1 Samueli 18 - Amazwi Yakwe Leza 2013

¹ Lino Davidi na Saulo yamala ukulanzyanya, alino umwenzo wakwe Yonatani umwana wakwe Saulo iuya sana kuli Davidi cakuti amutemwa wakwe vino waitemwa umwisikulu.

² Ukutandika sile pa wanda kwene ulya Saulo asunga Davidi nupya atamuzumilizye ukuswilila ku ng'anda kwakwe isi.

³ Yonatani nawe pali pakupangana na Davidi pamulandu wakuti wamutemilwe wakwe vino waitemwa umwisikulu.

⁴ Yonatani wiyo pali pakuzulila Davidi umwingila wakwe amupeela kumwi ni cakuzwala cakwe, lupanga lwakwe, nu ulapwa wakwe nga nu musipi wakwe kwene.

⁵ Muli vyonsi kwene vino Saulo watumanga Davidi ukuyacita, wene ataposiwanga cakuti Saulo amulasika icifulo icikulu icamu vita. Na cii cazanzizye antu yonsi, kumwi ni ntunguluzi kwene zyakwe Saulo.

Saulo uvwila Davidi uzuwa

⁶ Lino ivita vyaswilila ku musumba pacisila cakwe Davidi ukukoma umwina Filisti, anaci yafumile mu misumba yonsi iya ina Izlaeli ukwiza zengela Saulo umwene wilya ala yakwimba inyimbo zya luzango, yakulizya ni ngoma na yagita, nu kucina yala yakucina.

⁷ Apakucina yimba nu lwimbo iyati, “Saulo wakoma antu amazimbi. Lelo Davidi wene wakoma antu amazimbi amaila amakumi.”

⁸ Saulo pasi pakusoka, nga amazwi yaa iyamuwavya umwenzo. Wene avwanga ati, “Davidi awino yamupendela amazimbi amaila amakumi. Lelo nemo yampendela sile amazimbi. Uzye icani nacuze cino yangamucitila ukuluta pakumulasika utesi?”

⁹ Ukutandika sile pa nsita kwene ilya Saulo atandika ukuvwila Davidi uzuwa akwata akaikila kunoli.

¹⁰ Uwanda uwalondelilepo umupasi wankota uwatumilwe na Leza iwikila na maka pali Saulo. Saulo atandika ivyakupulula umu ng'anda yakwe kwene, nga mumu kwene Davidi ale amunoli akulizya gita wakwe vino wacitanga amanda yonsi. Saulo nawe ale afumbite isumo umu minwe.

¹¹ Saulo aelenganya ati, “Namatotenkanya Davidi ku lung'umba. Lelo amaila yaili Davidi ale akuleuka.

¹² “Saulo aoopa Davidi, pamulandu wakuti Yawe wali na Davidi lelo wene asya aliwe.

¹³ Alino Saulo amusisya ukufuma panoli nga amulasika ukuya musika wa vita izimbi. Alino Davidi atungulula ivita mu kulwisya ulwi.

¹⁴ Nupya wene wali nu longo muli vyonsi vino wacitanga, pamulandu wakuti Yawe wali nawe.

¹⁵ Lino Saulo walola ukuti Davidi waya nu longo, atandika kumoopa.

¹⁶ Lelo aina Izlaeli yonsi na ina Yuda yatemilwe Davidi, pamulandu wakuti wene wayatungululanga umu ulwi.”

Davidi watwala umwana wakwe Saulo

¹⁷ Saulo pali pakunena Davidi ati, “Lola, Melabi umwana wane kaci, nyinalenzi pa yauze. Ali wino namakutwalizya. Cikulu sile ukatale ukandwisizye umukusipa nu kulwa inkondo zyakwe Yawe.” Pano Saulo welenginye ati, “Insikulonda ukukoma Davidi. Lelo aina Filisti ali yano yace yasuke yamukome.”

¹⁸ Davidi nawe pali pakunena Saulo ati, “Uzye nene weni, nanti ang'anda yane na aluko lwane, uzye yene aweni muno mu Izlaeli pakuti nene nje umukwi ku wene?”

¹⁹ Lelo lino insita yafisile iyakuti Melabi umwana kaci wakwe Saulo yamutwalizye kuli Davidi, icimanyika ukuti umuntu amamutwala a Adilyeli umwina Meolaa.

²⁰ Lelo Mikala, umwana umukazyana namuze wakwe Saulo, atemwa sana Davidi. Lino yanena Saulo umulandu uu, awe icimuzanzya.

²¹ Saulo pali pakwelenganya ati, “Eya! Nkance mupomele Mikala, ukusuka amulyombeleke pakuti aina Filisti ali yano yace yamukome.” Acino Saulo anena Davidi iila lyakwe ciili ati, “Wapelwa akasita nakauze akakuya umukwi wane.”

²² Lyene Saulo apeela ilamulo ku yaomvi yakwe akwi sano kuti yanene Davidi lino yali yonga na aliwe yati, “Lola, umwene watazangila munuli, naswe yaomvi yakwe swensi kwene twakutemwa. Fwandi mwine cazipa kuti uye sivyala wa mwene.”

²³ Acino nayo iyanena Davidi amazwi ya. Lelo Davidi nawe avwanga ati, “Uzye mwemo mukwelenganya ukuti ukuya umukwi wa mwene icintu cimwi cinono? Nemo nene mupina nupya nene muntu umwi wino atalumbuka.”

²⁴ Lino aomvi yakwe Saulo yamunena vino Davidi wavwanzile,

²⁵ Saulo aasuka ati, “Nenini Davidi muti, ‘Kateeka atakulonda impango zyuze izilusile pa nkanda umwanda onga izyaku onsi wa ina Filisti, pakuti acite icilanduzi pa anisi yakwe.’ ”

²⁶ Lino aomvi yakwe yanena Davidi ivintu vii, Davidi camuzanzizye ukuya umukwi wa mwene. Acino lino insita iyasontwa itali ipite,

²⁷ Davidi na antu yakwe iyapita iyaya yakoma aina Filisti imyanda iili. Alino Davidi aletela umwene inkanda zizi umwanda onga pakuti aye umukwi wa mwene. Lyene Saulo amupeela Mikala umwana wakwe umwanaci kuti aye umuci.

²⁸ Lino Saulo wamanya ukuti Yawe ali na Davidi nu kuti Mikala umwana wakwe umwanaci watemwa Davidi,

²⁹ nalyo kwene Saulo alusya ukoopa Davidi, nga watwalilile ukuya umwanisi wakwe amanda yonsi ya umi wakwe.

³⁰ Yamusika akalamba ya vita vya ina Filisti iyatwalilila ukwiza ku ulwi, lelo umu ulwi onsi Davidi wacimvyanga ukuluta asilika yakwe Saulo asyala. Ni zina lyakwe ililumbuka wakwe cimwi.