1 Samueli 27 - Amazwi Yakwe Leza 2013

Davidi wapukila ku Filisti

¹ Alino Davidi aelenganya ati, “Uwanda umwi ndafwila mu minwe yakwe Saulo. Icampomvu sile cino ningacita, nkande mpuukile sile ku mpanga ya ina Filisti. Lyene Saulo alasuka atonte sile muno akunsapika ukuli konsi mu mpanga ya ina Izlaeli, nga nani ndapusuka kunoli.”

² Acino Davidi na antu yakwe imyanda mutanda iyakatuka nga iyapita kuli Akisyi, umwana wakwe Maoki, umwene waku Gati.

³ Davidi na antu yakwe yaile yikala ku Gati pamwi na Akisyi. Cila muntu wali pamwi na ang'anda yakwe, nga Davidi wali na aci yakwe yoili, Ainoamu uwaku Yezileele nga na Abigelo uwaku Kalimeli, mukamfwilwa wilya uwaku Nabali.

⁴ Lino Saulo yamunena ukuti Davidi wutukila ku Gati, ata kumuvula.

⁵ Lyene Davidi anena Akisyi ati, “Ndi cakuti wewe cuza kunondi, napapata umpeele kweneko incende mu musumba onga pa misumba iyamu mpanga yako uwakuti naikala mwenemo. Uzye pacani cino umuomvi wako angaikala mu musumba wakwisano pamwi nawe?”

⁶ Acino pa wanda ulya kwene Akisyi amupeela umusumba wa Zikilagi. Ali cino ni lelo kwene umusumba ulya uwakwe yamwene amu Yuda.

⁷ Davidi watenzi umu mpanga ya ina Filisti umwaka onga ni myezi ini.

⁸ Lyene Davidi na antu yakwe yakatukanga iyaya ku kuzanza aina Gesyuli na ina Gilizi na ina Amaleke. (Uku mpiti antu yaa yikalanga umu mpanga iyafika ku Syuli mpaka nu ku Eguputo.)

⁹ Lyonsi sile lino Davidi wazanza umusumba umwi, wene atasyanga umonsi nanti umwanaci umwi akufuta. Lelo wene watolanga imfwele ni ng'ombe, yapunda ni ngamila, nga ni vyakuzwala kwene. Alino aswilila kuli Akisyi.

¹⁰ Akisyi ndi cakuti wamuzya wati, “Uzye aukwi kuno mwali mwaya mwazanza umwi lelo?” Davidi wamwasukanga ati, “Ku Negebu uwa ina Yuda” nanti “Ku Negebu uwa ina Yelameeli” nanti “Ku Negebu uwa ina Kenite.”

¹¹ Davidi wakomanga yonsi kwene, aonsi na anaci kwene ukwaula kusya nanti wenga uwakusenda ku Gati, pano wene welenginye ati, “Yene yangaya yakatulandilile iyati, ‘Vi na vi avino Davidi wacita.’ ” Uu, uli musango uno Davidi wikalile nu kucita pa nsita yonsi ino watenzi mu mpanga ya ina Filisti.

¹² Akisyi wataile sana Davidi nga aelenganya ati, “Davidi wataisausya sile ku antu yakwe aina Izlaeli, cakuti wene amaya umuomvi wane amanda pe.”