1 Petulo 4 - Amazwi Yakwe Leza 2013

Kwikala umi upya

¹ Klistu wacuzile ku mwili lino wali pano pa nsi. Acino namwe kwene mulinzile kuikomelezya mweisikulu ni myelenganyizizye ili yonga na ino wene wakweti. Pano wino wensi uwacula ku mwili ala wene asyakukumako ku kwifya nupya.

² Kufuma ndakai lino mucili muno nsi mulinzile kuleka umi winu watungululwa nu kulonda kwakwe Leza. Mutaleka vilondwa vya untunze vyamutungulula.

³ Mwemo mwasumvile nsita mu kucita vintu wa antu atataila Leza. Mwemo mwacitanga vya winyi, mwali ni mbunu, mu ukolesi, nu mu kuwowota, mu muzangalwe mu nsaka zya ukolesi, nga nu mumipepele iya winyi ya tuluwi.

⁴ Ndakai atataila Leza yakuzunguka apakuzana ukuti musyakukumako mu kuzenzemba pamwi nao. Caleka yakumutuka.

⁵ Lelo yalalondolola kuli Leza wino waiteyanya kupingula antu aumi na afwe kwene.

⁶ Uli mulandu uno Ilandwe Lisuma lyakosozilwe nu ku afwe kwene. Na pacisila ca kupingulwa pa vicitwa vino yacisile lino yacili nu umi, kuti mipasi yao iye nu umi ndi vino Leza waya nu umi.

Muye yakangalila asuma ya mawila kufuma kuli Leza

⁷ Mpelelekezyo ya vintu vyonsi yatipalama. Mulinzile kuikanya, nupya pempulini kuti muye na maka akupepa.

⁸ Kuluta pali vyonsi, mutemwane nu mwenzo onsi, pano kutemwa kukalenga kwelelana maifyo aingi.

⁹ Mwazengelana mu mang'anda inu kwaula kuilizyanya.

¹⁰ Cila muntu akangalila wa wila pa mawila apusane kufuma kuli Leza. Acino umwangalizi musuma alinzile kuomvya uwila uiyele mu kwazwa antu yauze.

¹¹ Wino wensi akakosola alinzile kukosola mazwi yakwe Leza. Wino wensi akatumikila alinzile kutumikila na maka yano Leza akamupeela, pakuti Leza atasiwe muli vyonsi. Klistu awino alalenga kuti cii cicitike. Lulumbi na maka ivyakwakwe manda pe. Ameni.

Kucula pamulandu wakuya ina Klistu

¹² Mwe yacuza akundwe, mutazunguka pa kupita mu macuzi aipe apa kweziwa, kwati cintu cimwi cisyacitika camuponela.

¹³ Lelo zangini pano mukukumako ku macuzi yakwe Klistu, kuti muce muye nu luzango cuze lino alaloleka mu lulumbi.

¹⁴ Alongo amwemwe ndi cakuti antu yamutuka pamulandu wakulondela Klistu. Cii cikulanga ukuti Mupasi wa lulumbi, Mupasi wakwe Leza ali namwe.

¹⁵ Umwi uwa munomuli ndi wacula, lekini citaya pamulandu wakuti wene inkomi nanti umwivi nanti cipondo nanti wino akaitumpa mu vintu vitamupazi.

¹⁶ Nanti cingaya vivyo, ndi mwacula pamulandu wakuti mwemwe ina Klistu, mutuvwa insonyi. Lelo taizyini Leza pano mwemwe yakwe Klistu.

¹⁷ Insita yakutandika upinguzi yatifika nga antu yakwe Leza ayano yalatandika kupingulwa. Upinguzi wakwe Leza ndi watandika munotuli, uzye lyene mpelelekezyo ya upinguzi ilaya uli kuli yao asyayela Ilandwe Lisuma kufuma kuli Leza?

¹⁸ Cili ndi vino calembwa mu malembelo cati, “Ndi antu akacita vyawololoke cilayatalila kutuulwa, uzye lyene cilaya uli ku antu akaifya nupya asyacindika Leza?”

¹⁹ Acino, yao akucula pamulandu wa kulonda kwakwe Leza, yene yalinzile kucita visuma nu kutaila Kaumba wino waya uwakutailwa.