1 Samueli 26 - Amazwi Yakwe Leza 2013

¹ Aina Zifu yaile kuli Saulo ku Gibeya nga yamunena iyati, “Ala mwine Davidi wafisama umu Mwamba wa Hakila, uwaya lwaku mpela ya Yesyimoni.”

² Saulo atentemukila ku Lwanga lwa Zifu, pamwi na asilika asololwe amazimbi yatatu, kuti yakalonde Davidi.

³ Saulo pali pakusaka insakwe umu mbali ya museo pa Mwamba wa Hakila, lwaku mpela yakwe Yesyimoni. Lelo Davidi wene watenzi umu lwanga. Lino wamanya ukuti Saulo wamulondelela kuku,

⁴ atuma inengu nu kumanya vino umu cumi Saulo watafika.

⁵ Lyene lilyo kwene Davidi atenuka nga aya ku ncende kuno Saulo wakuuzile inkambi. Aya asininkizya na pano Saulo na Abineli umwana wakwe Neli, musika mukalamba uwa vita, yatiyalambalala. Saulo walambalile mukasi ka nkambi, na asilika yala yamuzingulwike.

⁶ Davidi ali pakuuzya Aimeleki umwina Hiti na Abisyai umwana wakwe Zeluya uwali umwina wakwe Yoabu, ati, “Uzye aweni amaya pamwi nani kuli Saulo umu nkambi?” Abisyai aasuka ati, “Anene namapita nawe.”

⁷ Acino Davidi na Abisyai iyaya ku vita usiku, iyaya yazana Saulo watakasula utulo umukasi ka nkambi ala ni sumo lyakwe lisimfilwe mu musili pipi nu mutwe wakwe. Abineli na asilika ala yatiyalambalala ukuzinguluka Saulo.

⁸ Alino Abisyai anena Davidi ati, “Ilelo Leza watapeela anisi yako umu makasa yako. Fwandi kantole isumo lyakwe kwene alino mutulinkanye mpaka lisimpe na pansi, apakuvwinta isumo lyane iila lyonga kwene. Nsikumutota iila lyakwe ciili, foo.”

⁹ Davidi nawe aasuka Abisyai ati, “Utezya ukumukoma! Uzye aweni angazanza umuntu wino Yawe wasolola ukwaula kuti avunukwe?

¹⁰ Nalapa umwi zina lyakwe Yawe waumi ukuti Yawe umwisikulu alakoma Saulo lino insita yakwe ilafika, nanti alaya ku nkondo akuno imfwa ikamuzane.

¹¹ Lelo nemo Yawe wandesya ukukoma umuntu wino wene wasolola ukuya umwene. Wemo senda sile isumo lyakwe lino asimfile pipi nu mutwe wakwe nga ni ntungo ya manzi, nga twapita.”

¹² Acino Davidi atoola isumo ni ntungo ya manzi pipi nu mutwe wakwe Saulo, nga iyapita. Kutali nanti wenga uwa yaweni nanti ukumanya icacitike nanti ukuzyuka. Yonsi kwene yaizi utulo, pamulandu wakuti Yawe wayaponyezizye utulo twa mfwa.

¹³ Lyene Davidi aya ku lusansa luze lwa cifoloma nga aimilila papela ya mwamba, apafuntwikeko. Pakasi kao pali iciposi icikulu.

¹⁴ Davidi atandika kulaizya ku vita vyakwe Saulo na kuli Abineli umwana wakwe Neli ati, “Uzye utakuvwa we Abineli?” Abineli nawe asantamuka ati, “Uzye wewe weni wemuno ukupunda nu kuzyula umwene.”

¹⁵ Davidi nawe avwanga ati, “Ata see! Uzye icumi wemo ukuti wewe monsi pono? Uzye pa ina Izlaeli pangaya wino mulingine nawe?

¹⁶ Icintu cino watucita citazifile. Nalapa umwi zina lyakwe Yawe waumi ukuti wewe pamwi na antu yako mwensi mulinzile ukufwa, pamulandu wakuti mutacingilile umusambazi winu wino Yawe wasolola ukuya umwene. Lola! Isumo lya mwene lili kwi? Nga intungo ya manzi ino yali ku mitwe ili kwi?”

¹⁷ Saulo pali pakulooka izwi lyakwe Davidi nga avwanga ati, “Uzye izwi lilyo ilyakwako we Davidi mwanane?” Davidi nawe aasuka ati, “Ee mukwai izwi lyane, we mwene.”

¹⁸ Atwalilila ukulanda ati, “Uzye pacani cino umusambazi wane akalukundunga ne muomvi wako? Uzye icani cino nacita, nga nupya umulandu ci uno natala?

¹⁹ Fwandi lyene musambazi uvwa ku muomvi wako. Ndi cakuti Yawe uwakunena kuti wandwisya, ale lyene cizipe apokelele impolelwa iya kumuzanzya. Lelo ndi cakuti antu ayano yakukutunka, lyene icitipu cakwe Yawe ciyaponele! Pano yene yatiyanzinga umu mpanga yakwe Yawe nu kuntwala ku mpanga ya inamasi muno ningapepa sile tuleza tuze.

²⁰ Fwandi utakaleke inkakomwe umu mpanga ya inamasi, ukutali na Yawe. Uzye icani icingaleka ukuti wewe, we mwene wize wandunga nemuno nacepa wa kalupantila, wakwe vino umuntu akalunga inkwale umu myamba?”

²¹ Lyene Saulo avwanga ati, “Natinifya. Wela kuno, we Davidi mwanane. Pamulandu wakuti ilelo wemo waliwasakamala umi wane, nani ntakutala nezye ukucita cimwi iciipe kunuli nupya. Cumi kwene nemo nincita uwelewele nupya ninduvyanya sana.”

²² Davidi nawe aasuka ati, “Mwene, isumo lyako aeli. Leka umulumendo wenga pa alumendo yako aize alitole.

²³ Yawe akalambula cila muntu wino akacita ivya wololoke nupya uwacumi. Wemo ilelo kwene Yawe alile watakumpalamikila. Lelo nemo ntali nkulonda ku kukoma, wewe wemuno Yawe umwisikulu wasolola ukuya umwene.

²⁴ Icumi, vivi kwene vino nali nawaka umi wako ilelo, avili vino nani kwene Yawe awake umi wane nu kumpokolola ku ntazi zyonsi.”

²⁵ Lyene Saulo anena Davidi ati, “Su ngala upolelelwe, we mwanane Davidi. Wemo ulacita ivintu ivikulu, nupya vitalakuposya foo.” Acino Davidi pali pakutoola inzila apita, nga Saulo nawe aswilila ukwakwe.