1 Samueli 23 - Amazwi Yakwe Leza 2013

Davidi wapususya aina Keila

¹ Lino yalandile Davidi iyati, “Lola, aina Filisti yakulwisya aina Keila, nga nu kusampa ivyakulya pa lwano.”

² Davidi auzya kuli Yawe ati, “Uzye nje nkalwisye aina Filisti?” Yawe nawe aasuka ati, “Ee, pitanga kalwisye aina Filisti nu kutuula aina Keila.”

³ Lelo antu yakwe Davidi iyamunena iyati, “Muno mu mpanga ya ina Yuda tukupita ntetentete. Nga fwandi cilaya uli lino tulaya ku Keila ku kulwa na ina Filisti!”

⁴ Acino Davidi nupya auzya Yawe nga Yawe amwaasuka ati, “Pitanga ku Keila pamulandu wakuti namakupeela ucimvyo pa ina Filisti.”

⁵ Acino Davidi na antu yakwe iyaya ku Keila nu kuzanza aina Filisti. Iyakoma aingi munoyali nga iyasenda ni viteekwa vyao. Avino Davidi wapuswisye aikazi amu musumba wa Keila.

⁶ Lino Abyata umwana wakwe Aimeleki utwike aya auminkana na Davidi ku Keila, wene wasenzile ni cakuzwala ca efodi.

⁷ Saulo yamulandile ukuti Davidi wataya ku Keila, nga nawe avwanga ati, “Leza watamwika mu makasa yane. Davidi wataiyalila umwisikulu pa kwingila mu musumba uwakulililwa amalinga ni mpongolo ni mifikilo iyakupikilizya.”

⁸ Lyene Saulo akonganika ivita vyakwe vyonsi, kuti yaye ku Keila ku kuzanza Davidi na antu yakwe.

⁹ Lino Davidi wamanya ukuti Saulo watapanga ukumukoma, anena Abyata simapepo ati, “Ndetele cakuzwala ca efodi.”

¹⁰ Lyene Davidi avwanga ati, “Iye, we Yawe, Leza wa ina Izlaeli, ne muomvi wako natinuvwa ukuti Saulo watapanga ukwiza ku Keila nu kukoma aikazi ya mwenemo pamulandu wane.

¹¹ Uzye aikazi amu Keila yaliza yampeele mu makasa yakwe Saulo? Uzye cumi kwene Saulo ali nu kwiza wakwe muno nuvwila? Iye, we Yawe, Leza wa ina Izlaeli, ala nakupapata ungasuke ne muomvi wako!” Yawe nawe aasuka ati, “Ee, yalacita vivyo kwene.”

¹² Nupya kwene Davidi auzya ati, “Uzye aikazi amu Keila yaliza yampeele pamwi na antu yane mu makasa yakwe Saulo?” Yawe nawe aasuka ati, “Ee, yalacita vivyo kwene.”

¹³ Acino Davidi pamwi na antu yakwe, yao ali manye imyanda mutanda, iyafuma ku Keila iyaya yakutawanta sile. Lino Saulo uvwa ukuti Davidi na antu yakwe yatiyapuuka ukufuma mu Keila, wene atawa.

Davidi wasyala afisime mu mpanga iya myamba

¹⁴ Davidi watwalilile ukufisama mu mpanga iya myamba, umu lwanga pipi nu ku Zifu. Saulo wezyanga lyonsi ku mulondalonda, lelo Yawe atapiile Davidi umu makasa yakwe.

¹⁵ Lino Davidi wali ku Holesyi umu lwanga lwa Zifu, amanya ukuti Saulo wataiza ku kumukoma.

¹⁶ Yonatani umwana wakwe Saulo nawe aya kuli Davidi ku Holesyi nga amukomelezya ni visininkizyo vya kucingililwa na Leza ati,

¹⁷ “Utuvwa intete. Tata Saulo atalacita cimwi iciipe kunuli. Wene amanyile ningo ukuti wemo ulaya umwene wa ina Izlaeli nu kuti nene ndaya wakwe ciili kunuli.”

¹⁸ Yoili kwene iyacita icipangano pa manso yakwe Yawe ica kwandana ucuza. Alino Davidi asyala ku Holesyi, nga Yonatani aswilila ukwakwe.

¹⁹ Antu yamwi afumile ku Zifu iyaya kuli Saulo ku Gibeya nga iyamunena iyati, “Davidi afisime umu mpanga itu ku Holesyi apa mwamba wa Hakila, lwaku kaeya ka lwanga lwa Yudeya.

²⁰ We mwene wakwisaci, tumanyile vino ukulondesya ukumulema. Acino ule wize sile ku mpanga itu, nga naswe mpaka tusininkizye ukuti wamulema.”

²¹ Saulo nawe aasuka ati, “Si angala Yawe amupolelele pa kuya nu luse wakwe cimwi kunondi!

²² Pitangini nupya mukonkezye ukuteyanya. Londelezini musininkizye kuno angazanwa nga nu kumanya umuntu wino watamulola kuko. Nkauvwa ukuti Davidi umucenjele sana.

²³ Londelezini incende zyonsi zino akafisama mwenemo nga muweluluke kunondi mwize munene. Lyene ndapita kweneko pamwi namwe, nga ndi cakuti acili mu ncende iyo, indamuzana, nanti angala indalondalonda umu mwiko wakwe Yuda onsi.”

²⁴ Acino iyatenuka nga iyaswilila ku Zifu, iyakolelela Saulo. Davidi na antu yakwe yali mu lwanga lwa Maoni, nga amuno yatenzi, umu Alaba lwaku kaeya kakwe Yesyimoni.

²⁵ Saulo na antu yakwe iyatandika ukulondalonda, nga lino Davidi yamunena pali cii, atentemuka ku kalundu ka mawe nu kwikala umu lwanga lwa Maoni. Lino Saulo uvwa ukuti Davidi watatentemukila ku Maoni, amulondelela kuku kwene.

²⁶ Saulo na antu yakwe yali ku lusansa longa ulwa mwamba, yatali umu ncende umwali Davidi na antu yakwe, yao apalamilanga kunoyali nupya yali pipi nu kuyalema.

²⁷ Pa nsita kwene ilya intumi ifika nga inena Saulo iti, “Iza kuno likwene! Aina Filisti yakuzanza impanga.”

²⁸ Acino Saulo atala ata ukulondelela Davidi nga aya ku kulwisya aina Filisti. Uli mulandu incende ilya ikaamwa ukuti Hamalekoti (kuli kuti umwamba wa Kupaatukana.)

²⁹ Davidi afuma kuku aya ku ncende ya Engedi, kuno watenzi afisime.