1 Samueli 21 - Amazwi Yakwe Leza 2013

Davidi wapuuka Saulo

¹ Davidi aya ku Nobu, kuli simapepo Aimeleki. Aimeleki azakaza sile pa kumukomenkanya nga amuuzya ati, “Uzye pacani cino wapita sile wenga pa kwiza kuno, ukwaula nu wakukusukilila?”

² Davidi nawe aasuka Aimeleki ati, “Saulo umwene wilya watantuma nu kumpeela ilamulo ilyakukana taka nanti ukunena umuntu ali wensi cino mpitile kuno. Lelo ukuya kwene ivita vyane vyene twatitupangana navyo kukomenkana pa ncende yonga.

³ Ndi cakuti watukwata ivyakulya vimwivimwi ungampeela. Napapata umpeele imikate isano nanti icili consi icili penepo.”

⁴ Simapepo wilya nawe avwanga ati, “Umukate uwasilesile wene ntakweti. Lelo nkweti sile umukate uwamuzilo, uo uno mungalya ndi cakuti ivita vyako vyaisunzile ku kukana manyana na yamangu.”

⁵ Davidi nawe pali pakuvwanga ati, “Cumi kwene, tutazumiliziwa kumanyana na yamangu lino twatenuka ukuya ku nkondo nanti inkondo isi yamuzilo kwene. Nga uzye ilelo lyene yatanga yalusye ukucita cico lino tuli pa mulimo ukalambane ndi uu!”

⁶ Icaleka simapepo wilya amupeela umukate uwamuzilo, pamulandu wakuti kutali umukate uze uwasilesile suka sile umukate uwapeelwa kuli Leza, uno walanga yatiyafumya pa kavuwa kakwe Yawe nu kupyanikizyapo uze ukaye pa wanda kwene uno yaufumizye penepo. (

⁷ Lyene Doegi, umukalamba wenga pali yakacema yakwe Saulo, wali kweneko uwanda kwene ulya. Wene yamutesile pakuti afikilizye incito zimwizimwi izikumile ku mipepele yao.)

⁸ Alino Davidi auzya Aimeleki ati, “Uzye ungakwata isumo nanti ulupanga kuno? Nemo ntasenzile ulupanga lwane nanti icanzo icili consi, pamulandu wakuti umulimo wa mwene nao watiupamvya.”

⁹ Simapepo wilya nawe aasuka ati, “Pali ulupanga lwakwe Golyati umwina Filisti, wino wemo wakomile mu Cifoloma ca Elaa. Lwene lupomvilwe umu nsalu ukwi tundu ya cakuzwala ca efodi. Ndi cakuti ukululonda, lusende. Pasi ulupanga naluze pano, suka sile lulo kwene.” Davidi nawe avwanga ati, “Pasi ulupanga naluze ulungacila pali lulo. Mpeko lulo kwene.”

¹⁰ Uwanda kwene ulya Davidi autuka Saulo nga aya kwakwe Akisyi umwene waku Gati.

¹¹ Lelo aomvi yakwe Akisyi iyamunena iyati, “Uzye wii asi ali Davidi, umwene wa mpanga yakwe? Uzye asi aliwe kwene wino yakaimbila nu mu vicino iyati, ‘Saulo wakoma antu amazimbi, lelo Davidi wakoma amazimbi maila ikumi.’ ”

¹² Davidi lino uvwa amazwi yao, ailuka nu kwiluka cakuti aoopa sana Akisyi umwene waku Gati.

¹³ Acino Davidi pali pakucita amano yamwi, akuisangula wakwe cipena. Akula limwi nga ciza apalola ku cisasa ca pa mpongolo ya musumba nu kupololola into apa cifuwa nu ku vilezu vyakwe.

¹⁴ Acino Akisyi anena aomvi yakwe ati, “Si lolini umuntu wi! Wene acipena! Uzye pacani cino mumuletile kunondi?

¹⁵ Uzye umulandu wakuti yacipena yaula kuno ali cino mungandetela nu wamusango ndi uu, uwakuti aize apenela pa manso yane? Uzye nene ningasunga umuntu wi umu ng'anda yane?”