1 Samueli 24 - Amazwi Yakwe Leza 2013

Davidi wakana kukoma Saulo

¹ Lino Saulo wawela ukufuma mu kuzinganya aina Filisti, iyamunena iyati, “Davidi ali mu Lwanga lwa Engedi.”

² Acino Saulo atoola antu amazimbi yatatu yano yasolwile ukufuma mu ina Izlaeli nga iyatenuka iyapita ku kulonda Davidi na antu yakwe umu pipi nu ku ncende ikaamwa ukuti Milunda ya Mwamba wa Mbuzi.

³ Lyene Saulo aiza kwi cele ilyali pipi ni vitata vya mfwele ivyali lwamu mbali ya museo, nga aingila mwenemo kuti aye ukunzi. Davidi na antu yakwe yali mukasikasi ki cele kwene li.

⁴ Antu yakwe Davidi yavwanga iyati, “Uu, uli wanda uno Yawe wavwanzile ukuti alapeela umwanisi wako umu makasa yako kuti umucitile icili consi cino ukasi.” Lyene Davidi asela ukwaula kuti yamanye nga asentula isempele lya mwingila wakwe Saulo.

⁵ Lelo Davidi auvwa uyi pa kusentula isempele lya mwingila wakwe Saulo,

⁶ nga anena antu yakwe ati, “Si angala Yawe andesye ukucitila umusambazi wane icintu icamusango uu, wikwene wino Yawe wasolola ukuya umwene! Nemo ntalinzile ukumucitila iciipe icili consi, pamulandu wakuti wene umwene wino Yawe wasolola!”

⁷ Acino Davidi akalipila antu yakwe ukuti yatalinzile ukuzanza Saulo. Saulo akatuka, afuma mwi cele, nga apita.

⁸ Lyene Davidi afuma mwi cele nga aama Saulo ati, “We musambazi umwene wane!” Lino Saulo wacelecensya monsi, Davidi akunkula pansi mucinzimucinzi

⁹ nga anena Saulo ati, “Uzye pacani cino ukauvwila antu yano yakakunena iyati, ‘Davidi akulonda ku kucitila cimwi iciipe?’

¹⁰ Ilelo watuilolela wemwisikulu vino Yawe waliwakupeela mu makasa yane mukasi ki cele. Yamwi iyankonkomezya kuti nkukome, lelo inakana ukucita cico. Ninayanena nati, ‘Ntanganezye ukucitila umusambazi wane cimwi iciipe, pamulandu wakuti wene umusololwe wakwe Yawe.’

¹¹ Tata, silola akapimfya ka mwingila wako kano ndemile mu minwe! Ninalepula isempele lya mwingila wako, lelo ntakukomile. Acino lyene manya vino nemo ntakweti umulandu umwi nupya ntakusangukila awe. Nemo ntifya kunuli, lelo wemo ukundunga kuti unkome.

¹² Si Yawe ale apingule pakasi kakwe wewe nani. Lelo nanti angala wene amandandwila, ntalatala nkucitile iciipe icili consi.

¹³ Wakwe vino umuvwango wampiti ukati, ‘Umuti wiipe ukaseeka ivizao iviipe,’ acino ntalakucitila cimwi iciipe.

¹⁴ Si lolini cino umwene wa ina Izlaeli akwezyanya ukukoma! Si lolini cino wene akuzinganya! Simbwa umufwe! Akalupantila!

¹⁵ Si Yawe aye kapingula witu nga atupingwile umulandu. Si ale apituluke mu mulandu wane, ampokolole nu kuntuula kuli wewe.”

¹⁶ Lino Davidi wamala ukuvwanga, Saulo amuuzya ati, “Uzye icumi kwene awewe, Davidi umwana wane umonsi?” Nga Saulo atandika ukulila nu kupooma.

¹⁷ Alino anena Davidi ati, “Wemo watucita icisuma, lelo nemo natincita iciipe.

¹⁸ Watunena apaswe ilelo kwene ivintu ivisuma vino watucita kunondi. Yawe wali wapeela nene mu makasa yako, lelo wemo utali wankoma, awe.

¹⁹ Uzye amaila yanga lino umuntu akazana umwanisi wakwe ukwaula ukumucitila cimwi iciipe?

²⁰ Manyile ukuti icumi kwene wemo ulaya umwene nu kuti uwene wa Izlaeli ulatwalilila lino wemo uli pa cilimba.

²¹ Lelo wemo ulinzile ukundaya ukuti utalakoma amu mupanda wane, pakuti izina lyane kumwi ni lya akazi kane litakalowe.”

²² Davidi nawe alaya ukuti ali nu kucita vivyo kwene. Lyene Saulo aswilila ukwakwe nga Davidi na antu yakwe iyaswilila ku ncende ino yafisimemo.