1 Petulo 3 - Amazwi Yakwe Leza 2013

Kulanda vya pa aci na yaiya yao

¹ Mu musango uli onga kwene mwe anaci mulinzile kuyela yaiya inu, pakuti ndi umwi munomuli wino atataila mazwi yakwe Leza walola vicitwa vinu visuma, nawe kwene ataile. Citange cilondekwe kuti mulande izwi kunoyali,

² pano yalalola vino micitile inu yaya isuma nupya iya mucinzi.

³ Mutalinzile kuomvya vimwi vya kunzi kuti muiyemvye, wakwe vii, kuluka inyele, nanti kwikako tuyembelo, nanti vyakuzwala vino mukazwala.

⁴ Lelo kuyemba kwinu kulinzile kuya ukwa mukasi kinu, ukwa kukwata myenzo ifuke nupya itekele manda pe. Pa manso yakwe Leza cii icili campomvu kuluta.

⁵ Pano na anaci yampiti amuzilo ataila Leza nao yaiyemvyanga aisikulu pa kuyela yaiya.

⁶ Sala nawe avino wacitanga. Wene wayelanga Abulaamu nu kumwama ukuti musambazi wakwe. Ndakai mwe anaci mukoline na Sala ndi mukucita visuma kwaula koopa cimwi.

⁷ Mu musango uli onga kwene mwe onsi namwe mulinzile kwikala na aci inu nu kumanya ukuti yene antu atonte kuluta mwemwe. Mwayacindika, pano yene pali pamwi namwe mulapelwa umi wape. Uu, uli wila kufuma kuli Leza. Citini cii pakuti kutaya cintu cimwi cakumuvulunganya mu mapepo inu.

Kucula pamulandu wa kucita visuma

⁸ Mukumalila, mwensi kwene mulinzile kuya a mwenzo onga nu kuvwilana ulanda kuli kumwi. Mwatemwana wa ina ataila, mwauvwilana luse nu kufukilana.

⁹ Mutawezezyanya viipe nanti ntipu. Lelo ndi umwi wamucitila ciipe, mwemo mumupolelele. Pano kupolelelwa akuno Leza wamulavile lino wamusolwile.

¹⁰ Cili ndi vino calembwa mu malembelo cati, “Wino wensi akalonda kuilyokezya nu umi nga nu tusita twa nsansa, wene alinzile kufuma kukulanda viipe. Nupya alinzile ate kutumpoka.

¹¹ Wene alinzile kuzenzuka ku viipe, atandike kucita visuma. Nupya alinzile kucita vya kuleta mutende nu mwenzo wakwe onsi.

¹² Pano Mwene akalolekesya pa antu akacita vyawololoke, nu kuvwa mapepo yao. Lelo wene akakanya yao akacita viipe.”

¹³ Ndi mukulondesya kucita cisuma, uzye aweni angacita viipe kunomuli?

¹⁴ Lelo muli nu longo nanti mungacula pamulandu wakucita visuma! Mutoopa umuntu umwi, nupya mutasakamikwa.

¹⁵ Lelo mukwatile Klistu coopo mu myenzo inu, nupya mwamucindika wa Mwene. Muye aiteyanya lyonsi pa kwasuka umuntu umwi uwamuzya pali vino mukapaalila.

¹⁶ Lelo mwacita cii na mazwi amutembo nu mucinzi. Lekini myenzo inu iye isuma. Ndi mwacita cii ale lyene mulalenga antu insonyi, yao yano yakalanda viipe pa milimo inu isuma ya alondezi yakwe Klistu.

¹⁷ Pano cingazipisya kuti mucule pa kucita visuma kuluta kucita viipe, ndi cili kulonda kwakwe Leza.

¹⁸ Pano Klistu umwisikulu wafwile lyonga sile pamulandu wa maifyo itu. Wene wali uwakaele pa kufwila yakaifya, pakuti amutungulule kuli Leza. Wene wakomilwe, lelo aya nu umi ku mupasi.

¹⁹ Lino wali mu mupasi, wene waile akosola ku mipasi inyepwe.

²⁰ Ii yali mipasi yakwe yao atayelanga Leza mu manda yano Nowa wapanganga cange. Lelo Leza waitekelile. Antu yanono sile kulingana na cinani, yano ali mu cange, alio yatuuzilwe ku manzi.

²¹ Manzi yaya yali icilangililo casontelelanga ku luwatizyo luno lukumutuula ndakai. Lwene lusi wa kufulwa kwa mwili, lelo kupapatila Leza kuti yakampingu itu yaswefiwe kupitila mu kuzyukuka kwakwe Yesu Klistu kufuma ku afwe.

²² Ndakai Klistu waya kwiyulu kuno atenzi kwi kasa lilunji lyakwe Leza, nupya akuteeka pa angeli, na maka yonsi amwiyulu.