1 Samueli 13 - Amazwi Yakwe Leza 2013

Aina Izlaeli yalwisya aina Filisti

¹ Saulo wali ni myaka amakumi yatatu lino wizile aya umwene, nga wene wateesile aina Izlaeli pa myaka amakumi yani na iili.

² Saulo wasolwile aonsi amazimbi yatatu ukufuma mu Izlaeli. Muli yakwene, antu amazimbi yaili yali pamwi nawe ku Mikimasyi nga nu ku Betele ku mpanga iya myamba, nga yauze izimbi lyonga yali na Yonatani ku Gibeya mu mpanga yakwe Benjamini. Antu yonsi asyala wayatumile iyaswilila kumwao.

³ Yonatani wacimvizye inkambi ya ina Filisti ku Geba, nga na ina Filisti iyuvwa pali cii. Lyene Saulo pali pakulizya intandala umu mpanga ilya yonsi avwanga ati, “Lekini Ayebulai yonsi yuvwe!”

⁴ Aina Izlaeli yonsi iyanenwa ukuti Saulo watacimvya inkambi ya ina Filisti, nu kuti aina Izlaeli lyene iyapatikwa wakwe cimwi ku ina Filisti. Acino antu iyazumila ulwamo ulwakuya ku Giligali pamwi na Saulo.

⁵ Aina Filisti nayo iyakongana ku kulwa na ina Izlaeli, yala yakweti amaceleta amazimbi yatatu, na asilika amu maceleta nayo amazimbi mutanda, nga ni vita ivivule wa musensenga uwamu nkumba yakwe yemba. Iyatumbela iyaya yakuula insakwe ku Mikimasyi, lwaku ufumondaka wa Betaveni.

⁶ Lino aina Izlaeli yalola ukuti lyene catala, pamulandu na ina Filisti kuyawilila na maka, iyatandika ukufisama umu macele na muli yapolowe alino nu mutumamfyata twa mawe kumwi numu vifula.

⁷ Yamwi nayo iyalamba Luzi lwa Yodani iyaya mu mpanga iya ina Gadi nu mu mpanga iya Gileadi. Saulo wene wasile ku Giligali, nga ni vita vyonsi ivyali nawe vila vikuzakaza ku ntete.

⁸ Saulo alolela pa manda cinimbali kuti Samueli aize wakwe muno wapingwile. Lelo Samueli atizile ku Giligali, nga antu yakwe Saulo iyatandika ukusalangana iyasya Saulo.

⁹ Acino Saulo avwanga ati, “Ndetelini uwila wakoca nu wa utandano.” Nga Saulo apeela uwila wakoca.

¹⁰ Lyene lino wamalila sile ukupeela uwila wakoca, Samueli nawe afika, nga Saulo aya ku kumukomenkanya nu kumuzengela.

¹¹ Lelo Samueli amuuzya ati, “Uzye ivyani vino watucita?” Saulo nawe aasuka ati, “Lino nalinalola ukuti antu yatandika ukusalangana nu kunsya, nu kuti wemo utizile pa nsita wakwe muno wapingwilile, nu kuti aina Filisti yakukongana ku Mikimasyi,

¹² nalinelenganya nati, ‘Aina Filisti yamatuzanza pano kwene pa Giligali, nga nupya ntezizye ukulenga Yawe kuti atwazwe.’ Acino cali campamvya kuti ningapeela uwila wakoca.”

¹³ Samueli nawe amwaasuka ati, “Waliwacita ivyauwelewele. Watukana ukusunga isunde lino Yawe Leza wako wakunenyile. Ulisunga sile, wene wange aleke wewe na amu mupanda wako yateeka aina Izlaeli amanda pe.

¹⁴ Lelo ndakai uwene wako utamalengela. Yawe watailondela umuntu muze wino akasi nu kumulasika utesi pa antu yakwe, pamulandu wakuti wemo wakana ukusunga isunde lyakwe.”

¹⁵ Lyene Samueli afuma ku Giligali nga alungama ku Gibeya umu mpanga yakwe Benjamini, nga Saulo apenda antu yano wali nayo. Yonsi pamwi impendwa yali manye imyanda mutanda.

¹⁶ Saulo na Yonatani umwana wakwe nga na antu yano yali pamwi nayo yakuuzile insakwe mu Geba mu mpanga yakwe Benjamini, lino aina Filisti yene yikalanga ku Mikimasyi.

¹⁷ Ivita ivyayanga ku kuzanza ivifuma mu nkambi ya ina Filisti nga ivilungama ku ntunga zitatu. Impuka yonga ilungama ku Ofula ku mpanga ya Syuali,

¹⁸ ni mpuka yuze ilungama ku Beti Holoni, nga yakwe citatu ilungama lwaku mupaka ukulolenkana papela ya Cifoloma ca Zeboimu nu lwanga ululi ukulutwe.

¹⁹ Umu mpanga yonsi iya ina Izlaeli mutali nanti musyanyi wenga, pamulandu wakuti aina Filisti yavwanzile iyati, “Pano limwi Ayebulai yangaisulila impanga na masumo!”

²⁰ Acino aina Izlaeli yonsi iyatentemukila ku ina Filisti ku kunyolesya amase yao yakwe yapulao, na yamukolo, ni zyampasa, ni vikwakwa.

²¹ Umutengo uwakunyolesya amase yakwe pulao na yamukolo wali ukulingana na kalikowili konga ka masyekele, nga nu wakunyolesya yafoloko na mase nu kusongozya utumiti twakukunkizya yamasaye nao wali amakowili yaili.

²² Acino pa wanda uno inkondo yakatwike patali umuntu nanti wenga pa antu yakwe Saulo na antu yakwe Yonatani, wiyo uwakweti ulupanga nanti isumo umu minwe yakwe. Suka sile Saulo na Yonatani umwana wakwe ali yano yaipangisye.

²³ Aina Filisti yatumile impuka yonga iya vita ku cifoloma cifyenkane icaku Mikimasyi kuti yakaalonda kweneko.