1 Samueli 3 - Amazwi Yakwe Leza 2013

Yawe walolekela Samueli

¹ Umulumendo Samueli watumikilanga Yawe ala akwangalilwa na Eli. Mu manda kwene yalya inkombe zyakwe Yawe zitavuzile, nupya ni vilolwa kwene ivyakufuma kunoli vitavuzile.

² Uwanda umwi usiku Eli, wino amanso yakwe walanga yatandika ukuya na kanda cakuti aposiwa ukulola, walambalile pansi mu muputule wakwe kwene.

³ Walanga ilampi lyakwe Leza litacili lizime, nga Samueli ala alambalile pansi mwi taalu lyakwe Yawe, umu pipi ni Mbokosi ya Upangano yakwe Leza.

⁴ Lyene Yawe aama Samueli nga Samueli aasuka ati, “Anene mukwai!”

⁵ Nga akatuka asimula aya kuli Eli nga avwanga ati, “Anene mukwai, nemuno mwatimwama.” Lelo Eli avwanga ati, “Ntakwamile awe. Swilila kalambalale.”

⁶ Nupya kwene Yawe aama Samueli ati, “Samueli!” Nga Samueli akatuka aya kuli Eli nga Eli nawe amunena ati, “Mwali mukungama. Anene mukwai!” Lelo Eli avwanga ati, “Mwanane, ala ntali nkukwama. Mwanane swilila kalambalale.”

⁷ Samueli walanga atacili amanye Yawe, pamulandu wakuti Yawe atatazile alande kunoli.

⁸ Yawe aama Samueli iila lyakwe citatu, nga Samueli akatuka aya kuli Eli, amunena ati, “Anene mukwai, nemuno mwatimwama.” Lyene Eli amanya ukuti Yawe aliwe akwama umulumendo.

⁹ Acino Eli anena Samueli ati, “Swilila kalambalale, nga ndi cakuti wakwama nupya, uwaasuka uti, ‘Vwanga, we Mwene, pano umuzya wako akutezya.’ ” Acino Samueli apita aya alambalala pa musanzi wakwe.

¹⁰ Yawe aiza aimilila papa nu kumwama vivi kwene wakwe vino wali wamwama na pankolelo ati, “Samueli, Samueli!” Lyene Samueli nawe aasuka ati, “Vwanga, pano umuomvi wako akutezya.”

¹¹ Yawe nawe pali pakunena Samueli ati, “Lola, nasya nce ncite cimwi mu Izlaeli na wiyo wensi aluvwa kweneko umu matwi yakwe mulawawata.

¹² Mu wanda kwene uwo ndafikilizya vyonsi vino navwanzile ukuti ndacita kuli Eli nu ku ang'anda yakwe.

¹³ Pasi pano namunena mpiti ukuvunuka kuno ndavunuka ang'anda yakwe ukwa manda pe pamulandu wa uyi uno wene wamanyile ukuti ukucitika. Ana yakwe aonsi iyampontela yatancindike awe, nga nawe wataposiwa ukuyalesya.

¹⁴ Caleka, nemo nalafile ku ang'anda yakwe Eli ukuti kutalatala kuye impolelwa nanti uwila uno ungafuta umulandu wao.”

¹⁵ Samueli alambalala pa musanzi mpaka akatondo, lino wene wayuzile ivisasa vya ng'anda yakwe Yawe. Wene wali ni ntete zyakunena Eli ivya pamulandu ni cilolwa,

¹⁶ lelo Eli amwama nga amunena ati, “Samueli, mwanane.” Samueli nawe aasuka ati, “Anene, mukwai.”

¹⁷ Eli nawe amuuzya ati, “Uzye ivyani vino Yawe waliwakukunena? Utezya umfise nanti cimwi. Yawe amakusantola ndi cakuti wala wamfisa pali vino wali wakunena.”

¹⁸ Acino Samueli amunena vyonsi vino yaliyamunena, ukwaula ukufisa nanti konga. Lyene Eli pali pakuvwanga ati, “Wene ali Yawe. Fwandi kaacite vyonsi ivingamuzanzya.”

¹⁹ Lino Samueli akukula, Yawe wali nawe, nga kutali izwi nanti lyonga pa mazwi yano walandanga lino litafikiliziwe.

²⁰ Ukutandikila sile ku mpanga iya ina Dani ukufika nu ku Belisyeba, aina Izlaeli yonsi yamanya ukuti umucumi Samueli a kasema wakwe Yawe.

²¹ Yawe atwalila ukuloleka ku Syilo, pamulandu wakuti akuno umwisikulu waisokolwile kuli Samueli nu kulanda kunoli. Na lyonsi lino Samueli wavwanga cimwi, aina Izlaeli yonsi yatezyanga.