1 Samueli 10 - Amazwi Yakwe Leza 2013

¹ Lyene Samueli atoola umusazi wa mafuta ya miolivi ayapongolwela pa mutwe wakwe Samueli nga amutonsola, nga amunena ati, “Yawe umwisikulu aliwe wakusonta kuti uye umwene wa antu yakwe aina Izlaeli. Wewe uli nu kuteeka antu yakwe Yawe nu kuyatuula ku anisi yao, yano yayalizizya. Wemo ulapelwa icimanyililo ica kukulanga ukuti Yawe watasonta wewe ukuya umwene wa antu yakwe.

² Amala sile twapalukana, umakomenkanya antu yaili aonsi mu pipi ni cele lyakwe Lakeli ku Zeliza umu mpanga yakwe Benjamini. Yene yamaya yakakunene yati, ‘Yapunda yano watenwike uya ku kuyalonda yaloleka. Nga so lyene wata ukusakamala pamulandu wakwe yapunda. Lyene wasyala akwelenganya sile pali wewe.’ Wene acili akuilizyanya ati, ‘Uzye namacita cani pa mwanane?’

³ “Alino nupya umaya ukafume papa mpaka usuke ukazane icimuti icikulu caku Taboli. Akuli kuno umaya ukakomenkanye aonsi yatatu yakuya ku Betele ku kupepa. Wenga pali yayo ale asenzile utwana twa mbuzi tutatu. Umuze nawe imikate itatu, nga na wakwe citatu ala asenzile inyambi yakwe waini.

⁴ Yamaya yakakulamuke yakupeele ni mikate iili ino nawe umaya ukapokelele.

⁵ “Pacisila cakwe vivyo umaya ukaluleme nu kuya ku Gibeya, umwamba wakwe Leza kuko kuno kuli nkambi ya ina Filisti. Lino umaya ukapalame ku musumba, waya komenkanya akaliumba kakwe yakasema yano yakuweluluka ukufuma ku kavuwa pa mwamba. Lilyo ale yakulizya yabanjo, tungoma, imitolilo nga na yababatoni, alino nu kusema ale yakusema.

⁶ Umupasi wakwe Yawe umaya ukikile panuli na maka, nga nawe wayatandika ukusema pamwi nayo. Wayasanguka sile umuntu umwi muzemuze.

⁷ Lino ivimanyililo vii vyonsi vyaya vyaloleka, uye ukacite icintu icili consi cino wayalola ukuti acili cino cingakuzipila, pasi pano Leza ali nawe.

⁸ “Alino ukatentemukile nu kukolela ku Giligali. Akuli kuno ndiza nkuzane nu kupeela amawila yakoca na autandano. Lelo uce ulolele kuku amanda cinimbali pakuti nkize nkakulange ivyakucita.”

⁹ Lino Saulo wafutatila sile Samueli, Leza asenula umwenzo wakwe Saulo, nga ni vimanyililo vii vyonsi vyafikiliziwe uwanda kwene ulya.

¹⁰ Lino yafika ku Gibeya, akamulongo kakwe yakasema ikamukomenkanya. Alino Mupasi wakwe Yawe wikila panoli na maka, nga nawe atandika ukusema pamwi nayo.

¹¹ Lino antu yonsi amumanyile mpiti vino waya yalola ukuti nawe kwene akusema wakwe yakasema, iyuzyanya iyati, “Mwe! Uzye icani cii cino cacitikila umwana wakwe Kisyi? Uzye kuli kuti Saulo nawe kwene aumwi pali yakasema?”

¹² Umonsi umwi uwikalanga kuku aasuka ati, “Uzye fwandi yakasema kwene yaa ana yakwe weni?” Fwandi vili vino umuvwango iusuka uya kweneko uwakuti, “Uzye kuli kuti na Saulo kwene aumwi uwamuli yakasema?”

¹³ Lino Saulo wamala ukusema, atumbela aya ku kavuwa.

¹⁴ Alino lyene isi umukalamba wakwe Saulo amuuzya pamwi nu muomvi wakwe ati, “Uzye aukwi kuno mwaile?” Saulo nawe amwaasuka ati, “Twafuma ku kulonda yapunda aponzile. Lino twaweni ukuti twaposiwa ukuyazana, vili vino twaile kuli Samueli.”

¹⁵ Isi umukalamba wakwe Saulo pali pakuvwanga ati, “Napapata unene vino Samueli waile amunena.”

¹⁶ Saulo nawe pali pakunena isi umukalamba ati, “Kwene Samueli watunenyile apaswe ukuti yapunda yaloleka.” Lelo wene atanenyile isi umukalamba pamulandu wa wene uno Samueli wamunenyile.

Saulo walasikwa Utesi

¹⁷ Samueli atuma akuya ama aina Izlaeli kuti yakongane ku kupepa Yawe ku Mizipa

¹⁸ nga ayanena ati, “Yawe, Leza wa ina Izlaeli, watavwanga ati, ‘Anene namufumizye mu mpanga ya Eguputo, nu kumutuula ku ina Eguputo nu ku mawene yonsi amucuzyanga.’

¹⁹ Lelo mwemo mwatimukana Leza winu, wino akamutuula ku ntazi zinu zyonsi na kuli vyonsi vino vikamusakamika. Mwemo mwavwanga mwati, ‘Awe! Tupele sile umwene uwakuti atuteeka.’ Acino fwandi yangini mutantame pa manso yakwe Yawe umu mitundu inu ni miiko inu.”

²⁰ Alino Samueli apalamika imitundu yonsi iya ina Izlaeli, nga umutundu wakwe Benjamini auno usololwa.

²¹ Lyene Samueli pali pakupalamika umutundu wakwe Benjamini, uluko nu luko, nga uluko lwakwe Matili ilusololwa. Alino lyene apakusyalikizya Saulo umwana wakwe Kisyi asololwa. Lelo lino yamulonzile, yatamuweni.

²² Acino iyatwalilila ukuuzya Yawe iyati, “Uzye umuntu wi wataiza pano?” Yawe aasuka ati, “Awiyo afisime mu viya.”

²³ Icaleka antu iyutuka iyaya yamuleta kwi umba. Lino wimilila apakasi ki umba, wene aloleka umutali ukuluta antu yonsi. Asyala yonsi yapeelelanga sile umu vipeya vyakwe.

²⁴ Samueli anena antu yonsi ati, “Uzye mwailolela umuntu wino Yawe wasolola? Kusi nanti wenga wino yalingine nawe pali mwemwe.” Antu yonsi nayo yaasuka iyapunda iyati, “Si kalukuwala kuli we mwene!”

²⁵ Alino lyene Samueli alondolwela antu insambu zyakwe kateeka ni milimo yakwe. Alemba umu lupapulo nu kulwika umu ncende yamuzilo pa manso yakwe Yawe. Alino lyene asalanganya na antu kuti lyene yangaswilila kumwao.

²⁶ Saulo nawe kwene apita kumwao ku Gibeya, ni umba lya vita lyamulondela, yao yano Leza watonsizye imyenzo.

²⁷ Lelo intalanganyi zimwi zivwanga iziti, “Uzye umuntu kwene wii angatutuula uli?” Yene yasuuzile Saulo nupya yatamuletile nanti uwila umwi. Lelo wene wasuuzile sile.