1 Samueli 11 - Amazwi Yakwe Leza 2013

Saulo wacimvya aina Amoni

¹ Lino papisile sile manye umwezi onga, alino Naasyi umwina Amoni aya azinguluka umusumba wa Yabesyi Gileadi nga auzanza. Alino lyene aonsi yonsi amu musumba wa Yabesyi iyamunena iyati, “Leka tuvwane sile tupangane ni cipangano, nga naswe tumakuvwilanga nu kukuombela.”

² Nawe Naasyi umwina Amoni aasuka ati, “Kwene ukupangana tungapangana cipangano, lelo suka sile intale intonkole cila muntu apakasi kinu ilinso ilya kuli ndilo, pakuti ciletele aina Izlaeli umuzewanya.”

³ Alino intunguluzi izya ina Yabesyi iziti, “Fwandi utale utulolele kweneko pa manda cinimbali, pakuti tutume intumi umu mpanga yonsi iya Izlaeli. Ndi cakuti kutalaya umuntu nanti wenga aliza ku kutuula, ale lyene tulacimba kunomuli.”

⁴ Lino intumi zizi zyafika ku Gibeya, kuno Saulo wikalanga, nu kufisya amazwi ku antu, yonsi kwene iyatandika ukulila nu kupoma.

⁵ Pa nsita kwene ilya walanga Saulo akufuma ku vyalo ala atakolezya yamasaye yakwe, nga auzya ati, “Uzye icani icikucitika ku antu? Uzye pacani cino yakulila nu kupoma?” Nayo fwandi pali pakumunena amazwi ali yamwi kwene, yano aina Yabesyi yali yalanda.

⁶ Lino Saulo uvwa amazwi yao, Mupasi wakwe Leza iwikila panoli na maka nga asoka wakwe cimwi.

⁷ Alino atoola yamasaye yalya yaili, ayaputola mu tumpilinsya mpilinsya, nga apeela tumpilinsya tutu ku ntumi zizi. Alino azituma monsi umu mpanga ya Izlaeli na mazwi ausoko akuti, “Vivyo ivili nu kucitika kuli yamasaye yakwe wiyo wensi umwina Izlaeli uwakana ukulondela Saulo na Samueli.” Fwandi vili vino lyene iciletela umuntu wensi intete izyakoopa Yawe, nga yonsi kwene iyakatuka pamwi nu mwenzo onga.

⁸ Saulo ayakonganika pamwi ku Bezeki. Aina Izlaeli ayakonganika ukufika nu ku mpendwa amazimbi 300,000. Alino yakwe Yuda nayo amazimbi 30,000.

⁹ Alino iyanena intumi zizi izyatumilwe kunoyali, iyati, “Kanenini aonsi amu Yabesyi Gileadi muti, ‘Mutondo lino ilanzi litali lifike umutwe papela, mulatuulwa.’ ” Lino intumi zizi zyaya zyanena aonsi amu Yabesyi amazwi ya, nayo pasi pakuzanga wakwe cimwi,

¹⁰ nga iyanena Naasyi, iyati, “Mutondo tulacimba kunuli, nga nawe uce ucite consi kunotuli cino cingakuzipila.”

¹¹ Vili vino umu usiku wa wanda ulya Saulo apaatula antu yakwe mu mpuka zitatu, nga uwanda uwalondelilepo, pa macaca iyasimwila mu nkambi ya anisi yao nu kukomola aina Amoni ukufika lino akasanya kakoma. Na yao apuswike iyasalangana, cakuti kutali antu akuti yapite yaili.

¹² Alino lyene aina Izlaeli iyanena Samueli iyati, “Uzye antu yaya akanyile ukuti Saulo aye umwene wao yali kwi? Yaletini kuli sweswe pakuti tuyakome!”

¹³ Lelo Saulo aasuka ati, “Kusi nanti wenga angakomwa umu wanda wilelo, pano apilelo Yawe watakulula aina Izlaeli.”

¹⁴ Alino Samueli ayanena ati, “Twendini twapita ku Giligali nga nupya kwene kuku akuno tukalande apaswe ukuti Saulo umwene witu.”

¹⁵ Acino yonsi kwene iyaya ku Giligali, nga kuku kwene pa manso yakwe Yawe iyazengela uwene wakwe Saulo. Kuku kwene akuno yaile yapeela impolelwa izyacuvwano pa manso yakwe Yawe, nga Saulo na ina Izlaeli yonsi iyazevya uwanda uwo wakwe cimwi.