1 Samueli 12 - Amazwi Yakwe Leza 2013

Samueli wavwanga ku antu

¹ Alino Samueli anena aina Izlaeli yonsi ati, “Nuvwile ku mazwi inu muli vyonsi vino mwanenyile nga nani imupeela umwene uwa kumuteeka.

² Lyene ndakai mukweti uwa kumutungulula. Nemo lyene natinkota, nupya indi ni imvwi na ana yane aonsi yali pamwi namwe. Namutungululanga ukutandika sile mu ulumendo wane ukufika na ndakai.

³ Anene apanondi, munsinile pa manso yakwe Yawe na pa manso ya muntu wino watansonta ukuya umwene winu. Uzye aweni wino natazile intolela masaye wakwe nanti punda wakwe? Nanti wino natolile ivintu mu ucenjezi? Uzye aweni wino nacuzizye? Akuli weni kuno natoozile amafukakanwa? Ndi cakuti akunoli wino nacitile cimwi pali vii, mukwai namamuwezezya.”

⁴ Alino nao iyamwasuka iyati, “Awe, utatala watutolela cimwi mu ucenjezi nanti ukutucuzya, nupya utatala watola amafukakanwa ku muntu ali wensi.”

⁵ Samueli nawe ayanena ati, “Yawe pamwi nu mwene wino watasonta ali kambone akupeela umboni uwakuti mutanzanyile nu mulandu uli onsi.” Nayo yavwanga iyati, “Endi, wene akambone.”

⁶ Lyene Samueli anena antu ati, “Yawe umwisikulu aliwe wasolwile Mose na Aaloni nga afumya ivikolwe vinu mu mpanga ya Eguputo.

⁷ Acino fwandi lyene imililini pano, nga nani namamusinila pa manso yakwe Yawe, pamulandu ni vizungusyo vyonsi vino Yawe wacitile mwemwe ni vikolwe vinu.

⁸ Lino Yakobo na ana yakwe yatentemukile ku Eguputo, yene yalilile kuli Yawe kuti ayazwilizye, nga Yawe pali pakutuma Mose na Aloni, yao ayafumizye mu mpanga ya Eguputo iyayaleta yikala mu ncende ii.

⁹ “Lelo yene yilile Yawe Leza wao. Icaleka wene ayapeela mu makasa yakwe Sisela, musika mukalamba uwa vita vya mwene waku Hazoli, nu mu makasa ya ina Filisti, nu mu makasa ya mwene wa ina Moabu, yayo yonsi ayalwisizye.

¹⁰ Lyene iyalilila kuli Yawe kuti ayazwe, iyati, ‘Twatitwifya pa kukufutatila we Yawe nu kutumikila maunkolanya yakwe Baali na yakwe Asyitaloti. Lelo ndakai tutuule ku anisi itu, nga naswe tumakupepa!’

¹¹ Alino Yawe atuma Yelubaali, na Balaki, na Yefuta, na Samueli, nga amutuula ku makasa ya anisi inu, nga namwe imwikala mu mutende.

¹² “Lelo lino mwemo mwaweni ukuti Naasyi umwene wa ina Amoni wamukatukila, mwanenyile imuti, ‘Awe! Tukulonda umwene uwa kututeeka,’ nanti angala umwene winu wali a Yawe Leza winu.

¹³ “Aleni fwandi wii ali mwene wino mwasolwile, wino mwalenzile, nupya wino Yawe walasika uwene pali mwemwe.

¹⁴ Ndi cakuti mumaoopa Yawe nu kumutumikila nu kumuuvwila nu kuyela amasunde yakwe, nga ndi cakuti mwemwe pamwi nu mwene wino akumuteeka mwaya acumi kuli Yawe Leza winu, ale lyene ivintu vyonsi vilamuzipila.

¹⁵ Lelo ndi mwala mwakana ukuvwila Yawe, nupya ndi mwakana ukuyela amasunde yakwe, ale lyene alamulyolyosya kumwi nu mwene winu kwene.

¹⁶ Acino mutekele nu kulola icintu cii icikulu cino Yawe wasya acite pa manso inu!

¹⁷ Uzye ndakai asi insita iyakuzombola ingano? Fwandi lyene namalaizya kuli Yawe pakuti atume ukupangalansya ni mvula. Namwe alino mumamanya ukuti mwifya sana kuli Yawe apakuilengela umwene.”

¹⁸ Icaleka Samueli apepa kuli Yawe, nga uwanda kwene ulya Yawe atuma ukupangalansya ni mvula. Acino antu yonsi pasi pakuvwa intete sana pamulandu na Yawe nga na Samueli.

¹⁹ Alino antu yonsi pamwi iyanena Samueli iyati, “Sungala utupepele swe aomvi yako kuli Yawe Leza wako pakuti tutafwa, pasi pano twatitulunda pa maifyo itu yonsi iifyo lii ilya kuilengela umwene.”

²⁰ Samueli nawe aasuka ati, “Mutuvwa intete. Nanti angala mwacisile inkota zi zyonsi, mutata ukupepa Yawe. Lelo mwamutumikila ni myenzo inu yonsi.

²¹ Mutasenukila ku kulondela tuleza tuluwi. Twene tutangamucitila ivisuma, nanti ukumutuula, pamulandu wakuti utwaciwelewele.

²² Pasi pano pamulandu wakucindika izina lyakwe ilikulu Yawe atalamutazyela awe, pamulandu wakuti wene walapa nu mulapo ukuti amamucita ukuya antu yakwe kololo.

²³ Nemo ne Samueli, cipelele ukutali ukwifya Yawe pa kuposiwa ukupepela mwemwe. Namamusambilizyanga imiyele isuma nupya iyampomvu.

²⁴ Mwemo mulinzile ukuvwila Yawe intete nu kumutumikila ni myenzo inu yonsi. Tala iusyini ivintu ivikulu vino wene wamucitila.

²⁵ Lelo ndi cakuti mwatwalilila ukucita inkota, ale lyene mulononwa, mwemwe kumwi nu mwene winu kwene.”