1 Milandu 9 - Amazwi Yakwe Leza 2013

Antu awezile ukufuma ku uzya

¹ Aina Izlaeli yonsi yatantikwe ukulingana ni ndupwa zyao, wakwe vino calembwa mu lupapulo lwakwe yamwene aku Izlaeli. Antu aku Yuda yasenzilwe ku uzya mu Babiloni pamulandu wakuti yatali akutailwa.

² Lyene ankolelo ukuwela nu kwikala mu mpanga yao nu mu misumba yao yali aikazi yamwi aku Izlaeli, aina Levi na aomvi yamu Ng'anda ikulu yakwe Yawe.

³ Antu amu mutundu wakwe Yuda, na wakwe Benjamini, na wakwe Efulemu, nga na wakwe Manase aile umu kwikala umu Yelusalemu aeya:

⁴ Utai umwana umonsi wakwe Amiudi, umwana umonsi wakwe Omuli, umwana umonsi wakwe Imuli, umwana umonsi wakwe Bani, uwamu mupanda wakwe Pelezi umwana umonsi wakwe Yuda.

⁵ Amu mupanda wakwe Syilo yali a Asaiya, iyeli lyakwe, nga na ana yakwe aonsi.

⁶ Uwamu mupanda wakwe Zela wali a Yewele. Antu ukufuma mu mutundu wakwe Yuda yonsi pamwi yali 690.

⁷ Amu mupanda wakwe Benjamini yali a Saluu, umwana umonsi wakwe Mesyulamu, umwana umonsi wakwe Hodaviya, umwana umonsi wakwe Hasenua,

⁸ Ibeneya umwana umonsi wakwe Yeloamu, Elaa umwana umonsi wakwe Uzi, umwana umonsi wakwe Mikili. Nga a Mesyulamu umwana umonsi wakwe Syefatiya, umwana umonsi wakwe Leweli, umwana umonsi wakwe Ibiniya.

⁹ Antu amu mupanda wakwe Benjamini, ndi muno yatantikwa mu ndupwa zyao yali 956. Aonsi yonsi yaa yali intunguluzi zya ndupwa zyao.

Yasimapepo aikalanga mu Yelusalemu

¹⁰ Muli yasimapepo, pali Yedaya, Yeoyalibu, Yakini,

¹¹ na Azaliya umwana umonsi wakwe Hilikiya, umwana umonsi wakwe Mesyulamu, umwana umonsi wakwe Zadoki, umwana umonsi wakwe Melaiyoti, umwana umonsi wakwe Aitubi, uwali akangalila wa Ng'anda ikulu yakwe Yawe.

¹² Adaya umwana umonsi wakwe Yeloamu, umwana umonsi wakwe Pasyuli, umwana umonsi wakwe Malikiya, nga na Maasai umwana umonsi wakwe Adiyeli, umwana umonsi wakwe, umwana umonsi wakwe Yazela, umwana umonsi wakwe Mesyulamu, umwana umonsi wakwe Mesyimeleti, umwana umonsi wakwe Imeli.

¹³ Yasimapepo yano yali intunguluzi zya ang'anda yao, yali 1, 760. Yene yali antu amanyikisye imilimo yamu Ng'anda ikulu yakwe Yawe.

¹⁴ Amu ina Levi aeya: Syemaya umwana umonsi wakwe Hasyubu, umwana umonsi wakwe Azilikamu, umwana umonsi wakwe Hasyabiya, uwamu luko lwakwe Melali.

¹⁵ Pali na Bakibakala, Helesi, Galali na Mataniya, umwana umonsi wakwe Mika, umwana umonsi wakwe Zikili, umwana umonsi wakwe Asafu.

¹⁶ Pali na Obadiya, umwana umonsi wakwe Syemaya, umwana umonsi wakwe Galali, umwana umonsi wakwe Yedutuni, nga na Belekiya, umwana umonsi wakwe Asa, umwana umonsi wakwe Elikana, wino wikalanga ku mizi iyaku musumba wa Netofa.

Yakalinda ya Ng'anda ikulu yakwe Yawe yaku Yelusalemu

¹⁷ Yakalinda yapa mpongolo yali a Syalumu, Akubu, Talimoni, Aiimani pamwi na ina yao. (Syalumu wali intunguluzi yao.)

¹⁸ Ukufika na pa nsita ilya, amu nko zyao yapeelwanga umulimo wakulinda apa Mpongolo ya Mwene lwaku ufumondaka. Yakwene yali a yakalinda ya nsakwe zya ina Levi.

¹⁹ Syalumu umwana umonsi wakwe Kole, umwana umonsi wakwe Ebiyasafu, umwana umonsi wakwe Kola, kumwi na yakalinda yapa mpongolo ukufuma mu luko lwakwe, yapilwe umulimo wa kulinda pa mpongolo nga na pa wingililo wi Taalu lya Ukongano, ndi vino ivikolwe vyao vyalindanga pa wingililo wa Ng'anda ikulu yakwe Yawe.

²⁰ Pineasi, umwana umonsi wakwe Eleaza uwali kangalila wakwe yakalinda yapa mpongolo, nga Yawe wali nawe.

²¹ Zakaliya umwana umonsi wakwe Mesyelemiya nawe kwene wali a kalinda wapa mpongolo yi Taalu lyakwe Yawe.

²² Yaa yonsi, yano yasolwilwe ukuya yakalinda yapa mpongolo na pa wingililo yonsi pamwi yali 212.

²³ Yene pali pamwi na amu mupanda wakwe yatwalilile ukulinda impongolo zya Ng'anda ikulu yakwe Yawe.

²⁴ Yakalinda yapa mpongolo yali ku ntunga zyonsi zini, ku ufumondaka, ku uwondaka, ku katutu nu ku kaeya.

²⁵ Aina yao yano yikalanga nayo mu mizi yao, yizanga limwi limwi ku kuyazwilizya imilimo amanda cinimbali.

²⁶ Lelo aina Levi yamwi yani, yao ali intunguluzi zyakwe yakalinda yapa mpongolo, yapilwe umulimo wakusunga imiputule ya Ng'anda ikulu yakwe Yawe kumwi ni vyuma vya mwenemo.

²⁷ Usiku onsi yene yalyatokanga ukuzinguluka Ng'anda ikulu yakwe Yawe, pamulandu wakuti yakweti umulimo wakulinda Ng'anda ikulu yakwe Yawe nga nu kuyula impongolo zyaiko cila katondo.

Aina Levi nayauze

²⁸ Yamwi muli yao yapilwe umulimo wakusunga iviya vyakuomvya mu Ng'anda ikulu yakwe Yawe. Lyonsi kwene yavipendanga pakuviwezya na pakuvisenda kwene.

²⁹ Yauze yapilwe umulimo wa kusunga iviombelo vyuze vyamuzilo, yamwi usu utonyoleke, yamwi waini, yamwi amafuta ya miolivi, yamwi ubani, nga nayauze ivintu vyakununkizya vyakulya.

³⁰ Lelo yasimapepo yamwi yakweti umulimo wakutikinkanya vyakununkizya ivyakulya.

³¹ Alino simapepo wenga, izina lyakwe Matitiya, umwana iyeli lyakwe Syalumu, uwamu luko lwakwe Kola, wapilwe umulimo wakupanga umukate wakupeela uwila.

³² Aina yao yamwi amu luko lwakwe Koati nayo yangalilanga umulimo wakuteyanya umukate wamuzilo, wakwika pi tebulo cila Sabata.

³³ Yamwi aina Levi yali nu mulimo wa kwimba inyimbo. Akalamba ya ndupwa zizyo yikalanga mu miputule imwi imwi yamu Ng'anda ikulu yakwe Yawe, nupya yataombanga imilimo yuze pano yene yali apintoke usiku nu musanya.

³⁴ Yaa yonsi yali intunguluzi zya ndupwa zya ina Levi ukulingana namuno ivikolwe vyao vyatantamile, nupya aikalanga mu Yelusalemu.

Ivikolwe vya mwene Saulo na ana yakwe

³⁵ Yeiyeli uwasokwile umusumba wa Gibyoni, wikalanga kuku kwene ku musumba wa Gibyoni. Umuci wali a Maaka.

³⁶ Nu mwanakwe iyeli wali a Abadoni, nga palondelela Zuli, Kisyi, Baali, Neli, Nadabu,

³⁷ Gedoli, Aiyo, Zakaliya na Mikiloti.

³⁸ Mikiloti wali a isi wakwe Syimeamu. Na yakwene yikalanga mu Yelusalemu apipi na akazi kao.

³⁹ Neli wali a isi wakwe Kisyi. Kisyi wali a isi wakwe Saulo. Saulo wali isi wakwe Yonatani, Malikisyua, Abinadabu na Esyibaali.

⁴⁰ Ana yakwe Yonatani aonsi a Melibaali. Melibaali wali a isi wakwe Mika.

⁴¹ Ana aonsi yakwe Mika a Pitoni, Meleki, Talea na Aazi.

⁴² Aazi wali a isi wakwe Yala, Yala wali a isi wakwe Alemeti, Azimaveti na Zimuli. Zimuli wali a isi wakwe Moza.

⁴³ Moza wali a isi wakwe Bineya. Bineya wali a isi wakwe Lefaya. Lefaya wali a isi wakwe Eleasa. Eleasa wali a isi wakwe Azeli.

⁴⁴ Azeli wakweti ana mutanda aonsi. Amazina yao a Azilikamu, Bokelu, Isumeli, Syealiya, Obadiya na Hanani. Yaa yonsi yali ana yakwe Azeli.