1 Samueli 16 - Amazwi Yakwe Leza 2013

David yamulasika pa cilimba ca wene

¹ Yawe anena Samueli ati, “Uzye fwandi wemo ulata lilaci ukutezela Saulo? Nemo namukana mpiti ukuti atangaya umwene wa ina Izlaeli. Wemo zuzya sile amafuta umu musazi wako nga ukatuke uwapita. Namakutuma kwakwe Yese umwina Betelemu. Natinsolola wenga uwamu ana yakwe aonsi kuti aye umwene.”

² Lelo Samueli nawe avwanga ati, “Uzye ningaya kweneko uli? Saulo nga wanguvwile kweneko, wene alankoma.” Yawe nawe amunena ati, “Senda umwana wa ng'ombe, indama, uye ukalande uti wiza ku kupeela impolelwa kuli Yawe.

³ Alino uwame Yese ku kupeela impolelwa, nga nani namakulanga ivyakucita, na wino namakusontelela ali wino ulinzile kumupaka amafuta.”

⁴ Samueli pali pakucita vino Yawe atamunena. Akatuka alulema nu kuya ku Betelemu, kuno aikolo yacincile ukwiza mukomenkanya. Lino yamulola ale yakuizakazila sile. Alino iyamuzya iyati, “Kuli ci yame?”

⁵ Nawe aasuka ati, “Awe mukwai kuli cele. Niza sile ku kupeela impolelwa kuli Yawe. Mwemo muisangulule tuye swensi ku kupeela impolelwa.” Alino asangulula Yese pamwi na ana yakwe nga ayama ku kupeela impolelwa.

⁶ Lino yafika Samueli alola Eliabu nga aelenganya ati, “Cumi kwene wikwene aimilile pa manso yakwe Yawe ali wino umwisikulu asolwile.”

⁷ Lelo Yawe anena Samueli ati, “Utalola pa milolekele yakwe isuma nanti ukutalimpa kwakwe, pano asi wino nsonsile foo. Antu yene yakalola imilolekele ya kunzi, lelo ne Yawe nkalola ivili mu mwenzo.”

⁸ Lyene Yese aama Abinadabu nga amunena kuti akaleluke pa manso yakwe Samueli. Lelo Samueli avwanga ati, “Awe, nawe kwene asi ali wino Yawe asolwile.”

⁹ Yese pali pakunena Syama ukuti nawe akapite pali Samueli. Lelo Samueli amunena ati, “Awe, nawe kwene asi ali wino Yawe asolwile.”

¹⁰ Yese apisya ana yakwe aonsi cinimbali pa manso yakwe Samueli. Lelo Samueli amunena ati, “Pali yaa yonsi pasi wino Yawe asolwile.”

¹¹ Alino Samueli auzya Yese ati, “Uzye utakweti ana aonsi nayauze?” Yese nawe aasuka ati, “Kwasyala sile kasuli wao. Lelo akucema imfwele.” Samueli nawe amunena ati, “Tuma akuyamuleta. Tusikutandika ukulya mpaka sile afike.”

¹² Fwandi vili vino Yese watumile akuyamuleta, nawe aya amuleta. Walolekanga umuyenzulukile na manso yakwe asuma, nga ni cinso cakwe cali icisuma. Alino Yawe avwanga ati, “Katuka umupake amafuta. Umuntu wi aliwe kwene.”

¹³ Samueli atoola umusazi wa mafuta amupaka pa manso ya ina yakwe yonsi. Ukutandika pa wanda kwene uwo Mupasi wakwe Yawe wikila pali Davidi nga utamusile. Lyene Samueli akatuka aswilila ku Lama.

Davidi waombela mu musolo wi sano lyakwe Saulo

¹⁴ Mupasi wakwe Yawe walanga wafuntuka Saulo, nga umupasi wankota uno Yawe watumile pali pakucuzya Saulo.

¹⁵ Aomvi yakwe iyamunena iyati, “Lola, umupasi wankota uno Yawe watuma ukukucuzya.

¹⁶ Musambazi sinena sile aomvi yako yafume yakulonda umwi uwamanya ukulizya gita. Ndi cakuti umupasi wankota wakwizila ukufuma kuli Yawe, wene alalizya ukusuka nawe uvwa ningo.”

¹⁷ Saulo ayapeela ilamulo ati, “Kalondini umuntu umwi uwamanya ukulizya ningo nga mumulete kunondi.”

¹⁸ Alino umuomvi wenga pa yaomvi yakwe amunena ati, “Mukwai nemo namanya umwana umonsi wakwe Yese umwina Betelemu ali wino wacenjela sana ukulizya gita. Wene umuntu umwi umusipe nu pya icita ca nkondo. Umucenjele mu kuvwanga nupya umuyembe, nga Yawe ali nawe.”

¹⁹ Acino Saulo atuma inkombe kuli Yese na mazwi akuti, “Ntumile Davidi umwana wako, wiyo akacema imfwele.”

²⁰ Yese nawe pali pakutoola punda amulongelezya imikate, inyambi yakwe waini na kambuzi nga anena Davidi umwana wakwe kuti atwalile Saulo.

²¹ Davidi aiza kuli Saulo nga atandika ukumuombela. Saulo atemwa Davidi wakwe cimwi, nga nawe amucita ukuya umusenda mpamba wakwe.

²² Lyene atuma akuyanena Yese ati, “Leka Davidi atwalilile ukumbombela, pano nkuzangila munoli.”

²³ Lyonsi lino umupasi wankota wikila Saulo, Davidi atoola gita wakwe aalizya. Saulo nawe pali pakukwata upemwilo. Wene auvwa ningo, nga nu mupasi wankota ufuma umusya.