1 Samueli 28 - Amazwi Yakwe Leza 2013

¹ Mu manda yalya aina Filisti iyakonganika ivita vyao kuti yakalwisye aina Izlaeli, nga Akisyi anena Davidi ati, “Ulinzile kumanya ukuti wewe pamwi na antu yako mumapita nani ku nkondo.”

² Davidi nawe avwanga ati, “Lyene umailolela wemwisikulu vino umuomvi wako angacita.” Akisyi nawe amunena ati, “Cisuma, namakucita kalinda uwakundinda amanda pe.”

Saulo wasapola

³ Pa nsita ilya walanga Samueli wafwa, na ina Izlaeli yonsi yamulosizye nga iyamuzika umu Lama, umusumba wa kumwao. Saulo wazinzile yancimya na yakasapoola yonsi umu mpanga ya Izlaeli.

⁴ Ivita vya ina Filisti ivikongana nu kukuula inkambi ku Syunemu, nga Saulo nawe akonganika aina Izlaeli yonsi nu kukuula inkambi yao ku Giliboa.

⁵ Lino Saulo walola ivita vya ina Filisti, auvwa intete. Umwenzo wakwe iuzakaza ku ntete.

⁶ Auzya Yawe ivyakucita, lelo Yawe atamwaswike mu viloto nanti kupitila muli Ulimu nanti muli yakasema.

⁷ Saulo pali pakunena aomvi yakwe ati, “Mundondele umwanaci umwi wino akasapola, pakuti inje kunoli nkamuzye ivyakucita.” Nayo iyamunena iyati, “Kwaya wenga umu Endoli.”

⁸ Acino Saulo aivulunganya imilolekele, pa kuzwala ivyakuzwala vyuze, nga usiku aliwe na yonsi yaili iyaya ku mwanaci wilya. Alino amunena ati, “Unguzizye ku mupasi ivyakucita, nga ungamile umupasi wa muntu wino namataka.”

⁹ Lelo umwanaci wilya amunena ati, “Cumi kwene wamanya ukulukusi wakwe Saulo. Wene wazinga yancimya na yakasapoola mu mpanga ya Izlaeli. Uzye pacani cino wanteya iciteyo kuti unkome?”

¹⁰ Lyene Saulo alapa umulapo ati, “Nalapa umwi zina lyakwe Yawe waumi ukuti wemo utalavunukwa apakucita ci.”

¹¹ Lyene umwanaci wilya auzya ati, “Uzye aweni wino namakwamila?” Nawe amunena ati, “Ungamile Samueli.”

¹² Lino umwanaci wilya walola Samueli, apunda icikalale nga anena Saulo ati, “Uzye pacani cino wansomba? Wewe uli Saulo!”

¹³ Kateeka nawe amunena ati, “Utuvwa intete. Uzye walola cani?” Umwanaci wilya aasuka ati, “Nalola umupasi ukufuma mu musili.”

¹⁴ Kateeka nawe amuuzya ati, “Uzye akuloleka uli?” Nawe aasuka ati, “Wino akufuma umukombe, nupya azwite umwingila.” Lyene Saulo amanya ukuti a Samueli, nga afukama pansi mucinzimucinzi, akontamuka ni cinso cakwe.

¹⁵ Samueli anena Saulo ati, “Uzye pacani cino wanganola apa kundeta kuno?” Saulo aasuka ati, “Indi umu ntazi ikulu! Aina Filisti yakundwisya, nga Leza watamfutatila. Wene watata ukungasuka ukupitila muli yakasema nanti umu viloto kwene. Acino natinkwama kuti wize unene ivyakucita.”

¹⁶ Samueli amunena ati, “Uzye pacani cino wiza ku kuuzya kunondi, apakuzana ukuti Yawe watakufutatila nga nupya wataya umwanisi wako?

¹⁷ Yawe watacita cino wene wasemile kupitila muli nene. Yawe watapokolola uwene mu makasa yako nu kuupela ku muntu muze, kuli Davidi.

¹⁸ Pamulandu wakuti wemo utayezile amazwi yakwe Yawe nanti ukulovya aina Amaleke, Yawe nawe watacita ci kunuli ilelo.

¹⁹ Yawe alapeela wewe pamwi na ina Izlaeli kwene umu makasa ya ina Filisti, nga mutondo wewe na ana yako aonsi muluminkana pamwi nani. Yawe alapeela ni vita kwene ivya ina Izlaeli mu makasa ya ina Filisti.”

²⁰ Lilyo kwene saulo apona pansi alambalala, ale ali ni ntete sana pamulandu wakuvwa amazwi yakwe Samueli. Wene aongoka, pamulandu wakuti uwanda ulya onsi walanga atalile nanti akakulya kamwi.

²¹ Lino umwanaci wilya wiza kuli Saulo nu kulola ukuti akuzakaza ku ntete, amunena ati, “Lola, umuomvi wako umwanaci watayela amazwi yako. Nemo ngani nakomwa apakucita icintu cino wewe waliwanena ukucita.

²² Acino lyene napapata uvwa ivikulanda umuomvi wako nu kuleka nkupeele utwakulya tumwi ulye pakuti uye na maka akupita pa ulendo wako.”

²³ Saulo akana nga avwanga ati, “Ntakulya awe.” Lelo antu yakwe iyaya ku lusansa lwa mwanaci iyamupapata, nga nawe auvwa kunoyali. Alino akatuka pansi nga aikala pa citanda.

²⁴ Umwanaci wilya wakweti akana kang'ombe akiine ukwakwe, nga zuwazuwa akakoma. Lyene atoola usu wa ngano, akanda umunya nga apanga umukate usi na citutumusi.

²⁵ Alino aimula Saulo na aomvi yakwe, nga nayo iyalya. Usiku kwene ulya iyakatuka nga iyapita.