi yakwe Yuda, nga ni mpanga imwi iya mutundu wakwe Kalebu. Twasile toca nu musumba kwene uwa Zikilagi.”

¹⁵ Alino Davidi amuuzya ati, “Uzye ungantungulula ku azanzi yalya?” Umuntu wilya nawe aasuka ati, “Endi, namamutungulula! Cikulu sile ndi walapa ukuti usyakunkoma, nupya usikuya ukansye ku musambazi wane.”

¹⁶ Alino nawe atungulula Davidi ukwali azanzi yalya. Azanzi yalya ala yatiyasalangana umu ncende ilya yonsi, yala yakulya nu kumwa nu kuzevya pa visampwe vyonsi vino yapokololwile umu mpanga iya ina Filisti ni mpanga yakwe Yuda.

¹⁷ Uwanda uwalondelela, lino sile kwandatuka, Davidi ayazanza alwa nayo mpaka ilanzi iliwa. Kusi nanti umwi uwapuswike, suka sile alumendo imyanda ini akwezile pa ngamila nu kupuuka.

¹⁸ Davidi apokolola ivintu vyonsi pyu vino aina Amaleke yapokolwile, kumwi na aci yakwe yaili.

¹⁹ Kusi nanti wenga wino yaponzizye, pa ance na ikolo kwene, pa alumendo na akazyana, na pali vino yasamfile. Davidi walondwile vyonsi pyu.

²⁰ Davidi apokolola imfwele ni mbuzi kumwi na maufyo ya ng'ombe kwene, nga antu yakwe iyavikumbilizya inkolelo ya viteekwa vyuze yala yakuti, “Vii, ivisampwe vyakwe Davidi.”

²¹ Lyene Davidi aswilila ku antu yalya imyanda iili yano walanga yatiyatonta wakwe cimwi cakuti iyaposiwa ukumulondela nupya yano yasile icisila pa Luzi lwa Besoli. Alino nayo yiiza ku kumukomanya na antu yano wali nayo. Lino Davidi na antu yakwe yapalama, ayalamuka.

²² Lelo antu yamwi aipe nupya awelewele alondelanga Davidi yavwanga iyati, “Pamulandu wakuti yene yatapisile pamwi naswe, lyene naswe kwene tutakuyankanya icintu nanti conga pa visampwe vino twatitupokolola. Lelo nanti cingaya vivyo, cila muntu angasenda umuci wakwe na ana yakwe nga apite.”

²³ Davidi nawe pali pakuyanena ati, “Awe, inane mutalinzile kucita vivyo ku vintu vino Yawe watupeela. Wene watucingilila nu kutupeela ucimvyo pali yao aizile ku kutuzanza.

²⁴ Ale fwandi, tumati aweni angamuzumilizya pamulandu kwene uu? Antu yonsi kwene yalinzile ukwankana ivilingane. Wino wensi asile akulinda iviya yalinzile ukumwankanya icipimo icili conga na vino yangankanya wiyo aile ku nkondo.”

²⁵ Ukutandika pa wanda kwene ulya ukufika na pilelo kwene, Davidi wacita icintu cii ukuya isunde pakasi ka ina Izlaeli.

²⁶ Lino Davidi waswilile ku Zikilagi, watozile ivisampwe vimwi atumila auze ali ntunguluzi zyamu Yuda, alanda na mazwi yaa, ati, “Uo uli wila uno namutumila, uno napaatula pa visampwe vino naile impokolola ku anisi yakwe Yawe.”

²⁷ Atumila na ina Betele, na ina Lamoti Negebu nu ku Yatili,

²⁸ nu ku Aloeli, nu ku Sifumoti, nu ku Esyitemoa,

²⁹ nu ku Lakali, na kuli yao ali mu misumba ya ina Yelameeli na ina Kenite,

³⁰ na kuli yao ali mu Holima, na ina Bolasyani, na ina Ataki,

³¹ na ina Hebuloni, nga na kuli yao amu ncende zyonsi muno Davidi na antu yakwe yapitananga.