1 Samueli 29 - Amazwi Yakwe Leza 2013

Aina Filisti yakana Davidi

¹ Aina Filisti yakonganika ivita vyao ivyankondo ku Afeki. Aina Izlaeli nayo iyakuula inkambi zyao mupipi na kafukoka kaku Yezileele.

² Lino intunguluzi zya ina Filisti zyatandika ukupita pamwi ni mpuka zya vita vyao, zimwi imyanda na zimwi amazimbi, Davidi na antu yakwe ala yakupita yalondelile icisila cao ala yali na Akisyi.

³ Alino yamusika akalamba ya vita vya ina Filisti iyuzya iyati, “Nga antu yaa Ayebulai, ivyani vino yakucita kuno?” Akisyi aasuka ati, “Uzye wi, asi ali Davidi wiyo uwali umuomvi wakwe Saulo umwene wa ina Izlaeli? Pano nemo natandikila ukwikala nawe patipapita umwaka onga nu kucila penepo. Alino na pano wizile azina kuli nene ntamulola na kai kamwi.”

⁴ Lelo yamusika akalamba ya vita vya ina Filisti iyasoka nga yavwanga iyati, “Swilizya umuntu wiyo ku musumba uno wamupile. Wene atalinzile ukupita naswe ku kulwa inkondo. Pano limwi angaya akatukoope ku anisi itu lino inkondo yatandika. Uzye mwemo mukuti kungaya inzila nayuze isuma ino umuntu wi yangawezyezyanya icuvwano nu mwene wakwe ukuluta ukumutwalila imitwe ya antu itu?

⁵ Uzye wikwene wii, asi ali Davidi wino yimbilanga nu mu viila ala yakuti, ‘Saulo wakoma amazimbi, lelo Davidi wakoma amazimbi na mazimbi.’ ”

⁶ Akisyi aama Davidi nga amunena ati, “Icumi nalapa umwi zina lyakwe Yawe waumi ukuti wewe muntu umwi uwacumi. Nemo apa lwane ningatemwa sana ukuti tupite swensi ku nkondo. Nemo intazana akai nanti kamwi muli wewe, ukufuma pa wanda uno wizile uzina ukwane.

⁷ Lelo intunguluzi zyuze zisikukulonda. Acino fwandi swilila pita ulumi. Utacita icili consi icitangazanzya intunguluzi zya ina Filisti umwenzo.”

⁸ Lelo Davidi ailizyanya ati, “Musambazi, uzye ivyani vino nacita, nanti akai ci kano wanzana nako ukufuma sile lino natandike ku kutumikila ukufika napilelo kwene? Uzye pacani cino ntangapita ku kulwisya anisi ya mwene umusambazi wane?”

⁹ Akisyi nawe amwaasuka ati, “Palwane namanya ukuti wemo waya uwacumi pa manso yane wa mungeli wakwe Leza. Lelo yamusika akalamba ya vita vya ina Filisti yatiyalanda ukuti wemo utangapita naswe ku kulwa inkondo.

¹⁰ Lyene wemo ukatuke sile katondotondo pamwi na aomvi ya musambazi wako akulondile, mukaswilile nayo ku musumba uno nakupiile.”

¹¹ Acino Davidi na antu yakwe iyakatuka katondotondo kuti yaswilile ku mpanga ya ina Filisti, nga aina Filisti nayo iyatumbela ku Yezileele.