1 Samueli 14 - Amazwi Yakwe Leza 2013

Ukuposya kwakwe Yonatani

¹ Uwanda umwi Yonatani umwana wakwe Saulo anena umulumendo umusenda mpamba wakwe ati, “Twende tuye ku ina Filisti kuku ku lusansa luze.” Lelo Yonatani atanenyile isi,

² wino pa nsita ilya wikalanga mwi taalu lyakwe ku Migiloni umu mbali ya musumba wa Gibeya umwisika ya cimuti ca viseekwa vya pomegeleneti. Wali pamwi na antu imyanda mutanda.

³ Pali yakwene apali Aiya, uwazwite cakuzwala ca efodi. Wene wali umwana wakwe Aitubi umwina wakwe Ikabodi, umwana wakwe Pineasi umwana wakwe Eli, uwali a simapepo wakwe Yawe ku Syilo. Kutali umwi uwamanyile ukuti Yonatani watapita.

⁴ Ku mbali zyoili izya cifoloma cifyenkane cino Yonatani walondanga ukulamba pakuti afike ku nkambi ya ina Filisti kwali imilunda iili. Onga yawamanga ukuti Bozezi, nu uze yawamanga iyati Sene.

⁵ Umulunda onga wali lwaku katutu ulunga nu ku Mikimasyi, nu uze wali lwaku kaeya ulunga nu ku Geba.

⁶ Yonatani anena umusenda mpamba wakwe ati, “Iza, tulambuke tuye ku nkambi iya viyantu vivi vino vitasilamulwa. Limwi Yawe angatwazwa. Pano kwene kutaya nanti cimwi icingalesya Yawe ukutupeela amaka ya kucimvya, ciye tuvule nanti tucepe.”

⁷ Umusenda mpamba wilya nawe aasuka ati, “Cita sile consi cino ukulonda. Ndi vino ukwelenganya, indi nawe muli vyonsi.”

⁸ Yonatani nawe avwanga ati, “Fwandi tulambe tuye kweneko pakuti antu yaya yale yatulole.

⁹ Ndi cakuti yatunena yati, ‘Lolelini papo kwene tusuke twize kunomuli,’ lyene tumalolela pakwene panotuli ukwaula ukuya kunoyali.

¹⁰ Lelo ndi cakuti yavwanga yati, ‘Izini kunotuli,’ ale lyene tumatumbela kunoyali, pano cico cimaya cili cimanyililo icakutulanga ukuti Yawe watayapeela umu makasa itu.”

¹¹ Acino yoili kwene iyasokoloka nu kulolekela ku nkambi ya ina Filisti. Aina Filisti nayo yavwanga iyati, “Silolini mwe! Ayebulai yamwi ayaya yakufuma umu viwina muno yaliyafisime.”

¹² Alino lyene iyapunda Yonatani nu musenda mpamba wakwe iyati, “Mwe, izini kuno twatitukwata ivyakumunena.” Yonatani nawe anena musenda mpamba wakwe ati, “Ndondela pacisila, Yawe watayaika mu makasa ya ina Izlaeli.”

¹³ Yonatani apakuya kunoyali, aya akusela sile ku makokola na makasa, nu musenda mpamba wakwe ale amulondile pacisila, akuyakomola.

¹⁴ Umu kuzanza ukwakutandika kuno Yonatani nu musenda mpamba wakwe wilya yacisile, yakomile antu amakumi yaili umu kacende akanono sile akali manye citika wakwe eka wenga.

¹⁵ Fwandi lyene intete izilema ivita vyonsi ivya ina Filisti ivyali mu nkambi kumwi na vivyo ivyali mu mpanga, na yayo alwisyanga. Umusili nao iwatenta. Cali icakoofya icakuzunguka ukufuma kuli Leza.

Aina Izlaeli yacimvya aina Filisti

¹⁶ Alino inengu zyakwe Saulo izyali ku Gibeya mu mpanga yakwe Benjamini izilola kuno ivita ivyali umu nkambi vikusalangana mu ntunga zyonsi.

¹⁷ Acino Saulo anena antu yakwe ati, “Pendini asilika kuti muleke tumanye yano yatiyafuma penepo.” Lino yapenda iyazana ukuti Yonatani nu musenda mpamba wakwe ali yano yasipo.

¹⁸ Saulo pali pakunena Aiya ati, “Ndetele cakuzwala ca efodi.” (Pa nsita kwene ilya Mbokosi ya Upangano yakwe Leza yali ku ina Izlaeli.)

¹⁹ Lino Saulo acili akulanda kuli simapepo, icimvulunganya mukasi ka nkambi ya ina Filisti icikulilako. Acino Saulo anena simapepo wilya ati, “Utatwalilila ukuuzya ku mwene pano umulandu watiuvwika mpiti.”

²⁰ Alino Saulo na antu yakwe yonsi iyakongana pamwi, iyatunga ni milongo ukuya ku kulwa ulwi. Lyene iyazana aina Filisti yali mu cimvulunganya icimalilike, ala yakukomana ku lupanga.

²¹ Ayebulai yaya yano walanga yaya ku kwikala pakasi ka ina Filisti, nupya yali nayo umu nkambi yao, iyasenukila ku ina Izlaeli yano yali na Saulo na Yonatani.

²² Lino aina Izlaeli yonsi yano yafisime mu mpanga ya ina Efulemu yuvwa ukuti aina Filisti yatiyutuka, nayo kwene iyaisumbamo umu ulwi nu kucocovya aina Filisti.

²³ Uwanda ulya Yawe watuuzile aina Izlaeli, nga ulwi nao watantalile ukupuzya nu ku Beti Aveni.

Ivyacitike icisila ca ulwi

²⁴ Lyene aina Izlaeli iyaongoka ku nzala pa wanda ulya, pamulandu wakuti Saulo wayapile ilamulo nu mulapo ku vita, ati, “Citipu ciye pa muntu ali wensi uwalya icakulya lino ilanzi litali liwe, nupya lino ntali incite icilanduzi pa anisi yane!” Icaleka kusi umuntu nanti wenga uwalile icakulya pa wanda ulya.

²⁵ Lyene ivita vyonsi ivisalanganila umu mutengo, nga ivizana uuci mwenemo.

²⁶ Lino yaile umu mutengo, iyazana uuci ukutona umu malela, lelo kusi nanti wenga uwapenile ku kukomfola nanti akamunwe akombe, pamulandu wakuti yali ni ntete ku ntipu zyakwe Saulo.

²⁷ Lelo Yonatani atuvwile vino isi watapeela ilamulo nu mulapo ku vita, nga atoola intuwa yakwe akomfola nu uci mwi lela, alya nga papo kwene akwata upemwilo.

²⁸ Lyene icita cimwi umu asilika cimunena citi, “So Saulo watatupeela ilamulo nu mulapo, ati, ‘Citipu ciye pa muntu ali wensi wino amalya icakulya ilelo!’ Nupya uli mulandu uno antu yaa yali ni nzala iyakulya umuntu.”

²⁹ Yonatani nawe avwanga ati, “Tata wataleta intazi ikulu pa antu. Silolini vino nemo natinkwata upemwilo pacisila cakulya utu uci.

³⁰ Si cange cizipe sana antu yaa iyalya ivyakulya vino tupokolwile ku anisi itu! Na ina Filisti ngano twatitulusya ukuyakomola pali yano twatitukoma.”

³¹ Umu wanda ulya kwene, pacisila lino aina Izlaeli yakomozile aina Filisti ukutandikila sile ku Mikimasyi mpaka ku Aiyaloni, ivita vyatonsile sana.

³² Icaleka antu iyaisumba pa visampwe vino yapokolwile umu nkondo. Iyatola imbuzi ni mfwele, ing'ombe nu twana twa ng'ombe, nga iyavifyula pa musili apatali nanti icimelwa, nga iyalya inyama kumwi nu wazi mwenemo.

³³ Lyene umuntu umwi anena Saulo ati, “Silola! Antu yiifya kuli Yawe apakulya inyama kumwi nu wazi mwenemo.” Saulo nawe avwanga ati, “Mwemwe yasomvi. Kunkulusini iciliwe icikulu kuno likwene.”

³⁴ Alino apeela ni lamulo nalyuze ati, “Salanganini umu nsakwe munene antu yonsi muti, ‘Cila muntu munomuli alete ing'ombe yakwe iyacilume yonga ni mfwele aize aifyulile nu kuilila kukwene. Mutalinzile ukwifya kuli Yawe apakulya inyama kumwi nu wazi mwenemo.’ ” Acino cila muntu aleta ing'ombe yakwe iyacilume mu usiku ulya nu kuifyulila kuku kwene.

³⁵ Lyene Saulo akuulila Yawe kavuwa, nupya kali a kavuwa kakutandika kano wene wakuulile Yawe.

³⁶ Saulo avwanga ati, “Katwapita tutentemuke usiku nu kuzanza aina Filisti, tupokolole ni vyuma vyao ukufika na pa macaca. Nupya kusi kusya nanti wenga umupuma.” Antu nayo iyamwasuka iyati, “Cita consi cino walola ukuti icingakuzipila.” Lelo simapepo aasuka ati, “Tekelini tutale tuzye kuli Leza.”

³⁷ Acino Saulo auzya Leza ati, “Uzye inje ku ina Filisti inkayazanze? Uzye umatupeela ucimvyo?” Lelo Leza atamwaswike mu wanda ulya.

³⁸ Icaleka Saulo anena yamusika ya vita ati, “Izini kuno kuti tulondelezye iifyo lino lyacitwa ilelo.

³⁹ Nupya nkulaya nu mulapo pa manso yakwe Yawe, wino akatuula aina Izlaeli, ukuti umuntu uwataifya ali nu kukomwa, nanti angala angaya umwanane Yonatani.” Lelo kusi umwi pa antu yalya uwavwanzile cimwi.

⁴⁰ Saulo pali pakunena aina Izlaeli yonsi, ati, “Mwensi kwene imililini ku lusansa lulo. Nani nu mwanane Yonatani tumaimilila ku lusansa lwa kuno.” Antu yalya pali pakumunena iyati, “Cita cino ukwelenganya ukuti icingakuzipila.”

⁴¹ Alino Saulo apepa kuli Yawe, Leza wa ina Izlaeli ati, “We Yawe, Leza wa ina Izlaeli, uzye cino utaaswike umuomvi wako ilelo icani? Ndi cakuti ukuponga kuli pali nene nanti pa mwanane Yonatani, inkuti peela uwasuko ku kaliwe kakwe ulimu. Lelo ndi cakuti ukuponga kuli pa antu yako aina Izlaeli, inkuti peela uwasuko ku kaliwe kakwe Ulimu.” Lyene iciponela pali Yonatani na Saulo, antu yene iyapusuka, iyafumamo.

⁴² Lyene Saulo avwanga ati, “Pendolini pakasi kane na Yonatani umwanane.” Awe mukwai icilema Yonatani.

⁴³ Alino Saulo avwanzya Yonatani ati, “Nena cino watucita.” Acino Yonatani nawe amunena ati, “Inalya sile utuuci ku mpela ya ntuwa ino nali nakomfola penepo. Ndakai apanondi, nupya njiteinye ukufwa.”

⁴⁴ Saulo alaya nu mulapo ati, “Leza andye nanti ancitile iciipe icili consi, ndi cakuti usikufwa wewe Yonatani!”

⁴⁵ Lelo antu iyanena Saulo iyati, “Uzye Yonatani ali nu kufwa, Yonatani uwatalenga na kuti Izlaeli akululwe apakalamba? Cipelele ukutali! Twalapa umwi zina lyakwe Yawe waumi ukuti ulunyele nanti longa ku mutwe wakwe lusikupona pansi, pano wene waliwacita cii ilelo umu wazwilizyo wakwe Leza.” Fwandi vili vino antu yapuswisye Yonatani, nu kumukoma yatamukomile foo.

⁴⁶ Lyene Saulo ata ukuzinganya aina Filisti, nga nayo iyaswilila ku mpanga yao.

Utesi wakwe Saulo na akazi kakwe

⁴⁷ Lino Saulo walasikwe pa cilimba ca wene wa ina Izlaeli, wene walwisizye anisi yakwe konsi konsi, aina Moabu, aina Amoni, aina Edomu, yamwene aku Zoba, na ina Filisti. Fwandi konsi sile kuno wayanga, wene wayacimvyanga.

⁴⁸ Wene walwisizye iconsiconsi nu kucimvya aina Amaleke, akulula aina Izlaeli ku makasa yakwe yao ayazanzanga.

⁴⁹ Ana aonsi yakwe Saulo yali a Yonatani, na Isyivi, na Malikisyua. Na yaa ali mazina ya ana yakwe anaci: nyinalenzi wali a Melabi, nga umuto wali a Mikala.

⁵⁰ Umuci wali a Ainoamu umwana wakwe Aimaazi. Musika mukalamba uwa vita vyakwe Saulo wali a Abineli umwana wakwe Neli. Neli nawe wali a nyinalume wakwe Saulo.

⁵¹ Kisyi isi wakwe Saulo nga na Neli isi wakwe Abineli yali ana yakwe Abiyeli.

⁵² Kwali kweneko inkondo ikakate sana iyakulwisya aina Filisti mu manda yonsi ya umi wakwe Saulo. Lyene lyonsi lino Saulo walola umonsi umwi uwalolekanga uwamaka nanti umusipe, ala amamutola nu kumucita icita cakwe.