1 Samueli 19 - Amazwi Yakwe Leza 2013

Saulo wapangila ukukoma Davidi

¹ Saulo anena Yonatani umwana wakwe na aomvi yakwe yonsi kuti yakome Davidi. Lelo Yonatani watemwisizye Davidi

² nga apali pakumucelula ati, “Tata akulonda ku kukoma. Acino fwandi mutondo akatondo ukacenjele. Uce ufisame ningo.

³ Nemo indakatuka nu kuya imilila pamwi na tata umu mpanga, pa ncende kwene ino ulafisamila mwenemo. Ndakuvwangila kuli tata, na vino ndazana indiza nkunene.”

⁴ Yonatani pali pakuvwangila umuze Davidi amazwi asuma kuli isi, ati, “Musambazi, ala utafyenga umuomvi wako Davidi. Wene atakuluvyanya nanti cimwi, ni milimo ino akakuombela yonsi kwene isuma wakwe cimwi.

⁵ Nupya wene atali ni ntete zya kufwa lino wakomile umwina Filisti. Yawe wacimvizizye aina Izlaeli, nawe waciweni nga uzanga. Uzye lyene pacani cino ungafyengela umuntu asi nu mulandu, apakulonda ukukoma Davidi apaula umulandu?”

⁶ Saulo pali pakutezya amazwi yakwe Yonatani nga alaya nu mulapo ati, “Nalapa umwi zina lyakwe Yawe waumi ukuti Davidi atalinzile ukukomwa.”

⁷ Acino Yonatani aama Davidi nga amulandila amazwi yayo yonsi. Alino amuleta kuli Saulo, nga Davidi aikala na Saulo wakwe vino cali apankolelo.

⁸ Nupya kwene inkondo itandika, nga Davidi akatuka aya ku kulwisya aina Filisti. Ayalwisya icikalale cakuti iyamupuuka.

⁹ Alino umupasi wankota ukufuma kuli Yawe wikila pali Saulo lino atenzi umu ng'anda umwakwe, ala alemile ni sumo. Lino Davidi akulizya gita wakwe,

¹⁰ Saulo pali pakwezya ukusumba isumo kuti amutotenkanye kumwi nu lung'umba. Davidi pali pakuleuka kwempe sile cakuti Saulo atota isumo mu lun'gumba. Davidi pali pakupuuka, apusuka.

¹¹ Usiku kwene ulya Saulo atuma aomvi akuyalengula ku ng'anda yakwe Davidi pakuti yace yamukome akatondo. Lelo Mikala, umuci wakwe Davidi, amusoka, ati, “Usiku wi lelo ndi cakuti ututwike, mutondo ale yatiyakukoma.”

¹² Mikala pali pakufumizya iya apa nzota, nga nawe aongoloka autuka.

¹³ Alino Mikala atoola iciluwi nga acilalika pa musanzi, aika nu musamilo ku mutwe uwapangilwa na mavumbu ya mbuzi, nga acivimba ni nsalu.

¹⁴ Lino Saulo watuma antu akuyalema Davidi, Mikala ayanena ati, “Davidi umulwale.”

¹⁵ Lelo Saulo ayatuma nupya pakuti aisikulu yakailolele Davidi. Ayapeela ilamulo ati, “Mumulete sile vivyo kwene muno alalile pa musanzi, pakuti nize mukome.”

¹⁶ Lelo lino inengu zingila mumu, izizana sile iciluwi ciizi pa musanzi, nga ku mutwe ale kuli umusamilo uwapangilwa na mavumbu ya mbuzi.

¹⁷ Saulo pali pakunena Mikala ati, “Uzye pacani cino wantumpoka vii, waleka nu mwanisi wane wutuka?” Mikala aasuka ati, “Davidi aliwe anenyile ati, ‘Ngazwa pakuti nutuke. Ndi wakana awewe nkukoma.’ ”

¹⁸ Davidi utwike, aya kuli Samueli ku Lama nga amunena vyonsi vino Saulo wacisile kunoli. Lyene Davidi na Samueli iyaya ku Nayoti akuno yikala.

¹⁹ Lino yalandila Saulo ukuti Davidi ali ku Nayoti ku Lama,

²⁰ Saulo nawe pali pakutuma antu yamwi akuyalema Davidi. Lino sile yafika yalola nakuno iumba lyakwe yakasema yakusema, ale Samueli aimi papa akuyatungulula, Mupasi wakwe Leza wikila pa antu yakwe Saulo nga nayo kwene iyasema.

²¹ Lino yanena Saulo icintu cii, nawe atuma antu nayauze, nga nayo kwene iyasema. Nga lino Saulo watuma antu nayauze iila lyakwe citatu, nayo kwene iyasema.

²² Asuka Saulo umwisikulu aikatukila aya ku Lama nga afika na pa cifula caku Seku. Lyene auzya antu ati, “Uzye Samueli na Davidi yali kwi?” Nayo iyamwasuka iyati, “Yali ku Nayoti ku Lama.”

²³ Acino Saulo pali pakulungama ku Nayoti ku Lama. Lelo Mupasi wakwe Leza wikila na pali Saulo kwene, nga acina nu kupunda nzila yonsi mpaka afika ku Nayoti.

²⁴ Saulo wiyo pali pakuzula ni nsalu zyakwe zino wazwite. Alino nawe kwene atandika ukusema pa manso yakwe Samueli. Wene alala pansi tupu uwanda ulya onsi nga nu usiku kwene. Ali kuno kwafumile nu muvwango uwakuti, “Uzye Saulo nawe wali akasema?”